10
Yenmiaru nba jiin fatu po
1 Yennu, bee ki a fɔk nant nna?
Bee ki a tuu bɔr a mɔŋ yoo nba ki ti be mabir ni?
2 Biit damm na mɔk yuwannue ki dint tatimm biak;
sootib bi barit nba ki bi bar na ni.
3 Biit daanɔ want u mɔŋe, u yanbɔnlor na ni;
bonlonbiiuk daanɔ poor Yennu mɔporae ki yêenɔ.
4 Biit daanɔ baka kaa Yennu po.
U yuwannu ni, u dukii nan Yennu ki kpaa talasi.
5 Biit daanɔ bona kur saa fanue.
U ki bant Yennu buut nba tee biaŋinba;
U laa u dataie.
6 U tuu pak ki tur u mɔŋ a,
“N kan mi ki baa, n kan mi kɔɔ mabir ni.”
7 U mɔmaan tee mɔtont nan faak nan jaŋmaankɔɔntuk kɔɔe.
U kakii nan naŋ nan biit maan paku halii. 8 U tuu bɔr digbanbis nie
ki guu a wun kpi niib nba ki mɔk biit na.
U tuu chakin binba ki mɔk sommteeb nae.
9 U tuu dɔɔ u bɔr niŋ nan yanbɔr nae.
U dɔɔe ki guu tatimm na, ki u baruk tuu tan soorib,
ki wun jiib ki yaat namm.
10 Niib nba kaa sommteeb na, u faabe bir tiŋ ni;
u jii u panjatuk nae ki nyann talas damm na.
11 Biit damm yeen a, “Yennu baka kaa,
u mun u ninbinawa, u kan mi lati.”
12 Yennu, datir biit damm na tuba.
Tiat tatimm na po.
13 Li saa teen nlee ki biit daanɔ n yisin Yennu,
ki pak tur u mɔŋ a, “U kan dat n tubiri.”
14 Ŋaan a laat, a chakin mabir nan biak kure,
ki teen siir nan fan somm.
Talas daanɔ jikit u mɔŋ ki teenae.
A yɔɔ sommit fara damme.
15 A biir biit damm nan nɔɔntont damm paŋ na,
datir bi tuba, baa tun biit na paak,
halii nan baa tan saa nyik biit tumu.
16 Yennu-e sii tun tee kpanbar,
binba jiantir tingbana na saa bot u tiŋ ni.
17 Yennu, a saa gbiint binba sikint bi mɔŋ na miaruwa.
A saa turib parcheenna.
18 A saa gbiint kpeebii nan binba be mabir ni na mɔniiwa.
A saa bu ki sommiba, ki nisaarii nba baat nan kpikpiruk na
ji kan baar nan kpikpiruku.