59
Yenmiaru nba jiin fat-n-mɔŋ po
1 Yennu, nyintin n datai nuu ni.
Gɔɔt datai nba fiir n paak na.
2 Nyintin toonbiit damm boor, ki tinnin nikpiirit nuu ni.
3 Gotir baa dɔɔ ki guu biaŋinba, a bin kpin.
Toonbiit damm tikii a bin biirin.
Li ki tee a n tun yanbɔmm koo ki biir siar kaa.
4 N ki tun ki biir siari, ŋaan ki bi tee siir a bin lekin.
Fiit ki sommin. Gotir n ninbaatir.
5 Yabint daanɔ Yennu, wunba tee Israel teeb Yennu,
fiit ki dat binba ki jiantira na tuba;
a daa tiin toonbiit damm ninbaauk.
6 Bi tuu tan ŋmat ki jen daajoouk, ki kɔɔ doo ni,
ki ŋmuut nan bɔi nae ki lin.
7 Gbiintir sukit nan mabiit nba nyi bi mɔi ni.
Ki bi jerima tee nan jukbanjai na ki nyi bi mɔi ni,
ki bi dukii nan sɔɔ ki gbia baa yeen linba na.
8 Yennu, fin ŋarin laabe, ki sarikit binba ki jiantira maŋ.
9 Yennu, n mɔk parcheenn a paŋ niŋe; fine tee n gungurboor.
10 Yennu loonin ki saa baar n boor,
ki te ki man nyann n datai.
11 Yennu, a daa kpibi.
Li-i tee ki a kpiib, n niib saa tamm bi tubdatu na poe.
A yatib nan a paŋ ki bii lin, ki fan nyannib,
fin Yennu nba tee ti guutɔɔ.
12 Yanbɔmm be bi para ni, ki bi mɔmaan kur tee biit.
Ŋaant ki bi moindib, kimaan bi sat mɔtont ki bia fa fai.
13 A boontib nan a wutoor, ki boontib fas fas,
ki sɔɔ kur n bann tingbouŋ na kur po
nan fin Yennu-e dia Israel teeb,
ki a paŋ bia yat be tingbouŋ na kur po.
14 N datai tuu tan jen daajoouk ki kɔɔ doo ni,
ki ŋmuut nan bɔi nae ki lin
15 nan bɔi nba tuu lin ki kpaan jeet biaŋinba na,
ki mɔ, li-i tee ki bi ki dii jaŋi.
16 N saa yin yaŋ ki jiin a paŋ po,
sanyiɔk ni kur, n saa yin yaŋ sanpaapo
ki jiin a lomm nba kaa gbennu na po,
kimaan fine tee n gungurboor,
ki tee n bunbɔr boor yoo nba ki n be daamii ni.
17 N saa yin yaŋ ki dont a sann; n paŋ nyi a boore.
Yennu-e tee n gungurboor, ki tee Yennu nba loonin.