1 Paulus ifawaꞌ gamp Derbe da Listra impruꞌ ibinigi. Mingꞌa nigi da Yisu mamaꞌ gan atsungꞌa gin mangan impai, binganggan Timoti. Arangan rinanggan sagat Yuda da sagat muarutsan, da bitsintaꞌ ramanggan da garam Grik. 2 Rib muarutsan mpada Listra da Aikoniam igi ini ibi Timoti igi garam bini. 3 Paulus maran yari i Timoti ruta arangan yungan. Ibinigi da Paulus iyu Timoti ifan da rib fain isaf arangan rinin, i garam Yuda mpada nigi uda arangan yaba bida i gan bits, i wain, rib santan isruꞌ gin ibi Timoti ramanggan igi garam Grik, rib mamida i safa rinin. 4 Da gubuꞌ ribarangan yunga gamp gamp igi fadan da ribarangan ini nan aposel ruas da garam gudzun ruas udzuda sib mingꞌa Yerusalem ugu da rib muarutsan igi i atsungꞌa gin. 5 Ibinigi da rib muarutsan mpadan igi nanggan muarutsan iyingꞌ isu tsiraꞌ da gubuꞌ sib angu da rib muarutsan igi gudzunggan iyingꞌ iyab.

6 Da ribarangan iyung wasaꞌ i distrik Frigia da Galesia, i wain, Marapayam Mararam imunti sib i ribarangan i anungꞌ fisa i nan mingꞌa provins Esia u. 7 Da gubuꞌ ribarangan bawaꞌa distrik Misia ringampa gan da ribarangan inang i atangꞌa fada provins Bitinia, da bitsintaꞌ Yisu Marapayaman imunti sib i ribarangan i anungꞌ atangꞌan u. 8 Ibinigi da ribarangan iyung rururungan imingꞌ wasaꞌ i distrik Misia igi da iruꞌ gamp Troas. 9 Nam idziang da Paulus itsanga nam ibi nam puafuban mangan, da arangan itsanga garam Masedonia mangan imunti da igaib runggan da arangan da ini ibiani, “Wais uruts udziꞌ da waba marafain intap Masedonia ani da warim aga sib.” 10 Gubuꞌ Paulus tsanganda nam bida nam puafuban igi sib, da sung angu da aga tip ruangꞌ i fada Masedonia, i aga yu uwayant sib ibi Anutu inuꞌ agai i fisa i sisingꞌ bini da ribarangan.

11 Ibinigi da aga yab i madzung mangan imingꞌ Troas da aga fa rururungan intap isiꞌ Samotres mingꞌa uruts wasaꞌ da pisa tataꞌ da aga fawaꞌ gamp Neapolis. 12 Da aga tangin Neapolis rai da aga yung ifa Filipai. Da Filipai igi garam Rom gampan mangan, da isu gamp tsiraꞌ mangan i distrik igi mingꞌa wasaꞌ i provins Masedonia. Da aga mpa gamp igi gubuꞌ faingꞌ ifa sib.

13 Gubuꞌ Sabat iwaꞌ da aga yung iwaꞌ muantsi mingꞌa gamp igi ntiangꞌ gan manaꞌ da aga fa mpui ringan. Da aga marangꞌ ifur i waꞌan da mumai udagin mangan mingꞌa nigi. Da aga mpai iruꞌ da ini nan da sagat fain mpruꞌa maran mungꞌ mpadan igi. 14 Da sagat mangan binganggan Lidia bada mingꞌa gamp Tayataira inang guman suba moni i bruꞌ biꞌ*bruꞌ biꞌ — Bruꞌ igi anungꞌ biꞌ rururungan u, da bitsintaꞌ pepol (Nan Inglis ‘purple’), da nan Adzera ratar ini “mingꞌ” gin.. Da arangan inang da yatsungꞌ rib Yuda sanaban pumuꞌa Anutu. Da arangan iringant i nan Paulus nidan igi da Nifutsarif itus muantsi i arangan wangunggan i rima ringan bini angu gin da uda nan igi yaban. 15 Gubuꞌ arangan ruta riban mpada i ungaran uda mpui ruruban sib da arangan ini da agai ibiani, “Agam isruꞌ gin ibi dzi muaruts Nifutsarif nan nidzun angu, ibinigi da agam waba da wampa dzi ungarangꞌ.” Da arangan yudzungꞌ da agai isangꞌ aga ringanta i arangan nanggan.

16 Gubuꞌ mangan da aga yung ifa mumai rib nangan da udagin gin da aga waꞌ da sagat gum utaꞌ mangan marapayam maisan yantsangan da rima uwayant maradzigin rutin. Da arangan inang da ini nam waꞌan da bampan aga wasi, da gan garam gudzun rusan inang da iyu nam ntsuman ampi bingan gin. 17 Da sagat igi yatsungꞌ Paulus da agai da inuꞌ ini binaꞌ, “Garam tuasarani da Anutu Mpada Wagungꞌ i anutu santan igi garam guman, da ribarangan isantingꞌ Anutu sanaban rima agam sib i uda agam sinungꞌ nam maisan wasi.” 18 Sagat igi inang ibinigi da gubuꞌ ampi bingan da Paulus iraraiꞌ sib i ringanta i nan nuꞌan igi. Ibinigi da Paulus yitam i ruan da ini da marapayam maisan igi ibiani, “Dzi ni da agu i Yisu Kristus binganggan da wawaꞌ manaꞌ sinungꞌ sagat igi.” Da gubuꞌ maran arigi rururungan da marapayam maisan igi itangin sagat igi rai da ifan.

