2
Yisu Itip Garam Urungun Gruꞌa Ruan
(Matiu 9:1-8; Lukas 5:17-26)
1 Gubuꞌ fain ifa sib da Yisu itip iba gamp Kapenaum, da ampan santan iringantin i Arangan bampada ungaran mpada gin sib. 2 Garam ampi bingan impruꞌ ruan ungar Arangan mpada gin, da mumai ungar wasaꞌ isisungꞌ ifasangꞌ muantsi manaꞌ. Da Yisu ifis i Anutu nanggan da ampan igi. 3 Da garam fain iyu garam mangan urungun gruꞌa ruan iba da Yisu da garam iruꞌ da iruꞌ ibuaringꞌ arangan. 4 Bawaꞌan, da garam isisungꞌ da imami ruan angu i fasuda uts da Yisu. Ibinigi da iyu garam arangan iyab ungar gudzun da itawaꞌ ungar gudzun*iyu garam arangan iyab ungar gudzun da itawaꞌ ungar gudzun — Garam Israil ungar gudzunggan itangaf ruan angu da itip mumai mpada gin imingꞌ ungar gudzun wagungꞌ. Itip ungar gudzun i intap gur. Itai da ibabampaf ibi brik, da yamits i ungar gudzun isangꞌ yunga gin. intuang Yisu gan muntida gin. Da gubuꞌ branga sib da itatangin garam urungun gruꞌa ruan igi impruꞌ da rabiꞌ gan iruꞌ. 5 Gubuꞌ Yisu tsanganda ribarangan nanggan muarutsan igi, da ini da garam urungun gruꞌa ruan ini binaꞌ, “Narungꞌ, dzi siat u nanggam maisan rai.”
6 Da garam gudzupuꞌ i nan faidagin fain mpadan nigi iringantin da ini angu i wangunggan, 7 “Ibianungꞌ da garam ani ini nan mais ibiani? Itsarif runggan i uda Anutu mumai gan! Anutu runtaꞌ angu isangꞌ i siata nam maisan.”
8 Sung angu da Yisu itsangan ribarangan uwayantan maran furan igi ratar da ini rutin, “Ibianungꞌ da agam maram ifur nan bida nigi imingꞌ gam wangunggam? 9 Nan idzuwai arigi ibarabin iyus i dzi nidan da garam urungun gruꞌa ruan igi, bida dzi nida, ‘Dzi siat u nanggam maisan rai,’ ma ‘Wauriꞌ da wayu rabiꞌ gam da wafan’? 10 Da bitsintaꞌ aruani da dzi ni agam sruꞌa gin bida Garam Narunggan isu wain i siata nam maisan rai mingꞌa intap.” Da Yisu ini da garam urungun gruꞌa ruan igi, 11 “Dzi nani da agu, wauriꞌ da wayu rabiꞌ gam da wafa gampam.” 12 Sung angu da garam urungun gruꞌa ruan igi yuriꞌ iyab da iyu rabiꞌ gan da iyung iwaꞌ wasaꞌ i ampan santan igi maran. Da rib santan igi irunt fafun gin da itsarif Anutu da ini, “Aga watsangan nam mangan bida ani mungꞌ u!”
Yisu Inuꞌ Liwai
(Matiu 9:9-13; Lukas 5:27-32)
13 Da Yisu itip iwaꞌ ifa mpu fuꞌ Galili ringan da garam utup tsiraꞌ bingan ifa da Arangan, da Arangan ifis i nan rutin. 14 Da Yisu ruyung ifan da itsangan Alfius narunggan Liwai impa mumai uda takis in. Da ini da arangan ini binaꞌ, “Watsungꞌ dzi.” Da Liwai yuriꞌ da itangin guman rai da yatsungꞌ Yisu.
15 Raiyi da Yisu irut riban atsungꞌa gin iga nam impruꞌ da garam nanga asub da garam uda takis ampi bingan impai imingꞌ Liwai ungaran, i garam ruampi bingan yatsungꞌ Arangan. 16 Da garam gudzupuꞌ i nan faidagin fain mingꞌa utup Farisai†Farisai — Rib Farisai igi da garam Yuda utupan tsiraꞌ mangan mpada tayangꞌ sanaban tsarifa Anutu. Da nanggan fisa gin ini garam Yuda atsungꞌa Moses Nanggan Faidagin mpruꞌa da tafan rusan uwayantan ugu rururungan angu. Ibinigi da ribarangan itsarif runggan da iraru rib mamida atsungꞌa ribarangan sanaban. Bingan Farisai igi wainggan ibi ‘rib mamida ruta rib fain mpruꞌa ruan.’ itsangan Yisu gada nam mpruꞌan da ribigi, da igut i Arangan riban atsungꞌa gin ini binaꞌ, “Wain ibianungꞌ da arangan iga nam impruꞌ da garam uda takis da garam nanga asub?”
17 Yisu ringanta gin da ini da ribarangan, “Garam mamida i gingꞌa rinin wasangꞌ i fadan da dudaꞌ u, imaꞌ, garam gingꞌa rinin angu. Dzi anungꞌ iba i nuꞌa rib rururungan u, imaꞌ; dzi ba i nuꞌa garam nanga nam maisan.”Mt 9:12-13; Lk 5:31-32
Nan Paꞌa Ruan i Nam Gadan
(Matiu 9:14-17; Lukas 5:33-39)
18 Gubuꞌ mangan da Yowanis Ruruba Garam riban atsungꞌa gin da utup Farisai ipaꞌ ruan i nam gadan. Da garam fain iba da igut i Yisu ibiani, “Yowanis riban atsungꞌa gin da rib Farisai garaman atsungꞌa gin ipaꞌ ruan i nam gadan, da ibianungꞌ da u ribam atsungꞌa i agu wapaꞌ ruan i nam gadan u?”
