1 Gubuꞌ Sabat intsup sib da Maria mingꞌa gamp Magadala, Dzems rinanggan Maria, da Salome isub moni i nam rini gaunt i fadan da yatsa i Yisu riniuriatsan. 2 Da gubuꞌ miamun pisa Suntaꞌ maratait da ribarangan iyung i fada tauf bampun, 3 da igut i ruan, “Mangan bungꞌ arimpingꞌ i tauf tsiraꞌ sinungꞌ tauf bampun nifun aga?” 4 Da bitsintaꞌ gubuꞌ ribaranga fawaꞌa uts da raraba fada tauf bampun da itsangan ibi manga rimpingꞌ i tauf tsiraꞌ bingan igi sinungꞌ tauf nifun igi sib.Mt 28:2; Lk 24:2; Ywn 20:1

5 Da atangꞌa fada tauf bampun da itsanga garam rini faꞌ mangan atsufa ngarukui guntiꞌ sap mpada mingꞌa bangin bini, da ribarangan irunt fafun tsiraꞌ. 6 Da garam igi ini, “Anungꞌ runta fafun u. Agam isau Yisu, garam Nasaret, aru rib dintipa yaba gai mpara i ruan ugu. Arangan imunti marataꞌ sib! Ruwampa ani u. Watsangan Arangan mumai gan gingꞌa gin ani. 7 Wafan da wani da gan riban atsungꞌa gin da Petrus nabiani, ‘Yisu imungꞌ i agam ifa Galili. Mingꞌa nigi da agam bungꞌ atsanga Arangan, nasangꞌ nan Arangan nida sib da agam ugu.’ ” 8 Ribarangan irunt fafun tsiraꞌ da iratarat, da iwaꞌ sinungꞌ tauf bampun da irunt ifan, da anungꞌ ini nan mangan da garam mangan u, i ribarangan irat.*Mingꞌa papiar Grik ratar fain, da nan mungaꞌ bida ani imingꞌ ampap 8 bampanggan: “Da sagat sagat igi ifan da Petrus da rib ruta arangan da sung angu ini nan santan garam igi nida da ribarangan i nangan. Raiyi da Yisu runggan itangin riban atsungꞌa gin i fada intap santan, mingꞌa gubuꞌ yaban fasangꞌa gubuꞌ ruꞌan, da fisa i nan i Anutu nanggan rima garam sib i mpada maran taꞌan ntingan. Nan igi wasangꞌ i ntsupan u. Nan nidzun.”

9 Gubuꞌ Yisu muntida marataꞌ da Suntaꞌ maratait da isantingꞌ runggan isu miamun da Maria sagat Magadala. Arangan sagat aru Yisu siata marapayam maisan 7 waꞌa manaꞌ sinungꞌ gin ugu. 10 Sagat arangan ifan da irim sisingꞌ da rib ruta Yisu ugu da gubuꞌ ribarangan rungꞌ rangan da wangun barabindan. 11 Da gubuꞌ ribaranga ringanta i nan bida Yisu muntida marataꞌ da sagat igi tsanganda Arangan, da ribigi anungꞌ imuaruts nan igi u.Lk 24:10-11; Ywn 20:18

12 Raiyi da Yisu maran iwaꞌ maran mangan da isantingꞌ runggan da riban iruꞌ yunga sanab mingꞌa gamp tsiraꞌ waꞌa manaꞌ. 13 Da rib iruꞌ igi itip iba da ifis i nan igi da Yisu riban atsungꞌa gin santan, da bitsintaꞌ ribigi anungꞌ imuaruts rib iruꞌ igi nanggan impruꞌ ibinigi.

14 Raiyi da Yisu isantingꞌ runggan da riban 11 da gubuꞌ ribarangan gada nam. Arangan impiꞌ ribarangan i nanggan mamida i muarutsan da wangunggan babampafan, i wain, ribarangan imami muarutsa rib fain igi nanggan tsanganda Arangan tipa muntida marataꞌ.

15 Da Arangan ini da ribarangan, “Wafa intap santan da wafis i sisingꞌ bini da garam sib angu. 16 Da rib muarutsan da uda mpui ruruban da Anutu bungꞌ arim sib, da rib tungꞌa maran muarutsan da Anutu bungꞌ araru ribarangan da narim i mungaꞌ gan. 17 Da nam maran mangan fain santingꞌa Anutu nampanggan bida ani bungꞌ arut rib muarutsan. Bungꞌ adaru marapayam maisan i dzi binganggangꞌ. Da bungꞌ ani nan nifun faꞌ mara maran. 18 Da ribarangan bungꞌ ampung mur ragiyab i banginggan, da mur wasangꞌ i wayadan u. Da bida ribaranga numa nam ngkiangan maisan, da bungꞌ atungꞌ maran i wayada ribarangan. Da bungꞌ arim bangin nayab i garam rinin gingꞌan da rinin bungꞌ adaum.”Mt 28:18-20; Lk 24:46-49; Ywn 20:22-23; Ap 1:7-8

19 Nifutsarif Yisu nida nan sib da Anutu iyu Arangan iyab gunungun da ifampa Anutu banginggan bini.Mt 26:64; Mk 14:62; Lk 22:69; Ap 2:33; 5:31; 7:55,56 20 Da Yisu riban atsungꞌa gin idzarangꞌ ifan da ifis i sisingꞌ bini imingꞌ gamp ampi bingan. Da Nifutsarif inang gum impruꞌ da ribarangan, da inang nam maran mangan fain i ribarangan banginggan i santingꞌa bida ribarangan nanggan fisa gin igi da nan nidzun.