1 Yinni Gusunɔ u bɑndu dii mɑ tɔmbɑ diirimɔ.

U sɔ̃ wɔllun kɔ̃sobun suunu sɔɔ mɑ tem mu yĩirimɔ.

2 Yinni Gusunɔ u kpɑ̃ Siɔniɔ.

Wiyɑ u bwesenu kpuro mɔ.

3 I Yinni Gusunɔn yĩsiru wɔlle suo.

Tɑ kpɑ̃, tɑ nɑnum mɔ. U dɛɛrewɑ.

4 I Yinni Gusunɔn dɑm wɔlle suo.

Domi u sɑ̃ɑwɑ sinɑ boko wi u rɑ ɡem kɑ̃.

Yinni Gusunɔ, wunɑ ɑ sun sɔ̃ɔsi nɡe mɛ sɑ ko kɑ bɛsɛn wɑ̃ɑru diisinɑ.

Wunɑ ɑ Yɑkɔbun bweseru woodɑ wɛ̃ Isireliɔ.

5 Yinni Gusunɔ u dɛɛre.

I nùn wɔlle suo.

I nɑ i yiirɑ win sinɑ kitɑrun nuurɔ.

6 Mɔwisi kɑ Aroni bɑ wɑ̃ɑwɑ win yɑ̃ku kowobu sɔɔ.

Sɑmuɛli u sɑ̃ɑwɑ be bɑ rɑ nùn sokun turo.

Be kpurowɑ bɑ nùn sokɑ mɑ u bu wurɑri.

7 U kɑ bu ɡɑri kuɑ sɑɑ ɡuru wii wurorun di.

Mɑ bɑ win woodɑbɑ mɛm nɔɔwɑ ye u bu wɛ̃.

8 Gusunɔ bɛsɛn Yinni, wunɑ ɑ bu wisɑ.

Mɑ ɑ kuɑ ben Yinni wi u rɑ bu torɑru suuru kue.

Adɑmɑ ɑ bu sɛɛyɑsiɑ ben kɔ̃sɑn sɔ̃.

9 I Gusunɔ bɛsɛn Yinni siɑro.

I yiiro win ɡuu dɛɛrɑrɔ i nùn bɛɛrɛ wɛ̃.

Domi u sɑ̃ɑwɑ Dɛɛro.