2 पतरस की चिट्ठी
2 पतरस कर चिट्ठी
परचा
2 पतरस चिट्ठी कथै, कि हइ प्रेरित पतरस दवारा लिखे गय रथै, पय आज कइ दिमाक बाले इके सही नेहको मानथै, हइ सही हबै कि कउनो अउ इके पतरस के ओर लग लिखे होय। लेखक कथै कि ऊ यीसु के जीवन के अउ खास के रूपान्तरन 1:17-18के गवाह रथै। अगर पतरस चिट्ठी लिखे रथै ता सही हबै, कि ऊ इके रोम सहर हे मसीह के पइदा के 65-69 साल के बीच मरे लग पहिले लिखे होय।
पतरस इके अपन दूसर चिट्ठी 3:1कथै, जउन 1 पतरस के चिट्ठी के बाद लिखे के तारिख रखथै। उन सगलू मसीहन के चिट्ठी के संबोधित करिस। पतरस हइ चिट्ठी बिस्वासिन के निक्खा जीवन जीय के निता प्रोत्साहन करै, अउ ठगरा सिक्छन के आदेस झइ मानै के चेतन्त देय के निता लिखे रथै। 2 ऊ उनके उन मनसेन के अपेक्छा करै के निता प्रोत्साहन करिस, जउन कहत रहै कि यीसु के वापिस आय हे बोहत टेम लगथै। एखर बजय ऊ गुठेइस कि भगवान धीम नेहको हबै बलुक चाहथै कि हर कउ बचाय जाय। 2 पतरस 3:8-9 हइ अक्ठी निक्खा जीवन जीय के अक्ठी कारन हबै। 3:14
रूप रेखा
1. पतरस अपन परचा देथै अउ अपन पढै बालेन के संबोधित करथै। 1:1-2
2. फेर ऊ उनके निक्खा जीवन जीय के सुरता दिलाथै काखे भगवान हमके सक्छम करे हबै। 1:3-21
3. एखर बाद ऊ ठगरा सिक्छन के खिलाप चेतन्त देथै अउ कथै कि आखरी हे ठगरा गुरून के का होही। 2:1-22
4. ओखर बाद पतरस बिस्वासिन के यीसु के दूसर आगमन के तइयारी के निता निक्खा जीवन जीय के निता प्रोत्साहन करत समापत करथै। 3:1-17
1
सोगत
1 यीसु मसीह के हरवाह अउ चेला समोन पतरस के हइ चिट्ठी उन मनसेन के नाम हबै, जिनही हमर भगवान अउ मुकति करै बाले यीसु मसीह, के धरमी काम के दवारा हमर जसना बिस्वास के कीमती बरदान मिले हबै।
2 तुम मनसेन के भगवान के अउ हमर परभु यीसु के पहिचान के दवारा अनुगरह किरपा अउ सान्ति तुम्हर हे बोहतायत लग पाउत रहा।
भगवान कर बुलउवा अउ चुनाव
3 भगवान के बडा सक्ति हमही ऊ सब दय हबै, जउन भक्ति के जीवन के निता जरूरी हबै अउ हमही ओखरे ग्यान पामै के ओग बनाय हबै, जउन हमही अपन महिमा अउ निक्खा काम करै के निता बुलाय हबै। 4 उस महिमा के दवारा ऊ हमर निता अपन बडा अउ कीमती टीमा के पूर करे हबै, इहैमेर तै ऊ असक्ति लग बच गय, जउन बेकार वासना के कारन दुनिया हे बसे हबै अउ तै भगवान बेउहार के सहभागी बन गय हबस। 5 इहैनिता तै पूर मेहनत लग परयास करत अपन बिस्वास हे अच्छा गुन अउ अच्छा ग्यान लग। 6 तोर ग्यान संयम लग, तोर संयम धीर लग, तोर धीर सक्ति लग, 7 अउ भक्ति हे भाईचारा के बिस्वास अउ भाईचारा के बिस्वास हे माया बढाउत जा। 8 अगर हइ गुन तुम्हर हे मउजूद हबै, अउ बढत जथै, ता हइ हमर परभु यीसु मसीह के सगलू ग्यान पामै के निता तुमही निकम्मा नेहको होमैका पडही, अउ न फेल हुइहा। 9 जउन मनसे हे हइ गुन मउजूत नेहको हबै ऊ अन्धरा हबै, ढटेवत फिरथै, काखे ऊ बिसर जथै, कि ओखर पुरान पाप धोबर के सुध्द हुइ चुके हबै।
10 इहैनिता भाई अउ बेहन तुम अपन बुलउवा अउ चुने जाय के साबित करै के निता पूर-पूर परयास करत रइहा, अगर तुम असना करत रइहा ता कबहुन रास्ता लग नेहको भटकिहा अउ न ठोकड खइहा। 11 हइ मेर हमर परभु अउ मुकति करै बाले यीसु मसीह के सबरोज के राज हे तुमही परवेस दइके परभु अपन उदारता दिखाही।
12 इहैनिता तुम हइ बात जानथा अउ पाय हर सत्य हे मजबूत बने रहा, तउभरमा मै एखर सुरता देवाउत रइहों। 13 मै जब तक हइ देह हे मउजूद हबो, तुमही सुरता देबाय के चेतन्त रखैका अपन जिम्मेदारी समझथो। 14 काखे मै जानथो कि मोके हरबी हइ देह छांडै के पडही, जसना कि हमर परभु यीसु मसीह मोके परगट करे हबै। 15 मै एखर पूर धियान रखिहों, कि मोर कढ जाय के बाद तुम सगलू हइ बातन के सुरता रख सका।
मसीह संगति के आंखी देखै गवाही
16 जब हम तुमही अपन परभु यीसु मसीह के सक्ति अउ आमै के बारे हे बतायन, ता हम होंसियारी लग गढे हर किस्सन के मदत नेहको लयन, बलुक अपन आंखी लग ओखर महान काम के देखन। 17 जब यीसु मसीह बाफ भगवान लग इज्जत अउ महिमा पाइस, प्रतापमय महिमा ओही आदर करत हइ गोहराइस, “हइ मोर पिरिया टोरवा हबै, मै एखर लग मगन हबो✡भजन 2:7; यसा 42:1।” 18 जब हम पवितर डोंगर हे ओखर संग रहन, ता हम खुदय बादर लग आउत हइ आरो सुने रहन✡मत्ती 17:1-5; मरकुस 9:2-7।
19 इहैनिता ग्यानी मनसेन के बचन अउ बोहत बिस्वासओग हुइ गय हबै, ओखर हे तुम्हर धियान अक जिघा करैका ठीक हबै, ओसनेन निक्खा हबै जसना जलत हर चिमनी हे धियान अक जिघा करैका, जब तक सुबेन्नेन झइ होय अउ तुम्हर हिरदय हे भिनसारे के तरइया नेहको निकडथै। 20 पय सबले पहिले हइ समझ लेया कि पवितर किताब के कउनो आगू कर बात खुद ग्यानी मनसेन के अपन सोंच नेहको हबै। 21 काखे मनसेन के इक्छा लग कबहुन आगू कर बात नेहको हुइस, बलुक पवितर आतमा लग प्रेरित हुइके मनसे भगवान के तरफ लग बोलत रहिन।