11
1 Ango edo Iesu ainda ambodani 12 ainde ao darari ge tedo itae edo, imo yai ainda dodo awamaneda nasi babainda aundo embomai atopatain edo God da ge karigain maunsisina.
John Bapataito Ari Embo ainda ambodani tote (2) piesiri Iesu da yai maunsitera.
(Luke 7:19-30)
2 Edo John Bapataito Ari Embo awa bundari oro doda isite Keriso da buroda bino awa ingido ainda ambodani tote (2) ainda yai piesiri maunsitera. 3 Ango piesiri awamane maundo embo ainde sitera, “Imo awa embo God mi piari gumaina sisina ami gumbesita, ko nakare embo nei gain eite sima ari?”
4 Edo Iesu mi awamanede mina sisina, “Maundo John de tewo gare ro inemanemi ingewa edo gotewa awa: 5 Embomai jisiguba ari awa boroko yai parara gotera, edo baoro bundari awa erido boroko ainto era, embo ginimi tutupegari awa kaviegetera, edo dengoro dundari ge yavi ingera, embo betarida awa tenda erido wasiri bera, edo mapa embomai God da bino dave awa ingera awa. 6 Edo God da dubodave emboda yai itaina, ainmi ainda gebé ari nato yaida dowae aina.”
7 Iji ainde John da ambodani dodo mauntero, Iesu mi embomai jisijisi bajina ainde tuturo edo John da ge sisina. “Imomane idegedo abu damodamoda maundo rorae ro gain esitevi? Embo do buraude ango opema igi bisimi doreiuri gundo maundo eira awa gain esitevita? Ango ainyae. 8 Ata ro gain idegedo maunsitevi? Embo ombarijiari virarae tamonda piari awa gain ta? Ango ainyae. Giwo, embomai ombarijiari viraraede daotegeregarida oromandoda isima edo era. 9 Ata ro gain idegedo maunsitevi? Peroveta rita? Awa gebé nane imondemane tena. Edo embo awa peroveta tepo ae. 10 John eiwa gumaina awa, matu perovetami gagurisina engo:
“ ‘Giwo, na bino piari embo nato piano gisi maundo,
ito begata gatedo dave aina.’Malachi 3:1
11 Eiwa gebé imondemane tena: Embomai nenei berari eutumi engitera ainda doda, embo dabé itae John Bapataito Ari Embo awa daginegari tao. Awarata, embo saka ave utuda gisijiari yai*utuda gisijiari yai awa God da sima ari daveda yai. isira awa, imo John daginegari isira God da jisida. 12 Edo John Bapataito Ari Embo da ijide edo gundo boroko, God mi embomai gisijijieite†God mi embomai gisijijieite. Guriki da ge einda awa ‘utu mi gisijijieite’. matawa gorobade gisi maunteira, edo do jinenegari embomaimi ainda gisijiari awa dubodavede budo era.‡Ove Kotopuda wareregari embo nenei kotembedo era, Matthew 11:12da moka awa: John Bapataito Ari Embo da ijide edo gundo boroko, embo neneimi gorobade maundo embomai God mi sima dave edo euri awa usibesi aintedo memesi neide kainde awamaneda yai pioro mina beyae budo era. 13 Edo John Bapataito Ari Embo da gumbae gisida, Peroveta mane berari ae Aodari demi§Peroveta mane berari ae Aodari de da moka awa God da Ove Gaiarida ge, Genesis maundo Malachi. God mi embomai gisijiain gumaina awa karigesitera. 14 Edo gido imomane na gebé awa, John awa Elijah.*Elijah. Ge einda awa kariwa ge. John Bapataito Ari Embo ami peroveta Elijah da wasiride gorobade dá ango gupusina (Luke 1:17 giwo.). Edo peroveta manemi matu ainda gumbari karigesitera. 15 Edo imomane dengorode ingari tao gido, ingiwo! Ge ro tena awa, bé gain edo gawa!
16 “Ata embomai iji einda itewa, awamane kariwa nongo tani? Awamaneda iwata kawata awa ango mai babaingaemi nasida oriari yaida anumbedo isite aorogatedo, 17 mina tara edo era engo:
“ ‘Nakare imomane embo viriko putetera,
ata imomane ya urae;
nakare imomane embo do ari ya tetera,
ata imomane ji tae.’
18 “Edo begata dá ango John Bapataito Ari Embo gundo embomaide ge karigesisina. Edo embo awa rorae indae edo waini indae gupusina, edo awamanemi imo ajiregedo ge tedo era, ‘Embo eiwa binei ainda doda isira.’ 19 Edo Embo da Mai indari ae waini de indeite gumbiri awamanemi tedo era, ‘Giu, embo ouwa rorae indari pu inge edo waini jiwae injido dutari. Tax kumbari embobo ae embo bebegaede otawo edo eira!’ Awarata, edo God da mamaimi ainda dubogari ambo ambo ara, embomaimi God da dubogari awa wasiri dambu darari awa gara.”
