15
Yisu Imunti Pilatus Maranggan
(Matiu 27:1-2,11-26; Lukas 23:1-5,13-25; Yowanis 18:28—19:16)
1 Da tataꞌ maratait, da garam pumuꞌa Anutu wain gudzun rusan da garam gudzun ruas da garam gudzupuꞌ i nan faidagin ruas da utup nan tipan*utup nan tipan — Utup nan tipan igi da ifaringꞌ ibi Sanhidrin gin. Watsanga Markus 14:55. santan impruꞌ ruan da yudzu nan.Mt 26:59; Mk 14:55; 15:43; Lk 22:66; 23:50; Ywn 11:47; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20 Ribarangan idzur Yisu da yuntap i Arangan ifan da itangin ifa Pilatus bangingan.
2 Da Pilatus igut i Arangan, “Garam Yuda king gan agu, a?”Mt 27:11; Lk 23:3; Ywn 18:33,37
Da Yisu ini arangan nifunggan mungaꞌ ini binaꞌ, “U runggam ini.”
3 Da garam pumuꞌa Anutu wain gudzun rusan idzur nan i nam ampi bingan iyab i Yisu. 4 Da Pilatus itip igut i Arangan, “U mabugin i nida nan mungaꞌ? Waringant i nan ampi bingan ribarangan dzura yaba i agu aga!”
5 Da bitsintaꞌ Yisu wani nan mangan u. Da Pilatus irunt fafun da yu uwayant ampi bingan.Mt 27:13-14; Ywn 19:9
6 Sangꞌa udzuf santan da waꞌa gubuꞌ mararam tsiraꞌ Angira Atupa Sib da Pilatus inang da yatsungꞌ sanaban uda garam Yuda manga sinungꞌ karabus da tanginda fadan, atsungꞌa ampan Yuda nanggan runggan ragadan da yaiꞌa ruan gin. 7 Da gubuꞌ arigi da garam fain suda ufuai da ruta gabman Rom isa ruan da isa garam funub impa karabus. Da ribarangan gan mangan binganggan Barabas. 8 Da ampi tsiraꞌ igi iba da Pilatus da iyaiꞌ ruan i arangan nanga bida musa nangan ugu.
9 Da Pilatus igutin, “Agam maram yari i dzi tanginda garam Yuda king gan biaꞌan da agam?” 10 Pilatus ini ibinigi, i wain, arangan isruꞌ i garam pumuꞌa Anutu wain gudzun rusan ibugin Yisu, i wain, ampan maran yari i Arangan, ibinigi da iyu iba rim i arangan banginggan. 11 Da bitsintaꞌ garam pumuꞌa Anutu wain gudzun rusan iraꞌ i ampi tsiraꞌ igi wangun i yaiꞌan da nidan da Pilatus i rima Barabas waꞌa sinungꞌ karabus, da anungꞌ Yisu u.Mt 27:16-21; Lk 23:18-19; Ywn 18:39-40 12 Da Pilatus igut i ribarangan, “Da dzi nanga bida anungꞌ i garam agam faringꞌa bida garam Yuda king gan ani?”
