2
ܟܐܦܐ ܚܝܐ ܘܐܘܡܬܐ ܓܘܒܝܬܐ
1 ܒܵܣ ܪܲܦܹܝܡܘܼܢ ܡܸܢܵܘܟ݂ܘܿܢ ܟܠܵܗ̇ ܒܝܼܫܘܼܬܵܐ، ܘܟܠܹܗ ܦܸܠܡܵܐ، ܘܡܲܫܦܲܪܬܵܐ، ܘܒܲܚܸܠܵܢܘܼܬܵܐ ܘܟܠܔ ܗܹܡܸܙܡܵܢ ܕܲܠܩܘܼܒ݂ܠܔ ܕܐܢܵܫܹ̈ܐ. 2 ܐܲܝܟ݂ ܝܲܠܘܼܕܹ̈ܐ ܙܥܘܿܪܹ̈ܐ ܬܵܙܵܐ ܗܘܝܼܹܐ، ܫܲܗܘܸܬܘܼܢ ܠܗܹܡܸܙܡܵܢ ܐܲܝܟ݂ ܕܠܚܲܠܒ݂ܵܐ ܨܸܦܝܵܐ ܕܒܝܼܹܗ ܓܲܪܘܸܣܝܼܬܘܿܢ ܠܦܘܼܪܩܵܢܵܐ، 3 ܐܸܢ ܛܥܝܼܡ ܠܵܘܟ݂ܘܿܢ ܕܛܵܒ݂ܵܐ ܝܠܹܗ ܡܵܪܝܵܐ. 4 ܗ̇ܘ ܕܠܟܸܣܠܹܗ ܩܲܪܒܘܼܢܹܐ ܝܬܘܿܢ، ܗ݁ܘ ܕܝܼܠܹܗ ܟܹܐܦܵܐ ܚܵܝܵܐ، ܡܘܼܣܠܝܼܵܐ ܡ̣ܢ ܒܢܲܝ̈ܢܵܫܵܐ ܐܝܼܢܵܐ ܓܘܼܒܝܵܐ ܘܡܵܪܹܐ ܛܝܼܡܵܐ ܠܟܸܣ ܐܲܠܵܗܵܐ. 5 ܗܵܕܟ݂ܵܐ ܐܘܼܦ ܐܲܚܬܘܿܢ، ܐܲܝܟ݂ ܟܹܐܦܹ̈ܐ ܚܵܝܹ̈ܐ، ܦܝܼܫܹܐ ܝܬܘܿܢ ܒܸܢܝܹܐ ܒܲܝܬܵܐ ܪܘܼܚܵܢܵܝܵܐ ܕܗܵܘܹܝܬܘܿܢ ܟܵܗܢܘܼܬܵܐ ܩܲܕܝܼܫܬܵܐ، ܡܲܩܪܘܼܒܹܐ ܕܸܒ݂ܚܹ̈ܐ ܪ̈ܘܼܚܵܢܵܝܹܐ ܩܘܼܒܠܹܐ ܠܟܸܣ ܐܲܠܵܗܵܐ ܒܝܲܕ ܝܼܫܘܿܥ ܡܫܝܼܚܵܐ. 6 ܣܵܒܵܒ ܟܬܝܼܒ݂ܵܐ ܝܠܹܗ ܓܵܘ ܟܬܵܒ݂ܵܐ ܩܲܕܝܼܫܵܐ:
ܚܙܹܝܡܘܼܢ، ܡܲܬܘܼܒܹܐ ܝܘܸܢ ܟܹܐܦܵܐ ܓܵܘ ܨܸܗܝܘܿܢ، ܟܹܐܦܵܐ ܕܩܘܼܪܢܝܼܬܵܐ ܓܘܼܒܝܵܐ ܘܛܝܼܡܵܢܵܐ، ܘܡ̇ܢ ܕܗܲܡܸܢ ܒܝܼܹܗ ܗܸܟ̃ ܠܹܐ ܢܵܟܹܦ.✡ܐܫܥܝܐ 28:16 7 ܒܵܣ ܐܸܠܵܘܟ݂ܘܿܢ، ܐܲܚܬܘܿܢ ܕܗܲܡܘܼܢܹܐ ܝܬܘܿܢ، ܐܵܗܵܐ ܟܹܐܦܵܐ ܛܝܼܡܵܢܵܐ ܝܠܹܗ، ܐܝܼܢܵܐ ܩܵܐ ܐܵܢܝܼ ܕܠܹܐ ܗܲܡܸܢܝܼ:
ܟܹܐܦܵܐ ܕܡܘܼܣܠܹܐ ܠܗܘܿܢ ܒܲܢܵܝܹ̈ܐ، ܗܘܹܐ ܠܹܗ ܠܪܹܝܫ ܩܘܼܪܢܝܼܬܵܐ.✡ܡܙܡܘܪܐ 118:22
8 ܟܹܐܦܵܐ ܕܬܲܪܩܲܠܬܵܐ، ܘܩܵܝܵܐ ܕܢܦܵܠܬܵܐܐܫܥܝܐ 8:14 .