19 Da Yisu ini da ribarangan, “Amaꞌ, garam bungꞌ uda finin ampi gan waꞌan igi isangꞌ i paꞌa ruan i nam gadan da gubuꞌ aru arangan mpada mpruꞌan igi? Imaꞌ! Gubuꞌ garam uda finin igi ruruta ribarangan mpadan, da wasangꞌ i paꞌa ruan i nam gadan u. 20 Da bitsintaꞌ gubuꞌ mangan bungꞌ awaꞌ i uda garam uda finin igi sinungꞌ riban, da gubuꞌ arigi da ribarangan bungꞌ apaꞌ ruan i nam gadan.
21 “Manga anungꞌ isangꞌ i uda bruꞌ faꞌ mamida i nunda i ruan marafaingꞌ isiꞌ mangan da ntanga fada ngarukui ratar u. Bida nanga bida nigi, da bruꞌ faꞌ igi bungꞌ anun i ruan da bungꞌ atus ruan sinungꞌ ngarukui ratar, da garida ruan bungꞌ asu tsiraꞌ. 22 Da manga anungꞌ isangꞌ i yatsa wain gurun faꞌ ruꞌa apu rini gangan ratar ranguda wain gurun gin u. Bida u nanga bida nigi da wain gurun faꞌ nampanggan bungꞌ anang da apu rini gangan ratar igi bungꞌ aitsiar ruan, i gangan igi wasangꞌ i suda tsiraꞌ. Da nigi bungꞌ awaya wain gurun nampruꞌ da apu rini gangan. Imaꞌ, garam inang da irangu wain gurun faꞌ iruꞌ apu rini gangan faꞌ angu.”
Garam Narunggan Isu Wain i Gubuꞌ Sabat
(Matiu 12:1-8; Lukas 6:1-5)
23 Gubuꞌ Sabat mangan da Yisu irut riban atsungꞌa gin iyung gum wit wasaꞌ, da riban atsungꞌa gin ituru wit nidzun fain i gadan. 24 Da rib Farisai ini da Arangan ibiani, “Mai! Ibianungꞌ da u ribam atsungꞌa i agu yis nan faidagin udziꞌ i nanga gum suruda wit da gubuꞌ Sabat?”
25 Da Yisu ini binaꞌ, “Agam ini nan ibi agam mamida i farisa nan i nam Tafit da riban ruta arangan nangan da gubuꞌ ribarangan mangits rutan da sauda nam gadan ugu. 26 I gubuꞌ aru Abiatar nanga gum bida garam pumuꞌa Anutu wain gudzunggan tsiraꞌ ugu da Tafit yatangꞌ Anutu ungaran‡Anutu ungaran — Tafit yatangꞌ ungar Moses tipa i apu rini gangan suda Anutu ungaran. Ungar igi binganggan “tabernakel.” Raiyi da Tafit narunggan Solomon itip Ungar Mararam i tauf. da iyu bret tsarada suda mararam da igan, da irim fain da gan garaman iga impruꞌ. Nam gadan igi garam pumuꞌa Anutu wain ruas runggan angu gan gadan da Anutu nanggan faidagin ipaꞌ nan i garam utaꞌ anungꞌ gadan u.”1Sa 21:1-6; Mt 12:3-4; Lk 6:3-4
27 Da Yisu ini da ribigi ibiani, “Anutu itangin gubuꞌ Sabat i rima garam gar sib. Anungꞌ itangin garam gar i suda pumuꞌan da gubuꞌ Sabat u. 28 Ibinigi da Garam Narunggan isu wain i gubuꞌ Sabat impruꞌ da nam santan.”
*2:4: iyu garam arangan iyab ungar gudzun da itawaꞌ ungar gudzun — Garam Israil ungar gudzunggan itangaf ruan angu da itip mumai mpada gin imingꞌ ungar gudzun wagungꞌ. Itip ungar gudzun i intap gur. Itai da ibabampaf ibi brik, da yamits i ungar gudzun isangꞌ yunga gin.
†2:16: Farisai — Rib Farisai igi da garam Yuda utupan tsiraꞌ mangan mpada tayangꞌ sanaban tsarifa Anutu. Da nanggan fisa gin ini garam Yuda atsungꞌa Moses Nanggan Faidagin mpruꞌa da tafan rusan uwayantan ugu rururungan angu. Ibinigi da ribarangan itsarif runggan da iraru rib mamida atsungꞌa ribarangan sanaban. Bingan Farisai igi wainggan ibi ‘rib mamida ruta rib fain mpruꞌa ruan.’
2:17: Mt 9:12-13; Lk 5:31-32
‡2:26: Anutu ungaran — Tafit yatangꞌ ungar Moses tipa i apu rini gangan suda Anutu ungaran. Ungar igi binganggan “tabernakel.” Raiyi da Tafit narunggan Solomon itip Ungar Mararam i tauf.
2:26: 1Sa 21:1-6; Mt 12:3-4; Lk 6:3-4