13 Da ribarangan santan iyaiꞌ da ini, “Wadintip wayab gai mpara i ruan.”Mt 27:22; Lk 23:20-23; Ywn 19:6
14 Da Pilatus igutin, “Wain idzuwai? Arangan inang asub idzuwai?”
Da bitsintaꞌ ribarangan ruyaiꞌ tsiraꞌ bingan da ini, “Wadintip wayab gai mpara i ruan!”Mt 27:23; Lk 23:22-33; Ywn 19:14-15 15 Da Pilatus ini yafada ampan tsiraꞌ igi wangun da irim Barabas iwaꞌ ifan da ribarangan. Da ini da iripi Yisu da itangin Arangan ifa garam singaari ruas banginggan i dintipa yaba gai mpara i ruan.Mt 27:26; Lk 23:24-25; Ywn 19:16
Garam Singaari Irim Ub i Yisu
(Matiu 27:27-31; Lukas 23:11; Yowanis 19:2-3)
16 Da garam singaari ruas yuntap i Yisu yatangꞌ ifa Pilatus ungaran tsiraꞌ mpada gin da nanga guman gin ntiangꞌ gan wasaꞌ, da inuꞌ garam singaari utup tsiraꞌ igi santan impruꞌ. 17 Ribarangan yatsuf ngarukui biꞌ bini bida king ngarukui gan da Arangan, ida ifir gantsuats maradantang imimuan gin isu dampun gudzun da yatsuf iyab i Arangan gudzun. 18 Da inuꞌ da ini, “O garam Yuda king gan! Aga tsarif agu!” 19 Da ribarangan yis Arangan gudzun i gai da itupingꞌ nifu gurun i Arangan, da yidzaꞌ faga gudzun, da itatapuang iruꞌ Arangan fagan. 20 Da ribarangan irim umpur i Arangan sib, da igruꞌ ngarukui biꞌ bini igi rai da yatsuf Arangan ngarukui gan iyab rutin. Da ribarangan iyu Arangan ifan i dintipa yaba gai mpara i ruan.
Idintip Yisu Iyab Gai Mpara i Ruan
(Matiu 27:32-44; Lukas 23:26-43; Yowanis 19:16-27)
21 Da garam mangan gampan Sairini, binganggan Saimon, Aleksander da Rufus ramanggan, iyung sanab igi iba i atangꞌa gamp tsiraꞌ igi, da garam singaari ruas yusu arangan i buaringꞌa Yisu gai mpara i ruan gan. 22 Ribarangan iyu Yisu ifa mumai nida Golgota gin, wainggan ibi ‘Mumai Gudzu Urun’.Mt 27:33; Lk 23:33; Ywn 19:17 23 Da ribarangan irim wain gurun impruꞌ da gai gurun ngkiangan†impruꞌ da gai gurun ngkiangan — Gai gurun igi binganggan ‘mir’, da garam mararuru ampi bingan maran ifur ibi ribarangan irim i rasuda nam tsakia. Gai gurun igi da nam rini gaunt ngarubini da garam inang da iyats i garam mampan da gubuꞌ nanga i riman (Ywn 19:39). Da gai gurun igi nam ntsuman gan tsiraꞌ bingan, da garam mararuru uda uwayant i ngantam iyu iba rim da Yisu da gubuꞌ Arangan suda mamaꞌ narun ugu (Mt 2:11). i Yisu numan, da bitsintaꞌ anungꞌ inum u. 24 Da ribarangan idintip Arangan iyab gai mpara i ruan. Da ifab ruan i Arangan ngarukui gan. Da yantungꞌ rarub i tsanganda mangan bungꞌ ayu i ngarukui gan idzuwai.Yon 1:7; Mt 27:35; Lk 1:8-9; 23:34; Ywn 19:24; Ap 1:26
25 Gubuꞌ iyab sib ibi 9 kilok da ribarangan idintip Yisu iyab gai mpara i ruan. 26 Da yakar nan dzura yaba i Arangan ibiani: “GARAM YUDA KING GAN ANI.”Mt 27:37; Lk 23:38; Ywn 19:19 27 Da garam singaari ruas indintip garam mpunga rib da wapa nam iruꞌrun iyab gai mpara i ruan iruꞌrun impruꞌ da Yisu, mangan itupriꞌ Arangan bangin bini da manga i bangi yas.Mt 27:38; Lk 23:33; Ywn 19:18 28 ‡Ampap 28 mingꞌa papiar Grik fain ini ibiani: “Da nan akaran isu nidzun ibiani: ‘Ribarangan itsanga arangan ibi garam maisan.’ ” Watsanga: Ais 53:12; Lk 22:37 29 Da rib fain yunga ba fadan yis gudzun da irim ub i Arangan ibiani, “Ya! Agu ni tawaꞌa Ungar Mararam ruꞌa sib da tipa riman da gubuꞌ iruꞌ da bits angu ugu. 30 Ariꞌ, warim runggam sib da waruꞌ ba sinungꞌ gai mpara i ruan igi!”