ܟܹܐ ܬܲܪܩܸܠܝܼ ܣܵܒܵܒ ܠܹܐ ܡܲܨܝܸܬܝܼ ܠܗܹܡܸܙܡܵܢ، ܐܘܼܦ ܠܐܵܗܵܐ ܢܝܼܫܵܐ ܦܝܼܫܹܐ ܝܗܘܵܘ ܪܫܝܼܡܹܐ. 9 ܐܝܼܢܵܐ ܐܲܚܬܘܿܢ ܝܼܬܘܿܢ ܫܲܪܒܬܵܐ ܓܘܼܒܝܼܬܵܐ، ܟܵܗܢܘܼܬܵܐ ܡܲܠܟܵܝܬܵܐ، ܐܘܼܡܬܵܐ ܩܲܕܝܼܫܬܵܐ، ܛܵܝܸܦܵܐ ܕܐܲܠܵܗܵܐ، ܕܡܲܕܥܝܼܬܘܿܢ ܬܸܫܒܘܿܚܝܵܬܹ̈ܐ ܕܗ̇ܘ ܕܩܲܡ ܩܵܪܹܐ ܠܵܘܟ݂ܘܿܢ ܡ̣ܢ ܚܸܫܟܵܐ ܠܒܲܗܪܹܗ ܡܲܥܓ̰ܸܒܵܢܵܐ. 10 ܒܚܕܵܐ ܥܕܵܢܵܐ ܠܹܐ ܝܬܘܿܢ ܗܘܵܘ ܛܵܝܸܦܵܐ، ܐܝܼܢܵܐ ܐܵܕܝܼܵܐ ܛܵܝܸܦܵܐ ܕܐܲܠܵܗܵܐ ܝܬܘܿܢ؛ ܒܚܕܵܐ ܥܕܵܢܵܐ ܠܵܐ ܩܘܼܒܸܠܔ ܠܵܘܟ݂ܘܿܢ ܪ̈ܲܚܡܹܐ، ܐܝܼܢܵܐ ܐܵܕܝܼܵܐ ܩܘܼܒܸܠܔ ܠܵܘܟ݂ܘܿܢ ܪ̈ܲܚܡܹܐ.
ܚܝܡܘܢ ܐܝܟ݂ ܪ̈ܓܘܬܐ ܕܐܠܗܐ
11 ܡܘܼܚܸܒܝܼ̈، ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܕܐܲܝܟ݂ ܬܵܘܬܵܒܹ̈ܐ ܘܢܘܼܟ݂ܪ̈ܵܝܹܐ ܕܵܒ݂ܩܝܼܬܘܿܢ ܓܵܢܵܘܟ݂ܘܿܢ ܡ̣ܢ ܫܲܗܘܲܬܝܵܬܹ̈ܐ ܕܦܲܓ݂ܪܵܐ ܕܟܹܐ ܦܵܠܫܝܼ ܕܲܠܩܘܼܒ݂ܠܔ ܕܓܵܢܵܐ. 12 ܚܹܝܡܘܼܢ ܚܲܝܹ̈ܐ ܫܲܦܝܼܪܹ̈ܐ ܓܵܘ ܐܸܡܘܵܬܹ̈ܐ، ܗܵܕܵܐ ܕܐܘܼܦ ܐܸܢ ܗܲܡܙܸܡܝܼ ܕܲܠܩܘܼܒ݂ܠܵܘܟ݂ܘܿܢ ܐܲܝܟ݂ ܕܝܼܬܘܿܢ ܐܢܵܫܹ̈ܐ ܥܵܒ݂ܕܵܢܹ̈ܐ ܕܒܝܼܫܵܬܹ̈ܐ، ܒܸܬ ܚܵܙܝܼ ܦܘܼܠܚܵܢܵܘ̈ܟ݂ܘܿܢ ܛܵܒܹ̈ܐ ܘܫܲܒܚܝܼ ܠܐܲܠܵܗܵܐ ܒܝܵܘܡܵܐ ܕܣܲܚܒܲܪܬܵܐ. 13 