71
Nikper Yenmiaru
1 Yennu, n baar a boor ki loon fatue. A daa te ki n di fei.
2 Kimaan faa tee popeendaanɔ na, a sommin ki bia fatin.
Gbiintirin ki tinnin.
3 Ii tee n gungurboor, kii tee siaminba ki n sii yɔɔ be.
Yetir a kunkɔr ki lin tinnin,
kimaan fine tee n gungurboor nan n guutɔɔ.
4 Yennu, a fatin nɔɔnbiit damm nuu ni,
ki bia nyinnin nitont nan toonbiit damm paŋ ni.
5 Yabint Yennu, a nie ki n mɔk dindann,
ki teena yada, laa nyii n bisin niŋa.
6 Laa nyii n maaru niŋa, n maa a paake,
fine nyinnin n naa poor ni.
N sii tun piak a sanne.
7 N manfoor tee nyinne ki tur niib bonchiann,
kimaan a guun fanu.
8 N sii dontira daa kur, ki mɔɔntir a yabint.
9 A daa yêenin mɔtana ki yaa n kpeta;
a bia daa nyikinin ki yaa n gbanant baŋa,
10 kimaan n datai loon bin kpime,
bi piak ki lorin a bin biirime,
11 ki yeen a, “Yennu nyikɔwa,
ŋaant ki tin weiɔ ki soorɔ,
kimaan sɔɔ ji kaa ki saa fatɔ.”
12 Yennu, a daa fɔkitir nanimi.
Yennu, baat yian ki tan sommin.
13 A te ki n datai n kpakin nan fei;
ki binba loon bin biirin na n di fei ki boont.
14 Min ŋarin, n sii tun mɔk dindann nana,
ki piak a sann yoo n tuu yoo.
15 N saa pak a popeensin nba tee,
ki bia pak a tinnu po daar kur,
li lek yab gar n bannu nba teewa.
16 N saa tɔkin n Yomdaanɔ Yennu paŋ nie,
ki mɔɔnt u ŋant, u yar kɔɔe ki n saa mɔɔnt.
17 Yennu, maa din tee bika, ki a tumiin a mɔmaan,
n bia daa tian ki piak a bakitnauŋ toona po.
18 Yennu, mɔtana n ji kpet, ki n yut penna, a daa nyikinimi.
Ii be nanin, ki mii mɔɔntir a paŋ nan a yiikoo,
kii teen maaru nba waa kur.
19 Yennu, a popeensin saa tuu sanpagbante.
Fine tee daanɔ nba tun toonjaana,
ki sɔɔ ki be ki tee nan fin na.
20 A lek te daamii nan wahala baa n paak,
ŋaan a saa ŋammin ki te min la laafiawa;
a kan te ki man sik kaauk ni.
21 A saa te ki man teen nijaann ki gar maa bo teewa,
ki a bia saa ŋamm ki maan n para.
22 Yennu, n saa faa kɔnn ki donta,
kimaan a popeensin paak.
N saa yin yaŋ ki donta nan bonfifaat,
fin nba tee Israel teeb Kasii Daanɔ.
23 N saa yikin nan parpeenn,
yoo nba ki n yiin ki dontira na, kimaan a tinnima.
24 N saa pak a popeensin po daa kur,
kimaan niib nba koor a bin turin daŋ na,
n nyannib, ki bi dii feiwa.