56
Yenmiaru nba jiin yada teenu po
1 Yennu, tinimin ninbaauk, kimaan niib mukisime.
N datai diinime yoo kur.
2 Ki n sanbiirteeb mukisin daa kur, ki niib bonchiann kɔn nanin.
3 Yabint daanɔ Yennu, mi-i tiin jaŋmaanii yoo nba,
fine ki n saa teen yada.
4 N teen Yennu-e yada ki ki mɔk jaŋmaanii,
ki dontir u sann, kimaan u mɔsonn na paak.
Nisaarik saa fit teenin bee?
5 Daa kur ki n datai labii n maan,
ki yɔɔ dukii baa saa teen biaŋinba ki biirin.
6 Ki bi taant leeb ki bɔriin,
ki gorii n sommir ni, nan baa saa teen biaŋinba ki kpin.
7 Yennu, bi biit na paak, a dat bi tuba,
ki nyann niib maŋ nan wutoor.
8 A mi n fabinii nba tee biaŋinba,
ki la n ninnyuut kann nba tee biaŋinba,
ki sɔb teen a gbouŋ ni.
9 Daar nba ki n saa boia sommir po na, n datai saa baae.
Ŋanne ki n saa bann nan fin Yennu taa n po.
10 Yennu, a mɔsonn paake ki n dontira.
11 Yennu, fine ki n teen yada, n kii tiin jaŋmaanii.
Nisaarik saa fit teenin bee?
12 Yennu, n saa tura mɔsonn nba ki n sat nae.
N saa tura niipoouko,
13 kimaan a nyinnin kuun niwa, ki guun, ki n ki gbiatir,
ki n saa somm nan fin Yennu, kii be a manfoor yentu ni.