22
Tont mɔnii nan dontir yaŋ
1 Yennu, Yennu, bee ki a nyikimi?
Ki n mɔ fabin ki loon a sommir, ki a ki turin sommiri.
2 Yennu, n bui yonnu ni nan nyiɔk kur, ki ki foi,
ŋaan ki a ki turin gatu,
3 ŋaan fine kar a naangbouŋ paak ki tee kasii,
ki Israel teeb dontira.
4 Ti yeejamm din teen fine yada.
Bi din teena yada, ki a tinnib.
5 Bi din yi a sann, ki laat tinnu,
ki teena yada ki ki kɔŋit a sommir.
6 N ji ki tee nisaarik kaa, n tee nanwubire,
ki niib piak ki butimin, ki bia sarikitin.
7 Binba kur laatin, ki bi sarikitin, ki sukiin, ki laan,
8 ki yeen a, “U teen Yennu yadae, ŋaant Yennu maŋ n tinnɔ;
Yennu maŋ-i loonɔ, bee ki u kan sommɔ?”
9 Fine din te ki n naa marin soona,
ki te ki n teena yada, n sanpantin niŋa.
10 N maa a paake daar nba ki n naa marin nawa,
ki a tee n Yennu nba guun yoo kur.
11 A daa fɔkitir nanin;
wahala baara, ki sɔɔ kaa ki saa sommin.
12 Datai bonchiann lintima, ki tee nan naajai na,
ki naan nan naaja-nyiatii nba nyii Basann tiŋ ni na.
13 Ki bi yaatir bi mɔi a bin patin,
ki li naan nan yanbɔr nba tuu yaat u mɔb na.
14 N paŋ gbenne, ki tee nan baa tuu kpaar nyun
ki lin yat tiŋ ni na, ki n kpaba tukit ki nyii dukina ni,
ki n wub tee nan kpan nba tuu nann na,
15 ki n kunkɔr koor nan tankoont na,
ki n lamm tab dindak ni, ki a nyikin tant ni nan n kpoe na.
16 Ki nibiit lintin ki tee nan bɔjote taan ki lintin na,
ki lont lont n niipant nan taapant.
17 Ki n kpaba kur nyɔɔn, ki n datai goriin ki kpamm;
18 ki bi tɔ naatɔɔt ki biit n liant.
19 Yennu, a daa fɔk nanin, baat yian ki tan fatin.
20 A fatin ki man nyi kuun ni; a nyinnin bɔi na ni.
21 A fatin yanbɔra na ni.
N paŋ gbenna, ki a nyinnin naaja-nyiatii na ni.
22 Ki n saa wann n niib faa tun ŋamm nba ki turin,
ki saa dont a sann bi tintaanu ni.
23 Yimm nba tiin Yennu jaŋmaanii, ii dont u sann.
Binba tee Jakɔb maaru kur, ii baakit u sann;
yimm nba tee Israel teeb, ii jiantɔ.
24 U ki yêen talas damm nba be mukir ni,
u ki nyɔr nyikib bi wahala ni;
u ki lekin u numm bi paak, ŋaan gbiintir ki teemm,
yoo nba ki bi fabin ki turɔ.
25 Nibur tintaanu niŋe ki n saa pak a sann
linba ki a tun turin na paak,
ki jii n piinii nba ki n senn mɔsonn na,
ki mann maruŋ niib nba jiantira na tɔɔnn.
26 Ki talas damm saa di ki gboo bi yamani,
ki binba baar Yennu boor saa pak u sann.
Bin mɔkit nan yoo nba kaa gbennu.
27 Digbana kur saa tiar Yennu po.
Durinya munn saa ŋmant u paak, ki booru kur saa jiantɔ.
28 Yennu-e tee kpanbar, ki dia digbana kur.
29 Karinbaandamm kur saa gbaan u tɔɔnn;
nisaarii kur tan saa gbaan u tɔɔnn, ki jiantɔ.
30 Maar paanu nba tan saa fiir saa jiantɔ,
ki bi tan saa pak tur maar paanu nba saa fiir na
ki jiin Yennu po.
31 Bi tan saa yet niib nba ki bi saa marib na a,
“Yennu tinn u niiba.”