1 Ipaꞌ Kristen alipipai, afaꞌ waꞌi ataꞌ wiꞌipipago anif basef daif wapani. Ipaꞌ pendabetena Goda nogatopalopafa ma basef Dembinaii fendasauliꞌ fegafeꞌ kwafalis anamba hiagoma fegefaꞌ agol luꞌwagili siꞌi fowaꞌ nandaꞌam laꞌafena ipaꞌ.*1 Te 5:25 2 Ipaꞌ pendabetena afaꞌ ma God nogatagwahofa ma lagofa epes isimba awasi sandaꞌ waf awafii. Ipaꞌ pegawa epes hiasi ina deiꞌ sahapifa basef Godi, ataꞌ owaꞌ.*1 Te 5:24 3 Apaꞌ Dembinai naila basef ananifi andeandeꞌ nandaꞌ hiahawes ananisi datima ma nowaꞌ banagaipa numafipa ma aman aunai owaꞌ laꞌifinama nogahokola ipaꞌa.*2 Ko 7:16; Ga 5:10; 1 Te 4:10 4 Dembinai nasaꞌma ukup afaꞌipi eaꞌ deiꞌ ogawa ipaꞌ naꞌamba. Waf hiafi waꞌipipa ma pindaꞌafi, afamba ipaꞌ pendaꞌaf endilisi. Eaꞌ anaf wapani ina pindaiwaꞌmaf, owaꞌ. Pilaf pendaꞌaf atin. 5 Afaꞌ waꞌi Dembinai nisindiꞌamona opalef ipeꞌilifi ma pegegawa endilisi God okom maimailipa aꞌowaꞌ. Afaꞌ waꞌi nemaf afamba nimanimi mogatagamepa, pindalutu banagepa ma pepel Kraisi atom pendaꞌ waf fasifi atef.*Mt 18:17; Ro 16:17

6 Ipaꞌ Kristen alipipai, afaꞌ waꞌipipa dindinip naꞌamba ma agol Dembinai Jisas Kraisi. Iꞌi anis alipisi ipeꞌisi tol sope dowafa owaꞌ semeꞌ basef ifimba wagaꞌipasafi silifa, ipaꞌ pindihiꞌamas pekwahis.*Fl 3:17; 1 Te 1:6 7 Ipaꞌ pendegawa ma pigaila waf afaꞌifi. Fowaꞌ wape wagalomepa, ina tol wape dowadowaf, owaꞌ.*1 Te 2:9 8 Ina ofaꞌ gwaꞌaisi dowadowafa ipaꞌ, owaꞌatin. Watalis atin waꞌas. Eaꞌ wandaꞌ maol banagambel wandaꞌ ahifimi hiami aꞌowaꞌ owamb alipa ina wapoma ipaꞌ atipa pelagafa ogape, owaꞌ.*1 Ko 9:4; 1 Te 1:6 9 Afaꞌ wiꞌi ogofaꞌ gwaꞌaisi ma ipaꞌ, God naꞌi andeandeꞌma okom ananimi. Apaꞌ afaꞌ wandaiwaꞌma ogofaꞌ gwaꞌaisi ipeꞌisi, owaꞌ. Afaꞌ wandaꞌas naꞌamba ma pigati waf afaꞌ wandaꞌafi ma petelef pigailaf.*1 Te 4:11 10 Ipaꞌ pegawa fowaꞌ wape wagalomepa afaꞌ waseꞌepa muꞌuli naꞌamba. Naꞌi epen owaꞌ nendaꞌ maolia, ipaꞌ ina pefagaman peseꞌan anis gwaꞌaisi, owaꞌatin, hapaini.*1 Ti 5:13 11 Afaꞌ ina waꞌipipa naꞌamba dowaf, owaꞌ. Wameꞌ basefa anis sagape laꞌafena ipeꞌi ina sandaꞌ maol, owaꞌ. Tol sape dowaf. Esis sandapoma basef atom usiusihimi ma hiahaom anis daiasi atom.*1 Te 4:11 12 Agol Jisas Kraisi Dembinai apeꞌinai afaꞌ waꞌipipa dindinipa muꞌuli inimba ma epes isimba sagape dowafi, waꞌi osaꞌma nomonas asasisi ma sondaꞌ waf naꞌamba. Esis ataꞌ sope andeandeꞌma sondaꞌ maola sogatagama gwaꞌaisi asasisi atis deiꞌ.*Ga 6:9 13 Apaꞌ ipaꞌ Kristen alipipai, ipaꞌ ina alaꞌuta tehepa ma pendaꞌ waf buꞌwafi, owaꞌi.*1 Ko 5:9,11 14 Iꞌi anin epen owaꞌ nila basef ifimba hiafi afaꞌ wandaꞌafia, ipaꞌ pendegawa epen inimba andeandeꞌ. Eaꞌ pindihiꞌaman pepe laogona anin. Ama anin ambal aola waf ananifi. Deiꞌ main, anin ina naila basef afaꞌifi, owaꞌatin.*1 Te 5:14 15 Apaꞌ ina pefalan piꞌi bouni ipeꞌini, owaꞌi. Ukup pepoma anin siꞌi alipini eaꞌ piꞌipana negegawa waf afamba awafi ma negakwahef.*1 Te 5:23

16 Afaꞌ waꞌi Dembinai anen kofagonama opaf awenafi dondol nondaseꞌepa okom awanami ma mamahagoma ipaꞌ pepe pegafeꞌma. Afaꞌ waꞌi Dembinai nope nolomago ipaꞌ hipai.*1 Ko 16:21

17 Anen nandaꞌ basefi naseꞌe pen aeꞌ Pol andaꞌ basef ifimba ma lagol aeꞌagili, aꞌi nemaf buꞌwafi ma ipaꞌ. Ametal inimba aeꞌani ma basef ifimba hiafi aeꞌafi, andaꞌef naꞌamba atin.

18 Afaꞌ waꞌi Dembinai apeꞌinai Jisas Krais notopalopago ipaꞌ hipai dowaf nowaꞌ banagaepa. Eaꞌ maꞌuf.