16
چالاکێن هسابدارئے مِسال
1 ایسّایا گۆن وتی مریدان گوَشت: «اَزگار و هستۆمندێن مردێا هسابدارے هست‌اَت. وهدے په آییا اے هال سر بوت که هسابدار آییئے مالا وارت و گارَ کنت، 2 گڑا آ لۆٹت و گوَشتی: ‹اے چۆنێن هبر اَنت که تئیی بارئوا من اِشکنگا آن؟ برئو وتی سَرجمێن هساب و کتابان بگیشّێن و بیار و منا بدئے. مرۆچی و رَند، تئو چه منی هسابداریا در ائے.› 3 هسابدارا وتی دلا جێڑت: ‹نون چۆن بکنان که منی واهند منا چه کارا در کنگا اِنت، بَرد و کۆڈال من جتَ نکنان، پِنڈگا هم منا لَجّ کنت. 4 بله هئو! انّون زانتُن چے بکنان. باید اِنت اَنچێن کارے بکنان که وهدے چِه کارا کَشّگَ بان، رَندا مردم منا وتی لۆگان بِلّنت.›
5 «آییا واهندئے وامدار یک یکّا وتی کِرّا لۆٹتنت. چه ائولی وامدارا جُستی گپت: ‹ترا منی واهندئے چینچُک وام پِر اِنت؟› 6 پَسّئوی دات: ‹منا یکسَد کئیل* 16:6 اَسلیگێن یونانی نبشتانکَ گوَشیت: «یکسَد بَتُس»، بزان 3700 لیترئے کِساسا. زئیتونی رۆگن وام پِر اِنت.› هسابدارا گوَشت: ‹بگر، اِش اِنت تئیی وامانی کَبز، زوتّ بنند و پنجاه کئیل بنبیس.› 7 پدا چه دومی وامدارا جُستی کرت: ‹ترا چینچُک وام پِر اِنت؟› گوَشتی: ‹یکسَد کئیل† 16:7 اَسلیگێن یونانی نبشتانکَ گوَشیت: «یکسَد کُروس»، بزان 37000 لیترئے کِساسا. گندم.› هسابدارا گوَشت: ‹اے تئیی وامانی کَبز اِنت. بگر و هشتاد کئیل بنبیس.›
8 «واهندا وتی لُچّ و دُزّێن هسابدار شاباش گوَشت، که آییا اے کار، گۆن اَگلمندی کرتگ‌اَت. چیا که اے وهدئے چُکّ گۆن وتی زمانگئے مردمان دنیایی گیر و دارانی در برگا، چه نورئے چُکّان بزان هُدایی مردمان آکِلتر اَنت. 9 شمارا گوَشان که دنیائے اے بێوپاێن مالا په شَرّێن دۆستانی شۆهاز کنگا کار بندێت، تانکه وهدے اے مالَ هَلّیت، شمارا اَبدمانێن جهانا وشّ‌آتک بکننت.
10 «آ که گوَنڈ و کَسانێن کارانی سرا تچک و راستَ بیت، مزنێنانی سرا هم راستَ بیت و آ که گوَنڈێن کارانی سرا راستَ نبیت، مزنێنانی سرا هم راستَ نبیت. 11 نون اگن شما اے بێوپا و کوڑَهێن‡ 16:11 کوڑَه، بزان هراب، گنده، ناپادار. دنیائے مالانی سرا راست و تچک مبێت، گڑا کئے بَرهَکّێن مال و گنجئے بارئوا شمئے سرا باورَ کنت؟ 12 اگن په دگرانی مالا راست و تچک مبێت، کئے اِنت که شمئے وتی مالا، شمارا بدنت؟
13 «هچ گُلامے په دو واجها هِزمت کرتَ نکنت، یا گۆن یکّێا دژمنیَ کنت و دومیگی دۆستَ بیت، یا گۆن ائولیگا وپادارَ بیت و چه آ دگرا بدیَ کئیت. شما یَکوهد و یَکجاه، هُدا و زَرّئے گُلامیا کرتَ نکنێت.»
شَریَت و هُدائے بادشاهی
(مَتّا 5:31–32؛ 11:12–13؛ مَرکاس 10:11–12)
14 پَریسی که وت زَرپرست اتنت، گۆن اے هبرانی اِشکنگا، ایسّااِش کلاگ گپت و ریشکند کرت. 15 ایسّایا گوَشت: «شما هما اێت که مردمانی دێما وتا تچک و پهرێزکار پێشَ دارێت، بله هُدا چه شمئے دلئے هالان سَهیگ اِنت. شمارا بگوَشان، هما چیزّ که مردمانی گوَرا باز کیمّتی اِنت، هُدا چه آ چیزّا سکّ بێزار اِنت.
