57
Yenmiaru nba jiin sommir po
1 Tinimin ninbaauk, Yennu, tinimin ninbaauk,
kimaan a niŋe ki n seek gur.
A kpinkpant maasue ki n laat fatu,
daamii nba tuu baarin nan laa tuu tan gar.
2 N fabin ki tur Yabint Yennu,
Yennu nba teenin linba kur ki n loon.
3 U saa toon Yendɔuŋ ni ki tinnin, ki nyann n datai.
Yennu saa turin u lomm nan u barmɔnii.
4 N datai lintima, ki naan nan yanbɔra nba so niib na,
ki bi nyana tee nan kpana nan tɔrbann peenii na,
ki bi jerima di nan jukbanjai na.
5 Yennu, want a yabint sanpagbant ni,
ki ŋaan a baakir-ii be tingbouŋ na kur po.
6 N datai lu laauŋo a bin soorin, ki n be nan parbiir,
ki bi gbii bootuk, sɔnu nba ki n tɔkii na ni,
ŋaan ki bi mɔŋ tan baa li ni.
7 Yennu, n be nan parcheenne; n saa yin yaŋ ki donta.
8 N seek, fiit ki faa kɔnn nan bonmumɔɔt.
N saa fiir sanyafaare ki faa.
9 Yennu, n saa pak a sann, digbana kur ni.
N saa yin yaŋ ki tura, niib kur boor,
10 kimaan a lomm yab ki saa tuu sanpaak,
ki a kasii binbeŋ bia tuu sanpagbant.
11 Yennu, want a yabint, sanpagbant ni,
ki ŋaan a baakir-ii be tingbouŋ na kur po.