55
Jɔɔ nba ki u naasinyɔɔk fukit u paak na Yenmiaru
1 Yennu, gbiintir n miaru;
a daa lekin a numm n fabinii na paaki.
2 Gbiintir, ki turin gatu; n dudukit bak nan daamiiwa.
3 Ki jaŋmaanii mɔkin nan n datai nba jeentin na.
Ki nɔɔnbiit damm goriin ninŋmiɔŋ,
ki baat nan daamii ki teenin, ki dont wutoor nanin ki namin.
4 Ki n yan put ki ŋmat, ki n nubir kuun;
5 ki jaŋmaanii te ki n jekir nan yanputuk,
6 ki n ji sunman ki n mɔk kpinkpant nan ŋmann na
ki bo yukir ki saan banfɔkir ki saa foi.
7 N bo saa yukire ki saan banfɔkir,
ki saa ŋamm n binbeboor muuk ni.
8 N bo saa kakite ki faa lanbouŋ
ki nyi wonpaaruk nba baat na ni.
9 Yennu, ŋmatir nɔɔnbiit damm na pinpakit,
kimaan n laat kunkɔna nan kpikpiruk doo ni.
10 Ki yonnu nan nyiɔk kur ki bi lin doo na ni,
ki tuun toonbiit, ki bia sukii niib ki daamiib.
11 Ki biiru be siar kur po doo na ni,
ki li sɔnii gbee nan fat-teeb nan fai damm.
12 Li-i bonni tee dataakie sukiin, n bo sii ŋmine,
li-i bonni tee ki n dataakie want u mɔŋe,
n bo saa bɔr n mɔŋe ki u kan lami,
13 ŋaan li tee fine, nisaarik nan min na,
ki tee n lɔɔ, n yɔnanmɔŋ.
14 Ki min nan fin tuu lakin mɔk pinpakit nan leeb
ki lakint ki jiantir Yennu, u ŋasaakak ni.
15 Ŋaant ki n datai n kpo yian,
ŋaant ki bin piib foot kaat ni,
kimaan toonbiit gɔrin ŋaan dɔɔ bi boore.
16 Ki n yiin n Yomdaanɔ Yennu ki boi sommir po,
ki u saa tinnin.
17 Li daajoouk, nan sanyiɔk, nan yonsuuk ni kur,
ki n bui fabin ki teenɔ, ki u gbia n kunkɔr.
18 Maa tookit tɔb nba na, u saa te man jen nan laafia,
datai bonchiann nba lek kɔn nanin na.
19 Yennu nba bo tee kpanbar pinpiik niwa na
saa gbat n miaru ki nyannib turin,
kimaan bi yêt bin lebit bi binbeŋa, ki bia ki tiin Yennu.
20 N yɔkperik lek u yɔɔsnba,
ki biir mɔlor nba ki u lor namm na.
21 Ki u mɔb ban ki gar kpan,
ŋaan ki naŋ gbee u para;
ki u mɔmaan ŋarii ki gar kpan,
ŋaan porii yian nan jukbanjai na.
22 Jiin a daamii kur ki tur Yennu, ki u sii guua;
u kan ban te ki binba be fanu na n baa.
23 Yennu, fine saa sikin nikpiirit nan fai damm na bi kaat ni;
a kan te ki bii be ki baar bi manfoor bonjinni.
Min ŋarin, fine ki n teena yada.