16 «تئورات و سجّهێن نبیانی باریگ، تان یَهیائے وهدا اَت. نون رَندا، هُدائے بادشاهیئےمستاگ دئیگَ بیت و هرکَس جُهدَ کنت وتی راها دێم په آییا در بگێجیت. 17 بزانێت که آسمان و زمینئے گار و بێران بئیگ چه شَریَتئے یک ٹِکّ و نُکتهێئے کپگ و دور بئیگا باز آسانتر اِنت.
18 «اگن کَسے وتی جَنا سئون و تلاکَ دنت و گۆن دگه جنێنێا سورَ کنت، زِنا کنت و هرکَس که گۆن تلاک داتگێن جنێنێا سور و سانگَ کنت، آ هم زِنا کنت.
مالدار و ایل‌آزَر
19 «یک مالدار و اَزگارێن مردێا مُدام گران‌کیمّتێن§ 16:19 اَسلیگێن یونانی نبشتانکَ گوَشیت: «جَمورنگێن». اے رنگ بادشاهی پۆشاکانی رنگ اَت. پُچّ و پۆشاکَ پۆشت و وتی رۆچی په ائیش و نۆشَ گوازێنتنت. 20 ایل‌آزَر نامێن یک گریبێن مردے هماییئے لۆگئے دپا نادێنگ بوتگ‌اَت که جسم و جانی، سرا تان پادا رێش اَت. 21 آییئے اَرمان اَت که چه اَزگارێن مردئے پَرزۆنَگئے سر آتکگێن چُنڈ و چانیگان، وتی لاپا سێر بکنت. کُچک هم آتکنت و آییئے رێش و ناسورِشَ چَٹّتنت.
22 «وهدے آ گریب مُرت، پرێشتگان آ زرت و اِبراهێمئے کِرّا برت. اَزگارێن مرد هم مُرت و مردمان کَبر و کپُن کرت. 23 هما سێر و اَزگارێن مرد، دۆزها سکّ بَزّگی کَشّگا اَت. آییا که سر چست کرت چه دورا چمّی په اِبراهێما کپت که هما ایل‌آزَر آییئے کَشا نندۆک اَت. 24 گوانکی جت: ‹اِبراهێم، او منی پت! ترا منی سرا بَزّگ بات، ایل‌آزَرا منی کِرّا دێم بدئے که وتی لَنکُکا آپا بجنت و منی نُکّا ترّ بکنت که من آسا سُچگا آن.› 25 بله اِبراهێما پَسّئو دات: ‹او منی بَچّ! هئیالا بکپ که تئو وتی زِندا شَرّێن چیزّانی واجه بوتگئے و ایل‌آزَرا وتی رۆچ په بَزّگی گوازێنتگ‌اَنت. بله آ نون اِدا آسودگ اِنت و تئو اَزابان تَلوَسگا ائے. 26 اِشیا اَبێد، شمئیگ و مئے نیاما، یک اَنچێن جُهلێن دَرَگے بُرّگ بوتگ که نه مئے نێمگئے مردم شمئے گوَرا شتَ کننت و نه شمئے نێمگئے مردم مئے کِرا آتکَ کننت.›
27 «پدا اَزگارێن مردا گۆن اِبراهێما گوَشت: ‹او منی پت! گڑا چه تئو دَزبندیَ کنان، ایل‌آزَرا منی پتئے لۆگا رئوان بکن، 28 چیا که منی پنچ برات اَنت و منی واهگ اِنت که ایل‌آزَر آیانی کِرّا برئوت و آیان ڈاه بدنت و هُژّار بکنت، چُش مبیت که آ هم اے پُراَزابێن جاگها بیاینت.› 29 بله اِبراهێما گوَشت: ‹آیانی کِرّا موسّا و نبیانی کتاب هست‌اَنت. آیان بواننت و هبرانِش گۆش بدارنت.› 30 آ مردا گوَشت: ‹نه، او منی پت اِبراهێم! چه مُردگان اگن کَسے آیانی کِرّا برئوت، اَلّما آ چه وتی بدێن کاران پشۆمانَ بنت.› 31 اِبراهێما گوَشت: ‹اگن آ موسّا و پئیگمبرانی هبران گۆشَ ندارنت، گڑا چه مُردگان هم اگن کَسے زندگ ببیت و آیانی کِرّا برئوت، آییئے هبران هم باورَ نکننت و نمَنّنت.›»
*16:6 16:6 اَسلیگێن یونانی نبشتانکَ گوَشیت: «یکسَد بَتُس»، بزان 3700 لیترئے کِساسا.
†16:7 16:7 اَسلیگێن یونانی نبشتانکَ گوَشیت: «یکسَد کُروس»، بزان 37000 لیترئے کِساسا.
‡16:11 16:11 کوڑَه، بزان هراب، گنده، ناپادار.
§16:19 16:19 اَسلیگێن یونانی نبشتانکَ گوَشیت: «جَمورنگێن». اے رنگ بادشاهی پۆشاکانی رنگ اَت.