1 Gubuꞌ mangan da Petrus irut Yowanis iyung iyab ifa Ungar Mararam. Da gubuꞌ maran ibi 3 kilok nam nufan, da nigi gubuꞌ maran ampan nangan da fada i udagin. 2 Da rib fain ibuaringꞌ garam manga rinan apingꞌa ruta fagan agadan ifa Ungar Mararam igi ntiangꞌ gan muantsi gan mangan faringꞌa bida Muantsi Rinigira Bini gin. I gubuꞌ santan da inang da itangin arangan i muantsi igi ringampa gan, da aranga mpai igi da inang da inuꞌ da igampun runggan da rib atangꞌa Ungar Mararam ntiangꞌ gan wasaꞌ.

3 Da garam fagan agadan igi itsanga Petrus ruta Yowanis nanga i atangꞌa fada Ungar Mararam igi ntiangꞌ gan wasaꞌ, da arangan igampun runggan da rib iruꞌ igi i moni. 4 Da bitsintaꞌ Petrus da Yowanis intrung maran funub angu i arangan, da Petrus ini, “Wararab agai!” 5 Da garam igi intrung maran funub angu i rib iruꞌ igi da ini gan ribarangan bungꞌ arim moni da arangan. 6 Da bitsintaꞌ Petrus ini, “Silva da gol bits imaꞌ i dzi riman da agu! Da bitsintaꞌ dzi bungꞌ arim nam mingꞌa dzi gin ani da agu. I Yisus Kristus garam Nasaret ugu binganggan, da wauriꞌ ayab da wayung.” 7 Da Petrus impung aranga bangin bini da irim aranga sib i muntida yaban. Da sung angu da aranga faga intap da faga umpiꞌ ibabampaf, 8 da aranga yatup iyab da imunti da iyung i faganggan. Da arangan irut Petrus da Yowanis iyung yatangꞌ ifa Ungar Mararam igi ntiangꞌ gan wasaꞌ. Da arangan iyung da yatup atup da itsarif Anutu. 9 Ampan santan igi itsanga aranga yung yungan da tsarifa Anutu. 10 Da ribarangan isruꞌ gin ibi aranga garam aru nangan da mpada Muantsi Rinigira Bini igi ringampa gan da nuꞌa rib i nam ugu. Da ampan igi irunt fafun da maran ifur nan ampi bingan i nam waꞌan da arangan igi.

11 Gubuꞌ garam igi rungꞌ ngifa Petrus da Yowanis ragun, da rib santan igi irunt ruta maran furan ampi bingan iba da ribarangan imingꞌ mumai faringꞌa bida Solomon tsaparangꞌ gan imingꞌ Ungar Mararam igi ntiangꞌ gan wasaꞌ.Ywn 10:23; Ap 5:12

12 Gubuꞌ Petrus tsanganda rib santan igi mpruꞌa ruan, da ini da ribarangan ibiani, “Garam Israil, ibianungꞌ da agam irunt fafun i nam agam tsangandan ani? Da ibianungꞌ da agam intrung maram funub angu i agai? Mabi agam maram mafur abi aga sangꞌ riniurun ma aga atsungꞌ i Anutu sanaban santan rururungan ida aga nang da garam ani yuriꞌ da iyung, a? Imaꞌ angu!

13 “Anutu aru Abraham da Isak da Yakop da agi tafangꞌ rusangꞌ fain pumuꞌan ugu irim bingan tsiraꞌ da garam guman Yisu.Kis 3:6,15; Mt 22:32; Mk 12:26; Lk 20:37; Ap 7:32 Nigi garam aru agam rima fada garam ipiap bangingan ugu. Da gubuꞌ Pilatus nida tanginda Arangan fadan, da agam irim barum da Yisu da agam ini ibi Pilatus anungꞌ tanginda Aranga fadan u. 14 Aranga Garam Mararam da Rururungan, da bitsintaꞌ agam irim barum da Arangan da irim udzungꞌ i Pilatus i tanginda garam isa garam funub biaꞌan da agam. 15 Agam yis Garam maran taꞌan wain funub, da bitsintaꞌ Anutu itip iraꞌ i Arangan sinungꞌ nam mampan. Da aga runggaꞌ itsangan ida aga ni wasi. 16 Aga muaruts Yisu, da garam aru agam tsangandan da sruꞌa gin ani iyu riniurun i Yisu binganggan angu iyab i nam muarutsan igi. Yisu runggan iraꞌ i aga nanggaꞌ muarutsan, da nam muarutsan igi mpruꞌan da Yisu binganggan angu da inang garam arani iwaꞌ bini inting ibi aru agam tsangandan igi.

17 “Da raingꞌ ruas, dzi sruꞌ gin ibi agam da garam gudzun rusam anungꞌ isruꞌ i Yisu igi garam idzuwai da agam inang uwayant bida nigi i Arangan. 18 Da bitsintaꞌ mungꞌ ugu da Anutu ifis i nan imingꞌ profet ruas nifun i Kristus, Garam Arangan runggan ragadan i tipa yuda i ampan gan ugu, bungꞌ ayu tsakia. Da Anutu inang nanggan igi isu nidzun sib iyab i uwayant aru agam nangan ugu. 19 Ibinigi da waitam i ruam da Anutu, da watangin uwayant maisan santan rai, da Anutu bungꞌ asiat agam nanggam maisan rai. 20 Da gubuꞌ agam nanga bida nigi da Nifutsarif bungꞌ arim asap da riniurun faꞌ da agam ganunggam. Da bungꞌ atangin Kristus, Garam Arangan ragadan i agam ugu, naba — nigi Yisu. 21 Da Yisu rubungꞌ ampa gunungun nasangꞌ gubuꞌ Anutu tipa nam santan angu waꞌa suda faꞌ nabi Aranga nida mungꞌ ugu i profetan mararam ruas nifunggan. 22 Mungꞌ ugu da Moses ini ibiani, ‘Nifutsarif Yawe agam Anutu gam bungꞌ araꞌ i garam mangan namingꞌ agam utupam, da bungꞌ asu profet abi dzi rururungan. Da agam watsungꞌ nan santan aranga nidan da agam. 23 Garam santan buginda i ringanta i profet igi nanggan da anungꞌ isangꞌ i rungꞌ suda utup Israil an u da Anutu bungꞌ ais fufunub.’Lo 18:15-19; Ap 7:37

24 “Profet santan nida Anutu nanggan mungꞌ ugu, mingꞌa profet Samuel da bada sangꞌa profet ruas mingꞌa bampan i Samuel gubuꞌ gan, da santan igi ifis i nan i gubuꞌ aru bawaꞌa sib ani. 25 Agam profet ruas narun rusan, da agam rib uda nam Anutu ragada i riman da gubuꞌ Aranga udzuda nan mpruꞌan da agi tafangꞌ rusangꞌ ugu. Nan Arangan nidan da Abraham ugu ibiani, ‘Mingꞌa u yanginggam da Dzi bungꞌ afinti garam intap utup utup santan.’Mia 12:3; 18:18; 22:18; Ro 9:4,8; Ga 3:8 26 Gubuꞌ Anutu raꞌa i gan garam guman Yisu, da Arangan itangin iruꞌ ba da agi ampan Israil mungꞌ, i Arangan ini fintida agam i sanab parima i agam bits bits sinungꞌ agam nanggam maisan.”