1 Gubuꞌ Paulus da Barnabas bawaꞌa Aikoniam, da yatangꞌ rib Yuda ungaran mpruꞌa ruan gin ibi tuasaranga nanga mingꞌa Antiok ugu. Ribaranga fis i Nifutsarif nanggan da idzuwarin bini angu, ibinigi da rib ampi bingan mingꞌa garam Yuda da garam Grik imuaruts. 2 Da bitsintaꞌ rib Yuda fain buginda i muarutsan iwaya garam da sagat mingꞌa utup fain wangun da inang ribigi nugun itsakia i rib muarutsan igi. 3 Paulus da Barnabas impa gubuꞌ guntiꞌ imingꞌ igi da ifis i Nifutsarif nanggan ruta nam ratan maꞌan. Da Nifutsarif irim nampang da ribarangan i nanga nam maran mangan ampi bingan i santingꞌa bida nan ribaranga fisa gin yaba i Aranga maraampi gan igi nan nidzun. 4 Da bitsintaꞌ rib mpada gamp arigi brang ruan isu utup iruꞌrun, fain imunti impruꞌ da Paulus da Barnabas i nanggan fisa gin da fain imunti impruꞌ da rib Yuda i nanggan nidan. 5 Garam utup fain impruꞌ da rib Yuda da garam gudzun ruas itip nan i nanga maisan i Paulus da Barnabas da tapuda funub i tauf. 6 Da bitsintaꞌ rib iruꞌ igi iringant i nan arigi da irunt gan arun ifa distrik Likonia gampan Listra da Derbe da intap mingꞌa uts tsuafiꞌa gamp iruꞌ igi. 7 Da mingꞌa nigi da tuasaranga rungꞌ ifis i Anutu sisingꞌ bini gan.

8 Mingꞌa gamp Listra da garam fagan agadan mangan impai igi. Da garam igi fagan yaga da gubuꞌ rinanggan apingꞌan da arangan wayung u. 9 Gubuꞌ Paulus fisa i nan, da garam igi rim ringan i nan igi. Da Paulus intrung maran rururungan angu i arangan da itsanga ibi arangan imuaruts da isangꞌ i waꞌa bini. 10 Ibinigi da Paulus ini nan tsiraꞌ ifan da arangan ibiani, “Wauriꞌ da wamunti.” Da gubuꞌ arigi rururungan da arangan ipruts iyab da iyung.

11 Da gubuꞌ ampan tsiraꞌ tsanganda nam Paulus nangan igi, da iyaiꞌ tsiraꞌ bingan i nifu nan Likonia da ini, “Anutu ruas iwaꞌ ibi garam gar da iruꞌ ba da agi!” 12 Barnabas da ifaringꞌ bingan Sus da Paulus da ifaringꞌ bingan Hermes, i wain, aranga garam nida nan. 13 Anutu umpur Sus igi ungaran pumuꞌa gin imingꞌ manaꞌ uts angu da gamp igi ntiangꞌ gan nifun. Da garaman pumuꞌan iyu makau arapuꞌ fain impruꞌ da gai maraburuab ntsuran fain ifa muantsi nifun, i wain, arangan ini ruta ampan tsiraꞌ igi tsarada nam suda dangki da Paulus da Barnabas.

14 Da bitsintaꞌ gubuꞌ aposel Barnabas da Paulus ringanta i nan igi, da wangun ibarabin da ibrang ngarukui gan. Da irunt ifa wasaꞌ i ampan tsiraꞌ igi da iyaiꞌ ini binaꞌ, 15 “Ampan ai, wain idzuwai da agam inang ibinigi da agai? Anungꞌ nanga bida nigi u! Aga garam gar angu ibi agam! Aga yu sisingꞌ bini iba i nidan da agam i agam tanginda nam utaꞌ utaꞌ tuasaru agam pumuꞌan igi, da agam parima i ruam fadan da Anutu maran taꞌan, aru tanginda gunungun da intap da uruts da nam sib angu mingꞌa wasaꞌ gin. 16 Mungꞌ ugu da Arangan itus maran i garam utup santan mingꞌa intap da intap sib angu da iyung i maranggan furan. 17 Da bitsintaꞌ Arangan anungꞌ idzigin runggan inting angu i garam gar u. Imaꞌ. Arangan isantingꞌ runggan i uwayant bini Arangan nangan i agam. Arangan inang gamiꞌ itangin gunungun rai da iruꞌ ba i agam, da itangin nam mara maran iwaꞌ intap da gubuꞌ maranggan rururungan, da irim nam gadan ampi bingan da agam, da inang agam nugum itsiaꞌ.” 18 Ribarangan ini nan igi, da bitsintaꞌ ampan igi rungꞌ ini tsarada nam suda dangki da ribarangan. Ibinigi da ribarangan inang gum babampaf da imunti sib in.

19 Raiyi da garam Yuda fain imingꞌ Antiok da Aikoniam iba da iwaya ampan wangun da ribigi su ipiap i Paulus da Barnabas, da itapu Paulus i tauf da yuntap i arangan iwaꞌ sinungꞌ gamp, i wain, ini arangan mampa sib gin. 20 Da bitsintaꞌ rib muarutsan iba munti itsuafiꞌ arangan, da arangan itip yuriꞌ da itip yatangꞌ gamp. Ipis ba maiꞌ da Paulus irut Barnabas ifa gamp Derbe.

21 Paulus da Barnabas ifis i sisingꞌ bini imingꞌ Derbe da inang da rib ampi bingan iwaꞌ ibi Yisu riban atsungꞌa gin, da ribaranga tip ifa Listra da Aikoniam da Antiok mingꞌa uts da Pisidia. 22 Da ini nan da rib muarutsan mpada gamp gamp igi i rima riniurun da ribaranga wangunggan i muntida babampafan i nanggan muarutsan, da ini ibiani, “Agi nawaꞌ da barabin ampi bingan namungꞌ raiyi, da namus atangꞌa wasaꞌ i Anutu nanggan mpada tayangꞌ gan garaman ratar ntingan.” 23 Da Paulus da Barnabas itaga garam gudzun i mpada tayangꞌ ampan muarutsan isangꞌ gamp igi santan, da ipaꞌ ruan i nam gadan da iyugin da irim garam gudzun ruas igi ifa Nifutsarif aru tuasaranga muarutsan igi banginggan, i Arangan mpada tayangꞌ gin.

24 Raiyi da Paulus da Barnabas iyung wasaꞌ i distrik Pisidia da ifawaꞌ provins Pamfilia. 25 Gubuꞌ ribaranga fisa i Anutu nanggan mingꞌa gamp Perga sib da ribaranga ruꞌ ifa gamp Atalia. 26 Mingꞌa Atalia da ribaranga yab i madzung da itip ifa gamp Antiok mingꞌa Siria. Da mingꞌa Antiok igi mungꞌ da ampan irim rib iruꞌ igi ifa Anutu banginggan i Aranga rima maraampi gan da ribarangan i nanga i gan guman ugu. Da aruani da tuasaranga bungꞌ intsup gum igi sib. 27 Gubuꞌ tuasaranga fawaꞌa sib da itip inuꞌ ampan muarutsan santan impruꞌ da ifis i nan i nam santan Anutu nanga yaba i tuasaranga banginggan impruꞌ da nam Anutu tusa muantsi i garam mingꞌa utup fain muarutsa Yisu. 28 Da ribarangan irut rib atsungꞌa i Yisu impa gubuꞌ guntiꞌ bingan imingꞌ Antiok.