ܗܘܹܝܡܘܼܢ ܙܲܒܛ ܠܟܠܔ ܦܘܼܩܕܵܢܵܐ ܕܒܢܲܝ̈ܢܵܫܵܐ ܒܘܼܬ ܚܵܬܸܪ ܕܡܵܪܝܵܐ، ܝܲܢ ܠܡܲܠܟܵܐ ܣܵܒܵܒ ܝܼܠܹܗ ܪܹܝܫܵܐ ܥܸܠܵܝܵܐ، 14 ܝܲܢ ܠܫܲܠܝܼ̈ܛܹܐ ܕܝܼܢܵܐ ܦܝܼܫܹܐ ܫܘܼܕܪܹܐ ܒܝܼܹܗ ܠܬܲܥܠܘܼܡܹܐ ܠܐܵܢܝܼ ܕܥܵܒ݂ܕܝܼ ܒܝܼܫܵܬܹ̈ܐ ܘܠܸܚܩܵܪܵܐ ܠܐܵܢܝܼ ܕܥܵܒ݂ܕܝܼ ܛܵܒ݂ܵܬܹ̈ܐ. 15 ܣܵܒܵܒ ܗܵܕܟ݂ܵܐ ܝܠܹܗ ܨܸܒ݂ܝܵܢܵܐ ܕܐܲܠܵܗܵܐ ܕܒܝܲܕ ܦܘܼܠܚܵܢܵܘ̈ܟ݂ܘܿܢ ܛܵܒܹ̈ܐ ܡܲܫܬܸܩܝܼܬܘܿܢ ܣܲܟ݂ܠܘܼܬܵܐ ܕܐܢܵܫܹ̈ܐ ܠܵܐ ܦܲܪ̈ܡܝܼܵܢܹܐ. 16 ܗܘܹܝܡܘܼܢ ܐܲܝܟ݂ ܚܹܐܪܹ̈ܐ، ܐܝܼܢܵܐ ܠܵܐ ܡܲܦܠܸܚܝܼܬܘܿܢ ܚܹܐܪܘܼܬܵܘܟ݂ܘܿܢ ܐܲܝܟ݂ ܚܕܵܐ ܟܲܣܲܝܬܵܐ ܠܒܝܼܫܘܼܬܵܐ، ܐܸܠܵܐ ܚܹܝܡܘܼܢ ܐܲܝܟ݂ ܪܹ̈ܓܵܘܵܬܹܐ ܕܐܲܠܵܗܵܐ. 17 ܡܝܲܩܪܘܼܢ ܠܟܠܵܝܗܝ ܐܢܵܫܹ̈ܐ. ܡܲܚܸܒܘܼܢ ܠܐܲܚܘܿܢܘܼܬܵܐ. ܙܕܹܥܡܘܼܢ ܡ̣ܢ ܐܲܠܵܗܵܐ. ܡܝܲܩܪܘܼܢ ܠܡܲܠܟܵܐ. 18 ܪܹ̈ܓܵܘܵܬܹܐ، ܫܠܘܿܡܘܼܢ ܠܡܵܪ̈ܵܘܵܬܵܘܟ݂ܘܿܢ ܒܟܠܔ ܐܝܼܩܵܪܵܐ، ܠܵܐ ܐܲܚܟ̰ܝܼ ܠܐܵܢܝܼ ܕܝܼܢܵܐ ܛܵܒܹ̈ܐ ܘܡܲܟܝܼܟܹ̈ܐ، ܐܝܼܢܵܐ ܐܘܼܦ ܠܐܵܢܝܼ ܕܝܼܢܵܐ ܩܸܫܝܹ̈ܐ. 19 ܣܵܒܵܒ ܐܝܼܩܵܪܵܐ ܝܠܹܗ، ܐܸܢ ܚܲܕ ܐܢܵܫܵܐ ܒܘܼܬ ܚܵܬܸܪ ܕܐܸܢܝܲܬܹܗ ܠܟܸܣ ܐܲܠܵܗܵܐ ܩܲܒܸܠܔ ܓ̰ܘܼܢܓ̰ܵܪܵܐ ܒܢܵܗܵܩܘܼܬܵܐ. 20 ܣܵܒܵܒ ܐܲܝܟܵܐ ܝܠܹܗ ܚܸܩܪܵܐ ܐܸܢ ܟܲܕ ܚܸܛܝܹܐ ܝܬܘܿܢ ܘܦܝܼܫܹܐ ܝܬܘܿܢ ܬܘܼܥܠܸܡܹܐ ܘܩܲܒܠܝܼܬܘܿܢ ܠܵܗ̇ ܒܚܡܵܠܬܵܐ؟ ܐܝܼܢܵܐ ܐܸܢ ܓ̰ܲܢܓ̰ܸܪܝܼܬܘܿܢ ܒܘܼܬ ܦܘܼܠܚܵܢܵܐ ܛܵܒ݂ܵܐ ܘܚܵܡܠܝܼܬܘܿܢ، ܐܵܗܵܐ ܩܒܝܼܠܬܵܐ ܝܠܵܗ̇ ܠܟܸܣ ܐܲܠܵܗܵܐ. 21 ܣܵܒܵܒ ܠܐܵܗܵܐ ܦܝܼܫ ܠܵܘܟ݂ܘܿܢ ܩܸܪܝܹܐ، ܣܵܒܵܒ ܐܘܼܦ ܡܫܝܼܚܵܐ ܩܘܼܒܸܠܔ ܠܹܗ ܚܲܫܵܐ ܒܘܼܬ ܕܝܼܵܘܟ݂ܘܿܢ، ܘܫܒ݂ܝܼܩ ܠܹܗ ܐܸܠܵܘܟ݂ܘܿܢ ܛܘܼܦ̮ܣܵܐ ܕܬܵܒܥܝܼܬܘܿܢ ܠܦܵܣܘܿܥܝܵܬܘܼ̈ܗܝ.
22 ܗ̇ܘ ܠܵܐ ܥܒ݂ܝܼܕ ܠܹܗ ܚܛܝܼܬܵܐ، ܘܠܵܐ ܦܸܠܡܵܐ ܦܝܼܫ ܠܹܗ ܡܫ݇ܟ̰ܝܼܚܵܐ ܒܦܘܼܡܹܗ.✡ܐܫܥܝܐ 53:9 23 ܠܵܐ ܡܘܼܣܠܹܐ ܠܹܗ ܐܝܼܡܲܢ ܕܦܝܼܫ ܠܹܗ ܡܘܼܣܠܝܼܵܐ؛ ܠܵܐ ܒܥܹܐ ܠܹܗ ܕܫܵܩܹܠܔ ܬܘܼܥܠܵܐ ܐܝܼܡܲܢ ܕܦܝܼܫ ܠܹܗ ܓ̰ܘܼܢܓ̰ܸܪܵܐ؛ ܐܸܠܵܐ ܣܘܼܦܝܵܐ ܠܹܗ ܓܵܢܹܗ ܒܗ̇ܘ ܕܟܹܐ ܕܵܐܹܢ ܒܙܲܕܝܼܩܘܼܬܵܐ.✡ܐܫܥܝܐ 53:7 24 ܗ̇ܘ ܒܓܵܢܹܗ ܛܥܝܼܢܹܗ ܚܛܝܼܵܬܲܢ̈ ܒܦܲܓ݂ܪܹܗ ܥܲܠܔ ܙܩܝܼܦܵܐ، ܕܐܲܚܢܲܢ ܡܵܝܬܲܚ ܠܚܛܝܼܵܬܹ̈ܐ ܘܚܵܝܲܚ ܠܙܲܕܝܼܩܘܼܬܵܐ، ܣܵܒܵܒ ܒܕܲܪ̈ܒܵܬܘܼܗܝ ܦܝܼܫܹܐ ܝܬܘܿܢ ܒܣܝܼܡܹܐ. 25 ܣܵܒܵܒ ܐܲܝܟ݂ ܥܸܪ̈ܒܹܐ ܛܠܝܼܩܹ̈ܐ ܝܬܘܿܢ ܗܘܵܘ، ܐܝܼܢܵܐ ܐܵܕܝܼܵܐ ܕܝܼܪܵܘܟ݂ܘܿܢ ܠܟܸܣ ܪܵܥܝܵܐ ܘܬܲܓܒܸܪܵܢܵܐ ܕܓܵܢܵܬܵܘ̈ܟ݂ܘܿܢ.