1 سَباها ماهلّه مزنێن دینی پێشوا، کئومئے کماش، شَریَتئے زانۆگر و سرۆکانی دیوانئے سجّهێن باسک همشئور بوتنت و ایسّااِش بست، گِرّان کرت و پیلاتوسئے دستا دات. 2 پیلاتوسا چه آییا جُست کرت: «تئو یَهودیانی بادشاه ائے؟» ایسّایا پَسّئو دات: «تئو وت گوَشگا ائے.» 3 مزنێن دینی پێشوا آییئے سرا بازێن بُهتام جنَگا اتنت. 4 پیلاتوسا پدا جُست کرت: «په چے پَسّئوَ ندئیئے؟ بچار تئیی سرا چینچُک بُهتام جنَگا اَنت.» 5 ایسّایا هچ پَسّئو ندات. پیلاتوس هئیران مَنت.

6 پیلاتوسا، هر سال اییدئے وهدا، چه یَهودی بندیگان یکّے، هما که مردمان بلۆٹتێن، آزاتَ کرت. 7 بندیگانی تها باراباس نامێن مردے هست‌اَت. گۆن هما آشۆپیان گِرگ بوتگ‌اَت که شۆرشے وهدا هۆن و کۆشِش کرتگ‌اَت. 8 مردم، پیلاتوسئے کِرّا آتکنت، دَزبندی‌اِش کرت و گوَشتِش: «هر دابا که تئو گوَستگێن سالان کرتگ، اِمبری هم هما دابا بکن.» 9 پیلاتوسا جُست کرت: «شما لۆٹێت که یَهودیانی بادشاها په شما آزات بکنان؟» 10 آییا زانتگ‌اَت که دینی پێشوایان، ایسّا په هَسَدّ و کُنّت آییئے دستا داتگ. پمێشکا چُش گوَشتی. 11 بله دینی پێشوایان مردم شۆرێنت و آشُپێنتنت*15‏:11 آشُپێنگ، بزان پاد کنگ، تَهریک کنگ. تان چه پیلاتوسا ایسّائے بدلا، باراباسئے آزاتیا بلۆٹنت. 12 پیلاتوسا پدا جُست کرت: «گڑا اے مردا که شما آییا یَهودیانی بادشاهَ گوَشێت، چۆن کنان؟» 13 مردمان کوکّار کرت: «سَلیبی کَشّ!» 14 پیلاتوسا جُست کرت: «چیا بارێن؟ مئیاری چی اِنت؟» بله آیان گێشتر کوکّار کرت: «سَلیبی کَشّ!» 15 گڑا پیلاتوسا، که لۆٹتی مردمان چه وت رزا بکنت، باراباس آزات کرت و ایسّا، شلّاک جناێنت و داتی که سَلیبئے سرا بدْرنجنتی.

16 سپاهیگان، ایسّا والیئے کۆٹ و ماڑیئے پێشجاها برت و سپاهیگانی سجّهێن لشکر لۆٹت و مُچّ کرت. 17 آیان، بادشاهی جَمورنگێن†15‏:17 جمو، رنگے که پارسیا بنفش و اردوا بنفشی گوَشنتی. کَباهے ایسّائے گوَرا دات، چه ڈَنگر و کُنٹگان تاجے جۆڑێنت و آییئے سرا اێر کرت. 18 گۆن کلاگ و ریشکندے، شرپ و اِزّت دات و گوَشتِش: «دْرود و دْرَهبات،‡15‏:18 دْرود و دْرَهبات، بزان سلام و اَلئیک. و یَهودیانی بادشاه!» 19 لَٹِّش سرا جت، دپ و دێمان تُه کرت و سُجده‌اِش کرت. 20 وهدے کلاگ و مَلنڈِش هلّێنت، گوَرئے جَمورنگێن کَباهِش کَشّت و آییئے جندئے گُدِش پدا گوَرا داتنت. رندا، دێم په سَلیب کَشّگا برتِش.

21 هما وهدا، کِرینیئے شهرئے§15‏:21 کِرینیئے شهر اَنّوگێن زمانگئے لیبیائے مُلکا اِنت. شَمون نامێن مردے، که اِسْکَنْدَر و روپُسئے پت اَت، چه کِشاران دێم په شهرا آیگا دیستِش. سپاهیگان په بیگار گپت که ایسّائے سَلیبا بَڈّا بکنت. 22 آیان، ایسّا هما جاگها آورت که نامی «جُلْجُتا» بزان «کامپۆل» اِنت. 23 گڑا، شرابِش مُرّ مان کرت و په ورگا دات، بله ایسّایا نئوارت. 24 نون سَلیبئے سرا دْرتکِش، پُچّ و پۆشاکِش وت‌مان‌وتا بهر کرتنت و پال جتِش که بارێن کئیا چے رسیت.

