14
Yisasi Ma Vei Eyo Iyampon Kayo Ará Kusiantan Baya Sein Mino
“Tiretí ankan ída vá kokhon ineine ureya ará uman diya vá bano. Tiyarafenurá ma mumunan ukhan te vá mai sentá bá dere vá mumunan ono. Tifóen amápin kokhon karafaran bákái siretí ankani varu mo funtáantano van mi séi oronté umpo ída máan tukharé intí téi ma vaya siretin tiamen nunaren mino. * Yon 12:26Téi ma siretí ankani varu ma mo funtáádaré maé ovaráné eré tiretin e avirékuya sen má oreya séi ma varuna varurá tireti má o van nono. O van nompo séi ma orono van iyaruna mai varufá ma orikhein mai aa inka sireti afová ukha ono.”
Yisasi Maen Be Afóe Vaípá Ma Orikhein Aa Ino
Máa síkan Tomasi véin inaemí, “Bafan noe, setí ankan ída afová ukhé umpo éi intefasá oriya vae. Intesá urerá tetí ankan mai aa afová onte rafuno.”
* Yon 11:25; Rom 5:1-2Máa síkan Yisasi evaránen béin tiamemí, “Téi anan aa váké pura vayai ana váké inká ayun ma fara van oriyan ban aunan mi vá uno. Mana vanta ano ída kanaíeya ena aa sáké oriareya Sifóe vaípá orin nompo séin pinté uaren anan orin nono. * Yon 8:19Tiretí ankan ma séin pura se afová ukharé inteya mai Sifóen má kanaíeya afová inonaren mino. Taréan araí eya Sifóen afová e véin one ono.”
Máa síkan Firipi semí, “Bafan noe, e Afóen aní esí ma onékun mai anan kanaí inten mino.”
* Yon 12:45; Kor 1:15; Ibu 1:3Máa síkan Yisasi véin tiamemí, “Firipi oe, ayá damúi séi siretí ankan má bákeya ompo éi ídá téin afová ukhe fono. Banasi ano ma séin toniyain mai Sifóen mi oniyan mifo éi fará e Afóen aní ono siya fono. 10  * Yon 12:49Téi Sifóempin bákun inká Tifóe ano séimpin ban ukhen mifo éi ídá mumunan iya fono. Tesi ineine fintesa séi siretí ankan baya siamiya rauno. Ída ino. Sifóe ma sempin bain manon téin pinté uaren mi vei yorarí é iyan mino. 11  * Yon 10:38Tifóe ma sempin bá ma séi véimpin ma varuna mairasá mumunan inompo ída ma mumunan inteya mai ma minó doran ma séi variyáku oniyaona mairasá mumunan ono.
12  * Mak 16:19-20“Téi fura siré tiretí ankan tiamiyá uno. Téintá ma mumunan inain mano sen ma yoriyáeruna yoran manáa esantaren doranten mino. Para vara seyo, séi se Sifóe vaípái oronté uno. 13  * Mat 7:7; Yon 15:16Tiretí ankan ma minó dana san ma sen tivíká inantesí maé mai yanasí kasaé uantanté uno. Para vara seyo, ve Anin mano ma mai yorarí inaintá be Afóe ano kákan bí baranten mino. 14 Tiretí ankan ma minó dana san ma sen tivíká ma inaesí téi mai yanasí kasaé uantanté uno.
Yisasi Ma Kantá Aunan Tiantantin Eran Nain Nan Ma Iyáantein Baya Ino
15  * Yon 15:10; 1Yn 5:3“Tiretí ankan ma sen nan anunu inteya vá minó tenti vaya ánain ná kamaeya vákurono. 