1 Ipaꞌ pendegawa afaꞌ wandaꞌ maol Kraisi ugumafi basef endilisfi Godi fowaꞌ fape fandambahiꞌii deiꞌ fataga fandawalap alihif.*Lu 12:42; Ta 1:7 2 Iꞌi aman dembinai nosoꞌana maol anin epena nigimafian, anin nimafian nindaꞌan datima andeandeꞌ hiꞌindalan. 3 Iꞌi ipaꞌ pewaloga waf aeꞌafi ma anis daias sondaꞌme kot sowaloga waf aeꞌafi, aeꞌ okom mopoma amamba falafumi atom. Aeꞌ wapani aeꞌ atowe ina awaloga waf aeꞌafi, owaꞌ.*Sam 143:2 4 Endilisi, malogol gagape opaf aeꞌafi nomoni aeꞌ ina ameꞌ anef waf awafi andaꞌafi, owaꞌ. Apaꞌ isimba ina sihimbaꞌme endilisi ma igaꞌi, “Aeꞌ epen usiꞌiwi hililiꞌi”, owaꞌatin. Aman dembinai jas nogawaloga aeꞌi, Dembinai atona.*1 Ko 3:8 5 Eaꞌ deiꞌ nogota dondoꞌatai ataꞌ owaꞌ ma, ipaꞌ owaꞌi pewawaloga waf anin epen daiana. Ipaꞌ ataꞌ pepe pehafa nemaf afamba Dembinai nugafiꞌafii. Anaf anen nofaꞌi hiahaom hiami mandamabahoꞌ magape akoti motaga mondawalap hauguma nogogalaꞌma. Nemaf afamba anen nowalapa ukup epes hiasi pape pandambahiꞌi petaga pindawalap alihigima. Eaꞌ God niꞌipapa basef ananifi apaꞌ hiapai hiꞌilapa atona atin dondoꞌ ma maol apaꞌ mandaꞌ ani, boꞌwen aꞌa awen.*Ro 12:3

6 Alipipai, aeꞌ okom mandandaꞌ maꞌi etopalopepa. Isimba atis aeꞌi Apolos wihimbaꞌmepa basef ifimba dokoꞌ agaꞌipipafi kofagefa ma waf afaꞌifi. Afaꞌ wandaꞌas naꞌamba ma ipaꞌ pegelafa waf apeꞌifi basef ifimba kofagefa faꞌias fagaꞌi, “Ipaꞌ ina pimbisilaꞌ muꞌuli inimba, owaꞌi.”

Eaꞌ deiꞌ ipaꞌ ina pendaꞌ duꞌwaniga pesaꞌma agola anona daiana, owaꞌi.*Ro 12:6 7 Alipipai, ipaꞌ pandaꞌas mama? Ami nandaꞌepa pape dembipai pikilaꞌ anis epes daias? Hiahawes isimba hiasi God atona naseꞌepas. Eaꞌ ipaꞌ ina pendaꞌ duꞌwaniga piꞌi ipaꞌ atipa dembipai banagipai, owaꞌi. Hiahawes isimba hiasi ipeꞌisi, God atona naseꞌepas.*Re 3:17,21

