9
Ki jiin niipoturu po
1 Yennu, n saa donta nan n par kur.
N saa pak wann bakitnauŋ toona nba kur ki a tun.
2 N Yabint Yennu, n sii yiin nan parpeenne kimaan a paak,
n sii yiine ki dontira.
3 Fi-i lekit, n datai tuu ŋmat poore; bi tuu baa tiŋ nie ki kpo.
4 A ŋan ki bia waa mɔnii a buut ni, ki bu fanu ki taa n po.
5 A biir yanbɔndamm nan nɔɔntont damm nawa.
Sɔɔ kan mi tiar bi po.
6 Ti datai boonte fas fas.
A biir bi digbana, ki ti tamm bi powa.
7 Ŋaan Yennu-e tee kpanbar yoo kur,
u maa u naan binbintir a wuu bu buut.
8 U dia tingbouŋ na nan popeenne,
ki bu niib buut nan li sɔnu.
9 Yennu-e tee binba di biak na sindandiiuk.
U boore tee gungurboor ninmɔnn yoo.
10 Yennu, binba mia na saa teena yadawa,
a ki yêen wunba baar a boori.
11 Yinin dontir yaŋ ki dont Yennu,
wunba tee kpanbar ki be Sayɔnn digbanjaann ni na,
pakin wann sɔɔ kur waa tun linba.
12 Yennu tian daansiab nba be fara niŋ na po,
u ki tammit bi mɔnii po, u daar binba dintib biak na tuba.
13 Yennu, ii mɔk ninbatinu nanin,
gotir n datai nba kɔɔnin biak nba ni na.
Yennu, nyintin kuun ni,
14 ki man fit set a niib boor Jerusalem,
ki wannib linba paak ki n dontira na.
N sii kpamme, kimaan a tinnima.
15 Binba ki jiantira na gbiir bootite, ki bia ŋmat baa leŋ;
bi tiɔŋ baruko soorib.
16 Yennu kasii buut niŋe ki u fiit u mɔŋ ki wann.
Ŋaan biit damm na tuu baa bi tiɔŋ toona nie.
17 Biit damm nan binba ki mi Yennu na ŋarin,
kuume tee bi joontu.
18 Yennu kan tamm talas damm po,
ki nandamm dindann mun kan teen yanni.
19 Baat, Yennu, daa te ki nisaarii nyanti.
Baat nan binba ki mia na a boor ki tan bu bi buut.
20 Ŋaant ki bin tin jaŋmaanii.
Ŋaant ki bin bann nan bi tee niibe ki tan saa kpowa.