3
Itsabọ oyi IJọni Ọni ọọ batazi ẹgbọ
(iMat 3.1-12; iMak 1.1-8; iJọn 1.19-28)
Abi o rọ gbe ikpe igbẹshe ni oghie iSiza ni a lu iTibẹrusi ọ rọ khi oghie, oni ẹghẹghẹ iPọtiusi iPaleti ọ rọ li khi igọvunọ shi ekẹ iGalili ali ekẹ iJudia. Ẹghẹghẹ aghọ Erọdu ọ rọ ọ mhẹsẹ shi ekẹ iGalili. Inyọghuo ọli, ikhi iFilipu ọ mhẹsẹ ẹ shi ekẹ Iturea ali ekẹ iTirakọnitisi. Oghie iLisaniasi, ọ mhẹsẹ shi ekẹ Abilini. Ẹghẹghẹ ni Anasi ali iKefasi e rọ khi eni e kpeda nya na ekpodalo-ugamhi eyi Ẹshinẹgba, Oni ẹghẹghẹ ungmemhi oyi Ẹshinẹgba o rọ bhale deba iJọni omi iZakaraya, elemhi ifu ọdagbe ifufu. Ọ rọ tse abọ ekẹ iJọdani nya kiakia. Ọ liẹ, “A mu nyenẹ rọte olamhẹ eyẹẹ lasele ni a batazi ni a rọ gbe olamhẹ eyẹ ẹ kua na ẹ. Abi a li kẹkẹ ọli shi ebe Azaya ọmekẹguele, ni ọ rẹ,
“A ya suọ khi
ọgbọ ọ la ifu
ọdagbe ifufu ẹ tsẹsẹ.
Ọọ liẹ,
riẹlẹ odẹ shi ekẹ
khẹ Ọnọmhuẹ,
‘Bẹ odẹ ni o sheshe
na Ọnọmhuẹ’
A ka tsua ekẹ suli
igbilimhi ekẹ nya,
a gbọmọ ute ọgbọgbọ tiemhie ekẹ,
e mele ugbẹrekẹ-a.
A ka ri odẹ na gẹnẹ-gẹnẹ
mele eni sheshe-a,
ena fuọnyọ-fuọnyọ,
a ku wẹ gbe lẹghẹ.
Ọgbọkpa ọ ya mẹ
Imiepfuese oyi Ẹshinẹgba.”* Li zẹ Aza 40.3-5
Ebubu ẹgbọ e fiẹ bhale deba iJọni ni ọ batazi wẹ, iJọni ọ rẹ wẹ, “Ẹẹ enyẹ ifue, ọghuo ọ tse agua yẹ ẹ a na, khi ẹghẹghẹ ofu oyi Ẹshinẹgba ọọ bhale? Li zẹ iMat 12.34; 23.33 A ke ngeli angeli imu-nyenẹ, a khi ke liẹ, ‘Aburaamu ọ khi ita anye.’ Irari khi abi o li mhi li gue ọli ẹ yẹ ẹ khi, Ẹshinẹgba ọ dobẹ ya rọte echẹ ena wolọ eniyẹ lasele na Aburaamu. Li zẹ iJọn 8.33 A she rue uze shi ekẹ ni a rọ ya rọte imhili ẹẹra te eni ẹẹra gbe, ọọra kpa ni ọa da mọ udumhi onete ne, eri a ya tọli gbe, a tosẹ ọlia.”§ Li zẹ iMat 7.19 10 Eni ẹgbọ e mhila iJọni, “Sẹ anye ke li ya kia mena?” 11 IJọni ọọ wẹ, “Ọni ọ mhuẹ iwulu eva ọ ka rue oghuo ọ na ọgbọ ni ọa mhuẹ. Ọni ọ mhuẹ eminale ọ ka kemhi na ọni ọa mhuẹ.” 12 Emionoga eghuo e li bhale deba li ni a batazi wẹ. Ẹẹ ọli, “Ọsẹsẹ, sẹ anye li ya kia?”* Li zẹ iLuk 7.29 13 Ọọ wẹ, “A khi ke miono oga dọsẹ ingmẹ ni ẹẹ a ke miono.” 14 Ekhọli-okhuẹ eghuo e mhila li, “Sẹ anye li ya kia?” Ọọ wẹ, “A khi ri itoto rue ikpaghọ ni ẹa khi e yẹ ẹ, a khi ke gbo gue ingme ni ẹa la ọgbọ egbe shi ọli egbe. A zẹ ni ifata eyẹ ẹ e bu ẹ.”
