69
Ki jiin fabinii nba loon sommir po
1 Yennu, a tinnin, kimaan nyun na dian n yiake.
2 N fer kpii bakir niŋe, ki n taa ki siit tiŋi.
N baar nyunsunsuŋ niŋa, ki nyunpana yaa lin piinin.
3 N bake nan maa yikin ki loon sommir,
ki n kunkɔr ji ton, ki n ninbina mɔnn ki n kpaan fin Yennu.
4 Binba namin ki li ki mɔk paak na yab
ki gar n yur paak yuta;
niib bonchiann tee n datai ki namin, ki li ki mɔk paaki,
ki tee binba loon ki bin biirin,
ki mianin a man jiin maa ki jan linba.
5 Yennu, n yanbɔmm ki bɔr a boori,
ki a mi maa jatik biaŋinba.
6 N Yomdaanɔ Yabint Yennu, a daa te ki n baat nan fei
ki teen binba teena yada na.
Israel teeb Yennu, a daa te ki n dint binba jiantira na fei,
7 kimaan a yaa sann paak, ki bi sukiin ki dintin fei.
8 Ki n tee nan saamɔ na, n ninjamm boor,
ki bia tee nan boorganu na, n ŋaateeb boor.
9 Maa loon a ŋaak biaŋinba na, n par di muue,
ki sukit nba bo sii tee a yar na, ki li baa n paak.
10 Ki n sikin n mɔŋ ki lor mɔb, ki niib sukiin;
11 ki n lia kuun fabinii liant, ki bi laan.
12 Ki bi piak n paak sɔnjot ni, ki dayibira yinin yanii.
13 N Yomdaanɔ Yennu, min ŋarin saa miarawa.
A turin gatu yoo nba ki a loon;
gatir ki turin kimaan a lomm paak,
nan faa gbeent a mɔsonn ki tint niib na paak.
14 A tinnin ki n daa kpii bakir na ni,
ki tinnin ki min nyi n datai na ni,
ki bia nyinnin nyunsunsuŋ na ni.
15 A daa te ki nyunpana na piintin,
koo ki te ki n di nyun, sunsuŋ na ni,
koo ki n fer kpii kaauk na ni.
16 Yennu, jiin a lomm nba ki gbent na ki turin gatu;
jiin a ninbatinchiɔŋ na ki ŋmant n paak.
17 A daa lekin a numm min a toontunnɔ paak;
n be wahalbiiuk niŋe, a turin gatu mɔtana.
18 Baat n boor ki tan tinnin, ki nyinnin n datai nuu ni.
19 A mi baa sukiin biaŋinba, ki mi maa di fei,
ki bi butimin biaŋinba; a laat n datai kur.
20 Sukit biir n pare, ki te ki n biar yann.
Ki n kpaan wunba saa maan n par, ŋaan n ki la sɔɔ;
ki kpaan wunba saa korimin, ki bia ki la sɔɔ.
21 Ki kon nba mɔkin yoo nba, ki bi turin lɔbii,
ki nyunnyukuru soorin, ki bi turin damiituk.
22 A te ki bi diina jaamm n kpant barit,
ki te bi maruŋ jaamm na n baanib.
23 A te ki bin jɔɔn, ki te bi sai ni-ii tun kii yiar.
24 A donn wutoor bi paak, ki te a wutobiiuk na n boontib,
25 ki ŋaan bi kaaŋ na n biar yann,
ki daa te sɔɔ kɔɔ bi binbeboor na jikii,
26 Bi dint binba ki a dat bi tuba nae biak,
ki bia piak niib nba ki a turib danii na wahala po.
27 Sɔbin bi yanbɔmm kur ki bir;
a daa te ki bi laat tor a tinnu na ni.
28 A piin bi sana manfoor gbouŋ na ni;
a daa te ki bi sana pukii a niib na ni.
29 N be nan gbanantont nan ninbaatire;
Yennu, ŋaant ki a tinnu na-ii guun.
30 N saa yin yaŋe ki dont Yennu sann,
ki bia mɔɔnt u yabint ki turɔ niipoouk.
31 Linba na saa maŋ Yennu ki chee mi-i turɔ naab
ki li tee piinii,
ki bia chee mi-i jii naajak nan yina ki mann maruŋ.
32 Talasdamm na-i la nna, bi sii mɔk parpeenne;
ki binba jiantir Yennu na mɔk kpaŋ-n-mɔŋ.
33 Yennu-e gbiintir talas damm miaru,
ki ki tammit u niib nba be dansarii ni na po.
34 Sanpaak nan tingbouŋ nan mɔkgbeŋa,
nan bonfoa nba kur be li ni, pak Yennu man,
35 kimaan u saa tinn Jerusalem-a,
ki bia ŋamm maa Juda dolia,
ki u niib saa kɔɔ kar leŋ ki yent tiŋ na;
36 ki u toontunna na yaaboona saa yent tiŋ na,
ki niib nba loonɔ, ŋamme saa kɔɔ leŋ.