16  * Yon 14:26; 15:26; 16:7Bákuriya sirá Tifóen tékun ná ena siretin Ayain amintin ná mai ano siretí ankan má ena ena van oriyan bano. 17  * Yon 16:13Mai Ayain maen pura vaya ana ma sin Aunan mino. Barará nanin banta ano ída kanaíen béin baren onen afová en inten mino. Mai fara vara seyo, siretí ankan má béi vákaya ven afová ukheona siretimpin mi vanten mino. 18 Téi ída me ifáékuya aso iyampon an dan nompo siretí ankan baonafá téi erenté uno. 19 Titó anantá barará nanin banta ano séin ída enádá tonanten mifo siretí ankan manan ten tonan nono. Téi saunan para vantí bákeya siretí ankan má aunan para vantiya van nono. 20  * Yon 17:21-23Téin ma furin pinte ma sivorantí e mantékuya maí damúi afová inono. Téi Sifóempin bákuya siretí ankan tempin baná téi siretimpin bá uno. 21 Tenti man baya ma mana ano ma iniren kamaen mai ánain dakhafin nain mai ano sen nan mi anunu iyan mino. Mana ano ma sen nan anunu intin te Sifóe ano venan anunu intí ten má dere véi nan tinunu uré teyan aní onté uno.”
22 Máa síkan Yudasi ano Yisasin máa sen inaemí, “Bafan noe, éi intesá eyá tetí ankan mana eyan aní ureyá barará nanin banta ída kanaí e aní inte fono.” (Yudas Iskarioti ena ifo ena eyo iyampon ma manaí ukhein bí dakhein manon inaen mino.)
23 Máa síkan Yisasi evaránen béin tiamemí, “Banta ano ma séin nan anunu uren tenti vaya ánain ma kamaen dakhafintin maen Tifóe ano mai vanta van anunu inten mino. Máan tintí berasan mai vanta vá o vá ena ena fara vá oriyá banté uno. 24  * Yon 7:16Téin nan ma ída anunu iyain banta anon tenti vaya ánain ída kamaen dakhafiyan mino. Tenti vaya ma iniyaona mai séin ma sisintá erikheruna Sifóeni vaya ino.
25 “Téi ma saréa siretí ankan má para varunarái ma yanasinta siamiyá uno. 26 Tiamiyá umpo siretí ankan ma ákonaen ayain nain mai Kantá Aunan mino. Téin tivíkái Sifóe ano véin tiantantin eriven tiretin minó daná afova amiren ineine orun mantaantantiyai minó baya ma séi siretí ankan tiamiyáeruna van ovare me ineine inono. 27 Téi siretí ankan me afa uré orono van mi ará kusin tiretin ameruna mai anon tiretin má banten mino. Barará nanin banta ano ma amiyainí ukhein ará kusin na séi ame raumpo siretí ankan ída vá ará uman dare akhokho van ono.
28  * Yon 20:17Tiretí ankan me ampiré orikharé maé ovaráné erenté uno sé pefái siamékuya inikha ompo séin nan ma fura se anunu iyanteya mai siretí amusin ná ono. Para vara seyo, mai ma séin esantakhein Tifóe vaípái oronté uno. 29  * Yon 13:19Mai yanasinta ída afoká ukhái saréa o útúbé tiamiyaruna ínaimpá ma afoká intiyan mumunan inono. 30 Téi ída siretí ankan má ayáká baya senté uno. Mai fara vara seyo, ma varará ma yafíkein ánon banta ano eriyan mino. Béimpin ída mana ákona vain téin ída mana avúavasí me usintanten mino. 31 Máan tinten mifo Sifóe ano ma sisimein danasintan téi variyákéi se Sifóen nan ma moéké tinunu iyaruna mai varará nanin banta ano afová ino van muno. Inka ifo erí oró tifano.”

*14:3: Yon 12:26

*14:6: Yon 11:25; Rom 5:1-2

*14:7: Yon 8:19

*14:9: Yon 12:45; Kor 1:15; Ibu 1:3

*14:10: Yon 12:49

*14:11: Yon 10:38

*14:12: Mak 16:19-20

*14:13: Mat 7:7; Yon 15:16

*14:15: Yon 15:10; 1Yn 5:3

*14:16: Yon 14:26; 15:26; 16:7

*14:17: Yon 16:13

*14:20: Yon 17:21-23

*14:24: Yon 7:16

*14:28: Yon 20:17

*14:29: Yon 13:19