15 Egbe e mu eni ẹgbọ, e ri udu oyẹwẹ khọkhọ ini iJọni ọ khi ọni Ọmiepfuese ni áá ngme. 16 Ama iJọni ọọ wẹ, “Amẹ mhi rọ batazi ẹ, ama ọgbọ ọọ bhale ni ọ toto dọsẹ mhẹ, ẹkuẹ ni ọ sọ shi owẹ, mhi aa fu tẹ ni mhia taghiẹ ọli-a. Ọ ya ri Ayẹmhẹ-nọ-pfuasẹ ali erali batazi ẹ. 17 Ọ mu ukpokpo ni a tọ akhuli ni o zẹ epfia sọ oyọli mhuẹ obọ. Lọli ọ rọ la ashini a la kpishi ado a ke pfie ado-a. Ọọ ti egbegbi ado ni e la ọ ọ gbili, ọ sọ wẹ ẹ shi ikpulu tsua ya shi owa eminale. Ama ọ ya ri erali ni ẹa ya a pfu ghue tosẹ efuẹwẹ-a.” 18 Odẹ ebubu iJọni ọ te tse abọ ungmemhi oyi Ẹshinẹgba yẹ wẹ, ọọ liẹ wẹ e mu ingeli eyẹwẹ pfi.
19 IJọni ọ gue emhi ebubu yẹ oghie Erọdu ni ọọ riẹlẹ ni ẹa ti, ali ọ gbo gueyẹ ọli khi ọa guẹ kia ni ọ rue Ẹrodiasi ni ọ khi ughuẹ iFilipu inyọghuo ọli shi. 20 Itobọ ona, Erọdu ọ riẹlẹ ingmobe ni o rue nga ọ, ọ ya mu iJọni shi owa ighumha. Li zẹ iMat 14.3-4; iMak 6.17-18
Ibatizi oyi iJesu
(iMat 3.13-17; iMak 1.9-11)
21 Abi iJọni ọ rọ batazi eni ẹgbọ ọ se, ọ li batazi iJesu. Abi iJesu ọ li sọ iromhi, idane o khueghie-a. 22 Ayẹmhẹ-nọ-pfuasẹ ọ li abi anekhukhu rọte idane tiemhile shi ọli egbe. Uruli o rọte idane ngme, ọọ, “Omimhẹ u khi. Mhi i nono ingme oyẹ gba, irari khi u ma ri egbe ẹ mu mhẹ.” Li zẹ Igbae 22.2; Iwolo 2.7; Aza 42.1; iMat 3.17; iMak 1.11; iLuk 9.35
Unuẹkpẹ oyi iJesu
(iMat 1.1-17)
23 Ikpe uye ali igbe iJesu ọ gbe ni ọ rọ gbe ikanya eyọli ekẹ le. Ọ khi omi ọmọse ni a lu iJosẹfu abi ẹgbọ e kie li khọkhọ li shi, iJosẹfu
ni ọ khi omi Eli.
24 Omi iMatati
ni ọ khi omi iLẹvi,
ni ọ khi omi iMẹlki,
ni ọ khi omi iJana, omi iJosẹfu.
25 Ni ọ khi Omi iMatatiasi,
omi Emọsi, omi iNaumu,
omi Esili, omi iNagai,
26 Omi iMaati
omi iMatatiasi, omi iSemeini,
omi iJosẹchi, omi iJoda,
27 Omi iJoana, omi iResa,
omi iZerubabẹli,
omi iShalitieli, omi iNeri.
28 Omi iMẹlki,
omi Adi, omi iKosamu,
omi Emadamu, omi Eri,
29 omi iJoshua, omi Eliaza,
omi iJorimu,
omi iMatati, omi iLẹvi,
30 omi iSamọ,
omi iJuda, omi iJosẹfu,
omi iJonamu, omi Eliakimu.
31 Omi iMelea, omi iMena
omi iMatata, omi iNatani,
omi iDefidi,
32 omi iJese,
omi Obẹdi, omi iBoazi,
omi iSamọ, omi iNashọni,
33 omi Aminadabu,
omi Adimi, omi Ani,
omi Ezirọni, omi iPẹrẹzi,
omi iJuda,
34 Omi iGiekọpu,
omi Aziki, omi Aburaamu,
omi iTẹra, omi iNaọ.
35 Omi iSẹrugu, omi iRẹu,
omi iPẹlegi, omi Eba,
omi iShẹla,
36 omi iKenani,
omi Afazadi, omi iShẹmu,
omi iNoa, omi iLameki,
37 Omi iMẹtusẹla, omi Enọki,
omi iJarẹdi, omi iMaalalẹli,
omi iKena,
38 omi Enọshi,
omi iSẹti, omi Adamu,
Omi Ẹshinẹgba.

*3:6 Li zẹ Aza 40.3-5

3:7 Li zẹ iMat 12.34; 23.33

3:8 Li zẹ iJọn 8.33

§3:9 Li zẹ iMat 7.19

*3:12 Li zẹ iLuk 7.29

3:20 Li zẹ iMat 14.3-4; iMak 6.17-18

3:22 Li zẹ Igbae 22.2; Iwolo 2.7; Aza 42.1; iMat 3.17; iMak 1.11; iLuk 9.35