31 Da garam pumuꞌa Anutu wain gudzun rusan da garam gudzupuꞌ i nan faidagin ibinigi irim umpur i Arangan da ini da runggan da ini binaꞌ, “Arangan irim rib fain sib, da bitsintaꞌ arangan wasangꞌ i rima runggan sib u. 32 Amaꞌ, Kristus garam aru Anutu ragadan ugu igi da garam Israil King gan, arangan naruꞌ ba sinungꞌ gai mpara i ruan, i aga tsangandan da muarutsan.” Da garam iruꞌ tupriꞌa gai mpara i ruan mpruꞌan ugu irim ub impruꞌ ibinigi.
Yisu Nanggan Mampan
(Matiu 27:45-56; Lukas 23:44-49; Yowanis 19:28-30)
33 Da gubuꞌ maran waꞌa 12 kilok da nam mimin tsiraꞌ ibuafir intap arigi santan, imingꞌ isangꞌ 3 kilok nam nufan. 34 Da waꞌa 3 kilok nam nufan arigi da Yisu iyaiꞌ nifun tsiraꞌ angu ibiani, “Eloi, Eloi, lama sabaktani?” — wainggan ibi, ‘Dzi Anutu gangꞌ, dzi Anutu gangꞌ, wain ibianungꞌ da U tangin dzi rai?’Mnt 22:2; Mt 27:46
35 Gubuꞌ rib fain muntida uts ringanta gin da ini, “Waringantin, arangan inuꞌ Eliya.”
36 Da garam mangan irunt da ibuarum bruꞌ iruꞌ wain gurun giriripan da idzur i gai da yintsi iyab ifan da Yisu i numan, da ini, “Agi anungꞌ nanga nam manga gin u. Agi nampa da natsangan, Eliya bungꞌ aba da nayu arangan naruꞌ ba, ma?”Mt 27:48-49; Lk 23:36; Ywn 19:29
37 Da Yisu inuꞌ nifun tsiraꞌ da imamp.Mt 27:50; Lk 23:46; Ywn 19:30
38 Da bruꞌ tsiraꞌ ruguda i Ungar Mararam igari ruan farab isu iruꞌrun imingꞌ wagungꞌ ifa sangꞌ warangꞌ.
39 Gubuꞌ garam singaari gudzunggan muntida Yisu maran igi tsanganda Arangan nanggan mampan da ini, “Nan nidzun bingan, garam ani Anutu Narunggan!”
40 Da sagat fain imunti ruguntiꞌ da ifuris nam idzuwai waꞌa nigi. Wasaꞌ i rib muntidan igi da Maria mingꞌa gamp Magadala, Dzems isiꞌ da Yoses§Yoses — ma Yosef (Watsanga arangan binganggan mingꞌa Mt 27:56.) rinanggan Maria, da Salome. 41 Gubuꞌ Yisu rumpada Galili, da sagat iruꞌ da bits igi yatsungꞌ Arangan da irim Arangan sib. Da sagat ampi bingan ruta Arangan yaba ba Yerusalem rumunti nigi impruꞌ ibinigi.Mt 27:55-56; Lk 23:49; Ywn 19:25
Dzufungꞌa Yisu
(Matiu 27:57-61; Lukas 23:50-55; Yowanis 19:38-42)
42 Nigi garam Yuda gubuꞌ gan tipa ruan i gubuꞌ Sabat.Lk 23:54; Ywn 19:42 Nam inuf sib da gubuꞌ Sabat inang i waꞌan. 