5
Waf awafi soꞌa waulafi fape Korin
1 Anif basef fatagama aeꞌ faꞌi waf afamba awafi soꞌa waulafi fapoma ipaꞌ. Waf awafi endilisi fagahambombaga dasoꞌamai, waf afambai epes isimba sogololama Godi ina sandaꞌ anef waf awafi naꞌambaifi, owaꞌatin. Waf afamba naꞌamba. Anona aman aꞌ nasoꞌ nemataꞌw kugumafianai ahamana nagasoꞌakwi.*Lev 18:7-8; Diu 22:30, 27:20 2 Deiꞌ ipaꞌ ataꞌ pandaꞌ duꞌwaniga atin pasaꞌma agof ipeꞌigufi ma waf afamba awafi ma main? Naꞌambai owaꞌi. Aꞌ andeandeꞌma opalef ipeꞌilifi fepe siꞌilifa lef ipeꞌini ma pegalopa waf afambai awafi. Ipaꞌ piliꞌamona aman anamba nandaꞌ waf afambai ma ina ataꞌ nope wapani nolomepa, owaꞌ.*Kl 2:5 3 Endilisi, alop aeꞌapi pape laogona ipaꞌ, apaꞌ ambal aeꞌali lape lalomepa. Aeꞌ siꞌi endilisi ape agalomepa ma agawaloga waf aman anamba nandaꞌafi awafi.*Mt 16:19; 2 Ko 13:10
4 Deiꞌ aꞌias eaꞌ naꞌamba. Nemaf afamba ipaꞌ pendakolasafi ma agol Dembinai Jisasi, ambal aeꞌali loloma banagami Dembinai apeꞌinai Jisasi amamba mope molomepa nemaf afamba.*1 Ti 1:20; 1 Pi 4:6 5 Apaꞌ aꞌ miliamonago aman anamba nefeꞌmago Satana nogahambombaga alop poloma nembel apinai ananinai. Mondaꞌas naꞌamba ma God nogowambilai ambal aman anambai nemaf Dembinai akutaifi.*Ga 5:9
Esis Korin sindaliꞌamonago yis amamba apimi waminif atina aman anamba aunai nandaꞌ soꞌa wauli
6 Ipaꞌ pandaꞌ duꞌwaniga pasaꞌma agof ipeꞌigufi atogof luꞌwagof patiti waf afamba awafi fapomepa, amamba ina waf buꞌwafi, owaꞌatin. Ipaꞌ pegawa eaꞌ basefa muꞌuli inimba ma yis isimba sandaꞌ bret tagatifi fagaꞌi naꞌamba faꞌi, “Yis kwasalaꞌwis dowaf sandaꞌ bret hiatai hiꞌalata tatef luꞌuta.”*Eks 13:7, 12:21; Ais 53:7; 1 Pi 1:19
7 Eaꞌ ipaꞌ piliꞌamona yis amamba apimi ma pegape siꞌi bret dambaitai yis akatai, siꞌi endilisi ipaꞌ pagataga epes dambaipai. Deiꞌ main, sipsip sondolali sagahanama gwaꞌaisi luꞌwasi Pasovai anen Krais, esis aꞌ sahana nagaꞌ eaꞌ, siꞌi sondolali gwaꞌaisi mafis maisa God.*Diu 16:3
8 Eaꞌ apaꞌ mondandaꞌ gwaꞌaisi isimba luꞌwasi Pasova, apaꞌ ina mofaꞌ yis amamba apimi, owaꞌi. Amamba siꞌi waf awasinai endilisi. Apaꞌ mondofaꞌ bret wafitai yis akatai, isimba siꞌi wafa ukup usiꞌip hililiꞌi basef endilisifi.*Mt 18:17; 2 Te 3:14
9 Anif basef aliꞌ andaꞌef fagafeꞌma ipeꞌi, agaꞌif naꞌamba. “Ipaꞌ ina pefala epes isimba sandaꞌ waf awafi soꞌa waulafii piꞌi alipisi, owaꞌi.”
10 Aeꞌ ina aꞌiasa pegakwaha epes isimba endilisi sandaꞌ waf awafi soꞌa waulafii, a epes isimba kowagalasa hiahawes anis daiasi a epes isimba sandaꞌ wali o sagahambombaga anis daiasi soloma isimba sandaꞌ lotuma god basoꞌamunai, owaꞌ. Iꞌi ipaꞌ piꞌi pegakwahis endilisima, daoꞌ pekwaha itap apaꞌe hiꞌindalepa.*2 Te 3:6; Ta 3:10; 2 Jo 10 11 Apaꞌ basef deiꞌ andaꞌafi kofagefa naꞌamba. Iꞌi anona aman ipaꞌ pegefalona owamepai nondaꞌ waf awafi soꞌa waulafi o kowogalanama hiahawes anis daiasi o nondaꞌ lotuma god basoꞌamunai, niꞌi basef alafugahafi, neaꞌ embel okom mogahanai, nondaꞌ wal nohambombaga anis daias, ipaꞌ ina pefalana alipinai ipeꞌinai piꞌi basef pelomana, owaꞌi hapainai. Ipaꞌ ina peaꞌ gwaꞌaisi peloma epes naꞌambaisi wapani, owaꞌ.*Mk 4:11; Diu 13:5, 17:7; Diu 22:24
12-13 Maol sagahihiꞌ epes sagape andoꞌma siosi ina maol aeꞌani, owaꞌ. God atona anaf nowaloga waf epes isimbai. Apaꞌ maol sagahihiꞌ epes sagape nomoni, daoꞌ inimba maol ipeꞌini, ipaꞌ pendandaꞌan. “Ipaꞌ liꞌamonago aman aunai nape laꞌafena ipaꞌ nandaꞌ waf awafii.”