Nasi babain jiwaemi Iesu ajiregesitera.
(Luke 10:13-15)
20 Edo Iesu mi buro babain nasi babainda yai edo esisina, ata awamaneda jimbo bebegae dodo God da yai wareregae. Awatedo imo awamaneda jimbo arapada tuturo edo karigesisina. 21 “Do ari imomane Koraizin nasida itewa! Do ari imomane Besaida nasida itewa! Edo na nasi Taia ae Saidoni de ounda buro babain ae esitena dá ango itomane yai esitena, awamanemi dubo vevera eite boraebé gongo urigade omundo aewa kopuruda piedo awamaneda jimbo bebegae dodo God da yai wareregae esitera. 22 Ata nane imondemane tena, katari ijide, God mi rirowa Taia ae Saidoni de piari bara dá ango imondemane daginegedo piaina. 23 Edo imomane Kapenium nasida isima edo ewa ami nasi itomaneda dao ikanebé jiowo visido esira. Ata God mi imomane kundo piari wotawa yai Heidis†Heidis da moka da (1) awa ‘goiari yai’ o ‘bebetegarida sima ari yai’ ango (Matthew 16:18; Iwata Ari 2:27, 31). Ata ainda moka nei awa yai beyaebé niyao matawa aveira ainda. Embo ainkainmi awamaneda gebé ari Iesu da yai piae, iji ainde awamane betara, awamaneda asisi awa yai ainda maundo isiaro God mi ainda rirowa awamaneda yai piaina (Luke 16:23). ainda. Edo na nasi Sodom ounda buro babain ae esitena dá ango itomane yai esitena, awamaneda jimbo bebegae awa dodo God da yai wareregae esitera, edo gundo iji einde daedo itae etera. 24 Edo nane imondemane tena, katari ijide God mi rirowa saka Sodom embomaida yai piari bara, ata rirowa bajinabé itomane yai piaina.”
Iesu mi ainda oena apari embomaida yai piain jipapa eira.
25 Edo iji ainde Iesu mi engo sisina, “Mamo, utu ae butu deda Badari, roviravi eiwa inemi embomai dubogari de jirogari deda yai arapa ae onjigesiteta awa, mai babaingaeda yai arapa eteto gera. Awatedo imo dasiga ena. 26 Gebé, Mamo, roviravi dave engo idegarate jipapa esiteta awa, dá ango eteto idegesira.”
27 Ainda amboda Iesu God da yai ge eiwa tedo, imo tuturo edo embomaide ge sisina, “Roviravi berari awa Mamo natomi namonde pipisisina. Na awa Mamo da Mai, edo embo da ainmi Mai awa embo bé averi awa gae, da (1)bé Mamo mi akuta goteira. Edo embo da ainmi Mamo awa embo bé averi awa gae, da (1)bé, Mai mi akuta goteira. Edo Mai mi jipapa edo gido, embo neneida yai ari arapa ari Mamo awa embo bé averi awa gara.
28 “Nato yai gumbuwo imomane berari ainkainmi buro okain eite bouga bajina budo ewa, edo nanemi oena apari piano bave. 29 Na awa do netegari ae tataimbari de, awatedo gumbuwo, nato amboka mendo kundo mambave. Edo nane imomane atopatano itomane asisida oena apari tambave. 30 Aindabé nato amboka mendo awa bari tao, edo nato bouga awa edopa, ge awa tetena.”
11:10 Malachi 3:1
*11:11 utuda gisijiari yai awa God da sima ari daveda yai.
†11:12 God mi embomai gisijijieite. Guriki da ge einda awa ‘utu mi gisijijieite’.
‡11:12 Ove Kotopuda wareregari embo nenei kotembedo era, Matthew 11:12da moka awa: John Bapataito Ari Embo da ijide edo gundo boroko, embo neneimi gorobade maundo embomai God mi sima dave edo euri awa usibesi aintedo memesi neide kainde awamaneda yai pioro mina beyae budo era.
§11:13 Peroveta mane berari ae Aodari de da moka awa God da Ove Gaiarida ge, Genesis maundo Malachi.
*11:14 Elijah. Ge einda awa kariwa ge. John Bapataito Ari Embo ami peroveta Elijah da wasiride gorobade dá ango gupusina (Luke 1:17 giwo.).
†11:23 Heidis da moka da (1) awa ‘goiari yai’ o ‘bebetegarida sima ari yai’ ango (Matthew 16:18; Iwata Ari 2:27, 31). Ata ainda moka nei awa yai beyaebé niyao matawa aveira ainda. Embo ainkainmi awamaneda gebé ari Iesu da yai piae, iji ainde awamane betara, awamaneda asisi awa yai ainda maundo isiaro God mi ainda rirowa awamaneda yai piaina (Luke 16:23).