68
Dontir nan niipoturu yaŋ
1 Yennu, fiit ki te ki a datai n yat,
ŋaant ki a datai n chiar ki yaat a boor.
2 A pebirib ki yatib nan wouŋ nba tuu pebir munyuut
ki yatir biaŋinba na,
ki te biit damm na n bot fin Yennu boor,
nan kpan nba tuu kpian muu ki nann biaŋinba na.
3 Niŋamm na ŋarin-ii mɔk parpeenn,
kii kpamm Yennu tɔɔnn.
Bii mɔk parpeenn kii yikin nan kpinkpammuk.
4 Yinin yanii ki tur Yennu, yinin ki dont u sann,
yinin ki dont daanɔ nba jaak sanpagbouŋ paak;
ki u sann tee Yennu na. Ii mɔk parpeenn u tɔɔnn.
5 Yennu nba be u kasii ŋasaakak ni na,
u baka be kpeebii nan pakɔi po, ki u goriib.
6 U teen binba ki mɔk kunkɔɔ boor na ŋei, ki bi kɔɔ,
ki nyint dansarkɔɔra, ki bi be nan parpeenn,
ŋaan binba tee mɔyêtdamm na sii kɔɔ tiŋ nba saat nie.
7 Yennu, yoo nba ki a din ŋmakit a niib
ki somm gar namm kunkoouk paak na,
8 tingbouŋ din jeke, ki sanpagbouŋ loot, ki saak baa,
kimaan fin Yennu nba yen Sainai jɔɔr na din baate,
fin nba tee Israel teeb Yennu na.
9 Yennu, a din te saak baa bonchiann,
ki ŋamm pant tiŋ nba bo saat na.
10 Ki a niib jii tiŋ maŋ ki teen bi doo.
Yennu, a ŋant paak, ki a teen talas damm linba ki bi loon.
11 Yennu tur u sennu, ki poob bonchiann mɔɔnt maan maŋ a,
12 “Kpanbara nan bi kunkɔnkɔnna chiar yaat.”
Ki poob nba be ŋei ni na biit mɔkint nba ki bi chiar
ŋaan nyik na,
13 ki li tee ŋmana ki bi nan ki jii salimpeena ki taanir,
ki jii salimmɔna ki teen bi kpinkpant paak na.
Bee ki i siab biar be pei sinsuuk ni tɔb daari?
14 Yoo nba ki Yabint Yennu din yat kpanbara
tiŋ na paak na,
li din tee nan sakaana nba baa Salmonn kunkonn paak nae.
15 Basann jɔɔt tee jɔjaanae ki tee porik porik.
16 Bee ki jɔjaana nba porin na fumm nan kunkonn nba
ki Yennu gann ki sii be leŋ nan yoo nba kaa paak na?
17 Yennu saa jii taantorit tusbamm,
ki nyi Sainai jɔɔr paak, ki kɔɔ u kasii binbeboor.
18 U saa jii binba ki u nyann ki soorib na,
ki do namm sanpaapo, ki saa gaar piinii niib boor,
niib nba tee mɔyêtdamm na gbaa, u saa gaar bi piiniiwa.
Yabint Yennu, a sii be leŋe.
19 Pakin Yennu, wunba jikin ti jik-kpiata daar n tuu daar na;
u tee Yennu nba saa tinnite.
20 Ti Yennu-e tee Yennu nba saa tinnit,
ŋɔɔe tee Yennu, ki tee ti Yomdaanɔ ki nyintit kuun ni.
21 Barmɔnii, Yennu saa yeer u datai yura,
ŋamme tee binba yɔɔ be bi yanbɔmm sɔnu ni na.
22 Yennu yet a,
“N saa nyinn i datai Basann ki jen namm,
ki bia nyinnib mɔkgbeŋa ni ki jen namm,
23 ki te yin somm bi sɔn ni,
ki bia te ki i bɔi n lenii bi sɔn, baa loon biaŋinba.”
24 Yennu, niib kur la a nyannu sommira.
N la a nichiɔŋ na somm saa
fin Yennu nba tee n kpanbar na kasii ŋaak ni,
25 ki yanyinna be tɔɔnn po,
ki binba peeb bonpipebit joont poor,
ki sapaamm nba jeen naayaka foo sinsuuk ni.
26 “Pakin Yennu man, u nibur sinsuuk ni;
pakin Yennu man, yimm nba kur tee Jakɔb yaaboona.”
27 Benjaminn boorue saa liit, ŋamme ki yab;
ki Juda saakab nan bi booru saa wei bi poor,
ki Sebulunn nan Naftali saakab saa wei paan.
28 Yennu, want a paŋ nan a yiikoo,
a yiikoo nba ki a tuu dia ki sommitit na,
29 A jiantu ŋasaakak nba be Jerusalem na paak,
ki kpanbara saa baar nan piinii ki tura.
30 A yakii nan Ijipt nba naan nan bonkob-gbeŋir
nba be kinkauk niŋ na,
ki bia yakii nan digbana nba naan nan naajai
nba ŋmat nan naabis na,
ki te ki bi kur n sikin bi mɔŋ ki jii bi likirii ki tura;
ki yat niib nba mɔk niɔŋ ki loon tɔbii faanu na.
31 Taatara nba see digbanlia taa ni na saa nyi Ijipt
ki baar Yennu boor,
ki Itiopia teeb saa donn bi nii ki miar Yennu.
32 Yinin yaŋ ki tur Yennu, durinya teeb,
yinin ki dont Yennu maŋ,
33 ki tur ŋɔɔ nba jaak yaayoo ni sanpagbouŋ paak na.
Gbiintir u satian-paarii.
34 Ii mɔɔnt Yennu yiikoo,
wunba yaa yabint paŋ be Israel teeb paak na,
ki u yiikoo be sanpagbant ni na.
35 Yennu baakir yab, ki u be u kasii binbeboor.
Ŋɔɔ Israel teeb Yennu teen u niib paŋ nan yiikoo.
Pakin Yennu man.