8 O ahoꞌ, opalef ipeꞌilifi asiꞌilif eaꞌ! Ipaꞌ hiahaom hiamipai asiꞌipa dondoꞌ! Ipaꞌ apikilaꞌafa pataga dembipai king! O uwahipipa! Aeꞌ okom maꞌi aꞌowaꞌ ma petaga pegape dembipai kinga atiasi ope dembifai king ogalomepa!*Ro 8:36; Hi 10:33 9 Aeꞌ okom mandandaꞌ naꞌamba aꞌi God nandaꞌ afaꞌ aposel siꞌi epes sape agof akasi sagagiꞌ endilisii. Epes hiasi hiꞌalas sagape ilif itapi saloma amom ensel wapani satolofa wandahama epes isimba atiasi sohas sogagaꞌi.*1 Ko 3:18 10 Afaꞌ wape siꞌi epes ukup pagasoꞌasi ma ogasaꞌma agol Kraisi, apaꞌ ipaꞌ pape epes gawaipai ma waf ananifi. Afaꞌ owaꞌ banagefaea, apaꞌ ipaꞌ banagepa eaꞌ. Ipaꞌ agof luꞌwagof, apaꞌ afaꞌ agof akafa.*2 Ko 11:23-27 11 Fowaꞌ gani wapani nafiꞌi nataga nogota ataꞌe wape nolomahafa a bambafugah fataugahifa aꞌowaꞌ, eaꞌ luwaguf mais akafa. Esis sindiwa lagof sahafa atin. Afaꞌ wambel akafa ma ofeꞌ ogape andeandeꞌ.*Ap 18:3; 1 Ko 9:14-15; 2 Te 3:8; Sam 109:28; Mt 5:44 12 Wandaꞌ maol numaꞌuni endilisi ma lagof afaꞌigufi atogof. Esis saꞌi basef sandaꞌafa findiwafa owaꞌ afaꞌ banagefa ofaloꞌmas wagwamasa basef buꞌwafi atif. Esis sandaꞌafa aofa, wape banagefa watitilis, afaꞌ ina wagwamas, owaꞌ.*Kra 3:45 13 Esis saꞌipafa basef awafi endilisi apaꞌ owaꞌ wagwamasa basef awanafi saꞌosaꞌombel. Wataga siꞌi alapita awasimi endilisi ma itap hiagoma siꞌi alogw gwagailasi, siꞌi itap sagafafaliꞌapi. Fowaꞌ gani wape naꞌamba atin wafiꞌi wataga deiꞌ.

14 Aeꞌ ina andaꞌ basef ifimba ma fendaꞌepa ambagof ipeꞌigufi awagof, owaꞌatin. Aeꞌ okom maimailipa siꞌi awasi aeꞌipai, aꞌi isalima nomonas ipeꞌisi.*Ga 4:19 15 Iꞌi endilisi ipaꞌ amom mogawalipipa basef Kraisi 10,000-pelaim eaꞌ hapaimi, apaꞌ ahapepa ina hiam, owaꞌ. Waf Krais Jisasi atef aeꞌ atowe ape ahamepa ipeꞌiwai, ipaꞌ pataga batawis aeꞌipai ma basef buꞌwafi Godi agawalipipafi.*1 Ko 11:1; Fl 3:17; 1 Te 1:6 16 Isimba atis deiꞌ afela ukup ipeꞌipi ma pigaila waf aeꞌafi pegafeꞌ.*Ap 19:22; Fl 3:17 17 Eaꞌ asapaꞌ Timoti nafeꞌmago ipaꞌ. Anen nogame aeꞌanai wandaꞌ maol Dembinaii. Anen nugumafi maol inimba datima andeandeꞌi. Aeꞌ okom mailana aꞌowaꞌ, deiꞌ asapaꞌana ma atiasi nogasaꞌma nomonas ipeꞌisi ma basefi feꞌ poe aeꞌasi agaila waf Kraisi. Aeꞌ agawalipa esis Kristen sios walemb anamba hiagoma ma basefi waf eaꞌ isimba atis.

18 Anipa ukup pandandaꞌ paꞌi aeꞌ bola daoꞌ efoꞌo eaꞌ pandaꞌ duꞌwaniga.*Ap 18:21 19 Apaꞌ owaꞌatin. Iꞌi Dembinai niꞌi ahoꞌai, daoꞌ efeꞌmago ipaꞌ kwafalis. Apaꞌ aeꞌ ina efeꞌmago ipaꞌma egegawa basef amam mandaꞌ duꞌwanigai mandaꞌafi atif, owaꞌ. Basef amamifi hapaifi. Aeꞌ aꞌi efoꞌo egawa wafi maol mais Godi amom mandaꞌasi.*1 Ko 2:4 20 Deiꞌ main, kofegama amamba ma epes isimba sugawisa maol Godi nope Dembinai nugumafias, amamba ina hiahaom mogaꞌian atini, owaꞌatin. Amamba ina basef atif, owaꞌ. Amamba banagami Godi atom. 21 Ipaꞌ ukup paꞌi waf mamahefa, paꞌi efaꞌago bumbulita okom wandafumi efoꞌo ma igasindiꞌamonepa, o paꞌi efaꞌago waf okom magamagailipafi saꞌombelifi efeꞌmepago? Isimba nomonas ipeꞌisi atis.