43 Ibinigi da garam Arimatia binganggan Yosef iba. Arangan garam nidzun mangan mpada wasaꞌ i garam Yuda utupan nan tipan da irim maran i tsanganda Anutu nanggan mpada tayangꞌ gan garaman. Da arangan ifa munti Pilatus maranggan ruta nam ratan maꞌan da igutin i uda Yisu riniuriatsan.Mt 26:59; Mk 14:55; 15:1; Lk 22:66; 23:50; Ywn 3:1; 7:50; 11:47; 19:38-42; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20 44 Pilatus ringanta i Yisu mampa sib da arangan irunt fafun gin. Ibinigi da irim nan da garam singaari gudzunggan iba da Pilatus igut i arangan gin i bida Yisu mampa sib. 45 Da gubuꞌ Pilatus ringanta gin rururungan mingꞌa garam singaari gudzunggan gin bida nan igi nan nidzun, da arangan itaga ruan i Yosef uda Yisu riniuriatsan.Mt 27:57-58; Lk 23:50-52; Ywn 19:38 46 Da Yosef isub moni i bruꞌ faꞌ bini mangan, da iyu Yisu riniuriatsan iruꞌ, ipatiꞌ sib i bruꞌ igi, da irim yatangꞌ tauf bampun mangan garam raban. Ida irimpingꞌ i tauf tsiraꞌ mangan sib i tauf nifun.Mt 27:59-60; Lk 23:53; Ywn 19:40-41 47 Maria mingꞌa gamp Magadala da Maria Yoses rinanggan itsanga mumai rima Arangan riniuriatsan gin igi.
*15:1: utup nan tipan — Utup nan tipan igi da ifaringꞌ ibi Sanhidrin gin. Watsanga Markus 14:55.
15:1: Mt 26:59; Mk 14:55; 15:43; Lk 22:66; 23:50; Ywn 11:47; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20
15:2: Mt 27:11; Lk 23:3; Ywn 18:33,37
15:11: Mt 27:16-21; Lk 23:18-19; Ywn 18:39-40
15:13: Mt 27:22; Lk 23:20-23; Ywn 19:6
15:14: Mt 27:23; Lk 23:22-33; Ywn 19:14-15
15:15: Mt 27:26; Lk 23:24-25; Ywn 19:16
15:22: Mt 27:33; Lk 23:33; Ywn 19:17
†15:23: impruꞌ da gai gurun ngkiangan — Gai gurun igi binganggan ‘mir’, da garam mararuru ampi bingan maran ifur ibi ribarangan irim i rasuda nam tsakia. Gai gurun igi da nam rini gaunt ngarubini da garam inang da iyats i garam mampan da gubuꞌ nanga i riman (Ywn 19:39). Da gai gurun igi nam ntsuman gan tsiraꞌ bingan, da garam mararuru uda uwayant i ngantam iyu iba rim da Yisu da gubuꞌ Arangan suda mamaꞌ narun ugu (Mt 2:11).
15:24: Yon 1:7; Mt 27:35; Lk 1:8-9; 23:34; Ywn 19:24; Ap 1:26
15:26: Mt 27:37; Lk 23:38; Ywn 19:19
15:27: Mt 27:38; Lk 23:33; Ywn 19:18
‡15:28: Ampap 28 mingꞌa papiar Grik fain ini ibiani: “Da nan akaran isu nidzun ibiani: ‘Ribarangan itsanga arangan ibi garam maisan.’ ” Watsanga: Ais 53:12; Lk 22:37
15:34: Mnt 22:2; Mt 27:46
15:36: Mt 27:48-49; Lk 23:36; Ywn 19:29
15:37: Mt 27:50; Lk 23:46; Ywn 19:30
§15:40: Yoses — ma Yosef (Watsanga arangan binganggan mingꞌa Mt 27:56.)
15:41: Mt 27:55-56; Lk 23:49; Ywn 19:25
15:43: Mt 26:59; Mk 14:55; 15:1; Lk 22:66; 23:50; Ywn 3:1; 7:50; 11:47; 19:38-42; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20
15:45: Mt 27:57-58; Lk 23:50-52; Ywn 19:38
15:46: Mt 27:59-60; Lk 23:53; Ywn 19:40-41