60
Yenmiaru nba jiin fatu po
1 Yennu, a yêtita, ki te ki ti baa.
A donn wutoor ti paaka; mɔtana, jiantir ki tinnit.
2 A te ki tiŋ na jeke, ki a lootir yaan.
Li paak, a teb li fiat, kimaan li bɔkit dɔɔe jiak jiak.
3 A te ki a niib dii fara bonchiann
ki te ki ti ŋmaan gbeŋit nan ti yib daan na.
4 Ki binba baakita na, ki a teemm kpaanii,
a bin tan nyi biiru ni.
5 A tinnit nan a paŋ, ki turit gatu,
ki lin te binba ki a lomm na n la woruku.
6 Yennu be u kasii boor ki yet a,
“N saa jii nyannu ki bɔkit Sekem doo,
ki biit Sukof baauk ki tur n niib.
7 Gilead yent tee n yare,
ki Manase yent bia tee n yar.
Efraim yent tee n kut fokirike,
ki Juda yent tee n naan dammir.
8 N saa jii Moab teebe ki bii tee tatilaauk nba
ki n sii sokii bona li ni,
ki sii birin n taasaat Edom yent ni,
ki li sii tee nyinn nan mine yen yent maŋ,
ki hoot man nyann Filistia teeb na paak.”
9 Ŋmee saa jiin ki saan nanin digbanpaarir na ni?
Ŋmee saa jiin ki saan nanin Edom yent ni?
10 Yennu, a set yêtite-e?
A ji kii be nan ti kunkɔnkɔnna na-a?
11 Turint sommir ki tin nyann ti datai,
kimaan nisaarik sommir tee yann na.
12 Yennu-i be nant, ti saa nyanna;
u saa nyann ti datai ki turita.