25 سُهبئے وهد اَت*15‏:25 اَسلیگێن یونانی نبشتانکَ گوَشیت: «سئیمی ساهت»، بزان ساهت نُها. یَهودیانی رۆچئے هساب، ساهت سُهبئے شَشا بُنگێجَ بوت. که ایسّااِش سَلیب کَشّت. 26 مئیارنامگئے سرا په آییئے جُرم و مئیارا چُش نبشتگ‌اَت: «یَهودیانی بادشاه.» 27 ایسّائے همراهیا دو یاگی و دُزِّش هم سَلیبئے سرا دْرتک، یکّے راستێن و دومی چَپّێن نێمگا. 28 اے ڈئولا، پاکێن کتابئے هما پێشگۆیی سَرجم بوت که گوَشیت: آ چه رَدکاران زانگ بوت.†15‏:28 اِشئیا نبیئے کتاب، بَهر 53، بَند 12. لهتێن دَزنبشتا بَند 28 نێست. 29 رهگوَزان دژمان دئیان، وتی سر چَنڈێنت و گوَشتِش: «او مزنێن پرستشگاهئے کرۆجۆک که گوَشتگِت: ‹سئے رۆچا پدا آییا اڈَّ کنان›! 30 نون وتا برَکّێن و چه سَلیبا اێر آ!»

31 همے پئیما مزنێن دینی پێشوا و شَریَتئے زانۆگر ریشکند و مَسکرا کنگا اتنت و گوَشتِش: «آ دگه مردمی رَکّێنتنت بله وتا رَکّێنتَ نکنت. 32 بِلّ که مَسیه، اِسراییلئے بادشاه، نون چه سَلیبا اێر بکپیت تانکه ما بگندێن و باور بکنێن.» آ دوێن هم که گۆن آییا دار کَشّگ بوتگ‌اتنت، ایسّایا بَد و رَد گوَشگا اتنت.

33 نێمرۆچا بگر تان بێگاهئے سئیا،‡15‏:33 اَسلیگێن یونانی نبشتانکَ گوَشیت: «ششمی ساهتا بگر تان نُهمی ساهتا»، بزان مرۆچیگێن ساهتانی هسابا، نێمرۆچئے دوازدها بگر تان بێگاهئے سئیا. سجّهێن مُلک اَناگت تهار بوت. 34 بێگاهئے ساهت سئیا،§15‏:34 اَسلیگێن یونانی نبشتانکَ گوَشیت: «نُهمی ساهتا». ایسّایا چیهال*15‏:34 چیهال، بزان دردناکێن کوکّار. جت: «اِلویی، اِلویی، لِما سَبَکْتَنی؟» (بزان: او منی هُدا، او منی هُدا! تئو چیا منا تهنا اِشت؟)†15‏:34 زَبور 22‏:1. 35 اۆدا نزّیکا، لهتێن اۆشتاتگێن مردما وهدے اِشکت، گوَشتِش: «بچارێت، اِلیاسا تئوار کنگا اِنت.» 36 چه آیان یکّے تچانا شت، اِسْپنجے زرت و تْرُپشێن شرابا میسّێنتی. اِسْپنجی دارێئے سرا بست و په چوسّگا ایسّائے نێمگا شهارت و گوَشتی: «سَبر کنێت، بچارێن بارێن اِلیاس اشیئے رَکّێنگا کئیت یا نه؟» 37 گڑا، ایسّایا بُرزێن تئوارێا چیهال کَشّت و ساه دات. 38 همے وهدا، مزنێن پرستشگاهئے پرده، بُرزادا بگر تان جهلاد دِرت و دو بهر بوت. 39 هما پئوجی اَپسر که ایسّائے دێم په دێما اۆشتاتگ‌اَت، وهدے دیستی که آییا چۆن ساه دات، گڑا گوَشتی: «بێشکّ اے مرد هُدائے چُکّ اَت.»

40 لهتێن جنێن دور اۆشتاتگ و چارگا اَت، گۆن آیان، مَریم مَجْدَلیَه، کَسانێن آکوب و یوشائے مات مَریم و سالومه گۆن اتنت. 41 وهدے ایسّا جَلیلا اَت، اے جنێن آییئے همراه اتنت و آییئے هِزمت و چلۆپگِش کرتگ‌اَت. اَبێد چه اِشان، دگه بازێن جنێنے هم اۆدا اَت که آییئے همراهیا اورْشَلیما آتکگ‌اتنت.

42 آ رۆچ، جُمَهئے رۆچ اَت و مردم، په شَبَّتئے رۆچئے آرام کنگا، وتا تئیار کنگا اتنت. 43 ایسُّپ نامێن مردے که اَریماتیائے شهرئے نندۆک اَت، سرۆکانی دیوانئے اِزَّتمندێن باسکے اَت و وت هم هُدائے بادشاهیئے رَهچار و وداریگ اَت. جُمَهئے بێگاها پیلاتوسئے کِرّا شت و گۆن بهادُرّی و دِلێری، ایسّائے جۆنئے برگئے اِجازتی لۆٹت.

44 وهدے پیلاتوس سَهیگ بوت ایسّا چۆ زوتّ مُرتگ، هئیران و هَبَکَّه مَنت و پئوجیانی مستری لۆٹت تان بزانت که ایسّا مُرتگ یا نه؟ 45 پئوجیانی مسترئے سجّهێن هال و هبرانی اِشکنگا رَند، ایسّائے جۆنئے برگئے اِجازتی دات. 46 ایسُّپا، لیلُمێن گُدے بها گپت و آورت، آییئے جۆن چه سَلیبا اێر گێتک و هما گُدئے تها کپُن کرت. کَبرێئے تها که چه پێسرا چه تلارا تْراشگ و تئیار کنگ بوتگ‌اَت، ایسّایی کَبر کرت و مزنێن ڈۆکے لێٹ دئیانا کَبرئے دپا اێر کرت. 47 مَریم مَجْدَلیَه و یوشائے مات مَریم، هر دوێنان دیست که آاِش کجا کَلّ کرت.