2
Lang o mondhén mardéay drahbakshi
(Mattá 9:1–8; Luká 5:17–26)
1 Lahtén róchá o rand, Issá padá Kaparnáhumá átk o é habar sheng o tálán but ke Issá lógá ent. 2 Gorhá, haminkadar mardom átk o mocch but ke lóg porr but, lógay dapá ham hecch jágah néstat. Issáyá áyáni kerrá Hodáay habaray wáz kort. 3 Hamé damáná, chár mardomá yakk lang o mondhén mardé áiay kerrá áwort, 4 bale cha mardománi bázén mocchiá, langén mardesh Issáay nazzikká áwort nakort. Paméshká, lógay saray hamá jágahesh thong kort ke Issá jahlá at o langesh gón nepádá ér dát. 5 Issáyá ke áyáni imán dist, gón langá gwashti: “Oo mani chokk! Tai gonáh bakshag butant.” 6 Bale Sharyatay lahtén zánóger ke ódá neshtagat, wati delá gwashtesh: 7 “É chéá chosha gwashit? Kopr kanagá ent. Abéd cha*2:7 Abéd (cha), bezán gayr cha. Hodáay jendá, dega kass gonáhán baksheta nakant.”
8 Issáyá hamá damáná zánt ke é mardom wati delá ché gwashagá ant, gwashti: “Shomá chéá wati delá choshén hayála kárét. 9 Gón é langén mardá kojám habaray kanag ásánter ent: ‘Tai gonáh bakshag butant’ yá: ‘Pád á, wati nepádán bezur o beraw’? 10 Bale man é habar kort tánke shomá bezánét ke Ensánay Chokká†2:10 Dányál nabiá “Ensánay Chokk” pa anchén hastiéá kármarz kortag ke cha ásmáná éra kayt. Issáyá watá “Ensánay Chokk” gwashtag tánke mardom bezánant ke á cha ásmáná átkag o hamá wádah dátagén Masih ent. é donyáyá gonáháni bakshagay wák o ehtiár hast.” Padá gón langá gwashti: 11 “Tará gwashán, pád á, wati nepádá bezur o lógá beraw.” 12 Harkasá dist ke hamá damáná mard pád átk, wati nepádi zort o dar átk. Sajjahén mardom hayrán butant, Hodáay satá o sanáesh kort o gwashtesh: “Má choshén kár hechbar nadistag.”
Láwiay lótháénag
(Mattá 9:9–13; Luká 5:27–32)
13 Issá padá gwarmay lambá shot. Mardománi mazanén rombé‡2:13 Romb, bezán gróh, thóli. Issáay kerrá átk o áiá tálim dátant. 14 Anchó ke Issá ráhá rawagá at, Halpiay chokk Láwii dist ke song§2:14 Song, bezán máliát, thayks. o máliátay kárgesá neshtagat. Gón áiá gwashti: “Byá, mani randgiriá bekan.” Á pád átk o Issáay hamráh but.
15 Randá Issáyá Láwiay lógá warag wárt. Dega bázén songi o máliátgir*2:15 Bani Esráilián, songi o máliátgirén mardom nádóst atant, chéá ke á Rumay hokumatay kárendah atant o bázénéá pa wati nap o suttá cha mardomán géshén song o bája gept. o gonahkárén mardoméá ham gón Issá o áiay moridán yakjáh nán wárt, chéá ke esháni tahá bázéné Issáay randgir at. 16 Wahdé Sharyatay Parisi zánógerán dist ke Issá gón songi o gonahkárán warag waragá ent, gón Issáay moridán gwashtesh: “É Issá chéá gón songi o gonahkárán waraga wárt?” 17 Issáyá ke eshkot, gwashti: “Dráh o salámatén mardomán tabib pakár naent, nádráhán tabib pakár ent. Man pahrézkáráni gwánk janagá nayátkagán, gonahkáráni gwánk janagá átkagán.”
Róchagay bárawá
(Mattá 9:14–17; Luká 5:33–39)
18 Yahyáay morid o Parisi róchag atant. Gorhá mardom Issáay kerrá átkant o jostesh kort: “Yahyá o Parisiáni morid chéá róchaga bant, bale tai morid róchaga nabant?” 19 Issáyá gwasht: “Tánke sálónk gón suray mehmánán yakjáh ent, mehmán róchag buta kanant? Na, tánke sálónk gón ent, á róchaga nabant. 20 Bale wahdé kayt ke sálónk cha áyán jetá kanaga bit. Gorhá hamá wahdá róchaga bant. 21 Hechkas nókén goday thokkoré nazurit o kwahnén pashká paccha najant, chéá ke nókén goday pacch nazza kayt o kwahnén pashká gantera derrit. 22 Hechkas nókén sharábá†2:22 Pákén Ketábay tahá har jágah ke sharábay labz átkag, eshiay máná cha angurá jórh butagén sharáb ent ke Engréziá “wine” gwashaga bit. kwahnén mashkán mána nakant, chéá ke nókén sharáb mashkána trákénit. Sharáb o mashk har do zawála bant. Nókén sharábá nókén mashkán mána kanant.”
Issá Shabbatay wájah o wáhond ent
(Mattá 12:1–8; Luká 6:1–5)
23 Shabbatéay róchá, Issá cha gandomay keshárán gwazagá at. Morid ke cha keshárán gwazán atant, hóshagay sendagá laggetant. 24 Parisián gón Issáyá gwasht: “Bechár, tai morid chéá choshén káré kanant ke Shabbatay róchá rawá naent?” 25 Issáyá gwasht: “Shomá hechbar nawántag ke wahdé Dáud o áiay hamráh gozhnag atant o waragesh néstat, Dáudá ché kort? 26 Masterén dini péshwá Ábyátáray zamánagá, Dáud Hodáay Pákén Lógá shot o hamá pákwandhén nagani‡2:26 Pákwandhén nagan anchén nagan atant ke modám Hodáwanday bárgáhá ér kanagi at o é gappay nesháni atant ke Hodáwand wati mardománi rózirasán ent. wártant ke dini péshwáyán abéd dega hechkasá áyáni waragay hakk néstat. Hamáyáná ham dáti ke áiay hamráh atant.”
27 Padá, Issáyá gón Parisián gwasht: “Hodáyá Shabbatay róch pa mardomán pédá kortag, mardom pa Shabbatay róchá pédá nakortagant. 28 Paméshká, Ensánay Chokk Shabbatay róchay ham málek ent.”
*2:7 2:7 Abéd (cha), bezán gayr cha.
†2:10 2:10 Dányál nabiá “Ensánay Chokk” pa anchén hastiéá kármarz kortag ke cha ásmáná éra kayt. Issáyá watá “Ensánay Chokk” gwashtag tánke mardom bezánant ke á cha ásmáná átkag o hamá wádah dátagén Masih ent.
‡2:13 2:13 Romb, bezán gróh, thóli.
§2:14 2:14 Song, bezán máliát, thayks.
*2:15 2:15 Bani Esráilián, songi o máliátgirén mardom nádóst atant, chéá ke á Rumay hokumatay kárendah atant o bázénéá pa wati nap o suttá cha mardomán géshén song o bája gept.
†2:22 2:22 Pákén Ketábay tahá har jágah ke sharábay labz átkag, eshiay máná cha angurá jórh butagén sharáb ent ke Engréziá “wine” gwashaga bit.
‡2:26 2:26 Pákwandhén nagan anchén nagan atant ke modám Hodáwanday bárgáhá ér kanagi at o é gappay nesháni atant ke Hodáwand wati mardománi rózirasán ent.