19 Da gubuꞌ sagat igi garam gudzun rusan tsanganda bida ribarangan sanaban suba moni gin tsunginda ruan, da ribarangan impung Paulus da Sailas da yuntap in ifa mumai rib mpruꞌa ruan gin da rantsa nam in i garam gudzun ruas raruda ribarangan. 20 Gubuꞌ uda ribarangan fadan da garam raruda nan ruas da ribigi ini ibiani, “Garam tuasarani garam Yuda da inang da iraꞌ i barabin da gagara imingꞌ agi gampangꞌ ani. 21 Da ribarangan ifis i nan da ampan i atsungꞌa sanab agi garam Rom nanggangꞌ faidagin paꞌa agi gin i uda yaban da atsungꞌa gin ugu.” 22 Da ampan santan yari nan impruꞌ da Paulus da Sailas, da garam raruda nan ruas ini da garam bruꞌ uts ruas igruꞌ rib iruꞌ igi ngarukui gan da idzibi i gai. 23 Yis ribarangan iyus angu sib da itangin ribarangan yatangꞌ karabus da ini da garam mpada tayangꞌ ungar karabus igi i tsanganda ribarangan sib. 24 Garam igi ringanta i nan igi sib da itangin ribarangan yatangꞌ ungar karabus igi mumai gan mangan mingꞌa wasaꞌ. Da yudzu ribaranga fagan ufiak impruꞌ da gai.

25 Mpas yatup da Paulus da Sailas iyugin da yis mint i tsarifa Anutu da rib mpada karabus igi iringantin. 26 Da sung angu da tufuringꞌ tsiraꞌ mangan yudza gin, da tauf tsiraꞌ ungar karabus igi mpada yaba gin santan intsungꞌ i ruan, da muantsi santan ungar igi itus ruan sib, da tsen dzura rib karabus santan igi ipiraꞌ ruan rai. 27 Da gubuꞌ garam mpada tayangꞌ ungar karabus igi maran taꞌan da uriꞌan, da itsanga muantsi santan igi tusa ruan da aranga maran ifur ibi rib karabus igi santan marunt gan arun sib. Ibinigi da arangan itus gan bainatan iyab da inang i isa runggan funub. 28 Da bitsintaꞌ Paulus iyaiꞌ nifun tsiraꞌ bingan ini binaꞌ, “Anungꞌ wayada runggam u! Aga santan rumpai!”

29 Da garam mpada tayangꞌ ungar karabus igi inuꞌ garam guman i uda rampi badan, da arangan irunt yatangꞌ ifa ungar wasaꞌ. Da arangan irat nidzun angu da iratarat da itatapuangꞌ iruꞌ Paulus da Sailas fagan. 30 Da iyu rib iruꞌ igi iwaꞌ ba manaꞌ da igut i ribarangan ibiani, “Agam garam tsiraꞌ iruꞌ igi, dzi nabunang nam idzuwai i agam Anutu gam rima dzi sib da uda dzi sinungꞌ nanggan nugun sasusan?”

31 Da Paulus da Sailas ini ibiani, “Wamuaruts Nifutsarif Yisu da Anutu bungꞌ arim agu sib. Nabinigi angu i rib santan mpada ungaram.” 32 Da rib iruꞌ igi ifis i Nifutsarif nanggan da arangan da rib santan mpada i gan ungaran. 33 Gubuꞌ maran idziang arigi da garam mpada tayangꞌ ungar karabus igi iyu Paulus da Sailas da yadzuꞌ i rini mais. Da sung angu arangan irut gan riban santan ruta mpruꞌa ruan ungar bitsintaꞌ iyu mpui ruruban. 34 Da arangan iyu tuasarangan ifa gan ungaran, da irim nam gadan rutin. Da arangan da riban santan mpada ungaran nugun itsiaꞌ nidzun, i wain, ribarangan imuaruts Anutu.

35 Pisa tataꞌ da garam raruda nan ruas itangin garam bruꞌ uts ruas ifan da garam mpada tayangꞌ ungar karabus da ini rutin ibiani, “Watangin garam iruꞌ igi nafan.” 36 Da garam mpada tayangꞌ ungar karabus ini da Paulus ini binaꞌ, “Garam raruda nan ruas ini agam tanginda karabus rai da fadan, ibinigi da agam wawaꞌ ba da wafan ruta nan nufan.”

37 Da bitsintaꞌ Paulus ini da garam bruꞌ uts igi ibiani, “Aga iruꞌ ani da aga garam Rom, da ribarangan anungꞌ iraru agai da itsanga asub mangan mingꞌa i agai. Da bitsintaꞌ ini da agam yis agai utaꞌ angu i ampan tsiraꞌ maran da itangin agai yatangꞌ karabus. Mabi tuasarangan mani kupan angu da tanginda agai fadan, a? Imaꞌ, wasangꞌ u! Ribarangan runggan naba da nayu aga nawaꞌ.”

38 Da garam bruꞌ uts ruas ini nan Paulus nidan igi da garam raruda nan ruas, da gubuꞌ ribaranga ringanta gin bida Paulus da Sailas igi garam Rom da tuasarangan irat. 39 Ibinigi da garam raruda nan ruas iba ungar karabus da igampun ruan da rib iruꞌ igi da iyu iwaꞌ ba da igut i tuasarangan i tanginda gamp igi rai. 40 Gubuꞌ Paulus da Sailas waꞌa sinungꞌ karabus sib, da ifa Lidia ungaran da irut rib muarutsan fain impruꞌ ruan nigi, da ifai nan gin i rumuntida babampaf i nanggan muarutsan. Da rib iruꞌ igi itangin gamp igi rai da ifan.