72
Yenmiaru nba jiin kpanbar po
1 Yennu, a wann kpanbar ki wuu bu nan a popeensin na;
turimɔ a tiɔŋ barmɔnii,
2 ki lin te wun fit dia a niib nan barmɔnii,
ki bia dia talas damm na nan popeensin.
3 A te tiŋ na n tur niib na mɔkint,
ki niib na-ii be leŋ kii tee popeendamm.
4 Ki kpanbar na sii bu tarii buut nan barmɔnii,
kii sommit talas damm,
ŋaan kii sikint binba dint tarii biak na.
5 A te a niib na-ii yɔɔ kii jiantira nan yonnu nba yɔɔ do na,
kii biaki jiantira nan ŋmaarik nba yɔɔ do na,
ki saa tuu yoo nba kaa gbennu.
6 A te kpanbar na-ii tee nan saak nba tuu baa kpaant ni na,
kii biaki tee nan samimmiiuk nba tuu baa tiŋ paak na.
7 A te ki popeensin n yabit u manfoor yoo,
ki bia te mɔkint-ii yɔɔ kii be
nan ŋmaarik nba yɔɔ be biaŋinba na.
8 Ki u tingbouŋ yent saa lat ki nyi mɔkgbeŋir
ki saa tuu mɔkgbeŋleer;
ki nyi Yufrates mɔkir ki saa tuu tingbouŋ kur po.
9 Ki niib nba be kunkoouk paak na saa gbaan u tɔɔnn,
ki u datai saa baa fabin tiŋ ni.
10 Ki Speenn kpanbara nan binba kɔɔ tinii nba be
mɔkgbeŋa sinsuuk ni na saa jiantɔ;
ki Sieba nan Seba kpanbara saa baar nan piinii;
11 ki kpanbara kur saa gbaan u tɔɔnn,
ki digbana kur saa jiantɔ.
12 Ki u saa somm talas damm nba miarɔ
nan nandamm nba ki niib yêtib na.
13 Ki u sii mɔk ninbatinu nan talas damm,
nan nandamm, ki bia saa tinn tarii manfoa.
14 Ki u saa fat damm nba ki bi ŋmaŋib ki bia diimm,
kimaan bi manfoor mɔk nyɔɔt ki turɔ.
15 Kpanbar na manfoor n wei;
ki Sieba salima-ii tee u yar;
ki niib-ii mei Yennu u paak yoo kur,
ki Yennu piisim-ii be u paak yoo kur,
16 ki jeet-ii be tiŋ na ni, ki kunkona n gbee nan bonbuburit,
ki lon lɔɔna nan Lebanonn yar na, ki li doi n gbee nan niib,
ki lii tee nan mɔɔt nba tuu pia tiŋ paak na;
17 ki daa te bi tammit kpanbar na sann po;
ki te ki u sann n wei nan yonnu na;
ki digbana kur n boi Yennu ki wun teen piisin bi paak
nan waa teen kpanbar na paak biaŋinba na.
18 Dontir-ii be timm Israel teeb Yomdaanɔ Yennu na paak,
Ŋɔɔ kɔɔe tuun bakitnauŋ toona.
19 Ii dont u baakir sann, nan yoo nba kaa gbennu.
Tingbouŋ na kur n gbee nan u baakir.
Mamɔmm nan mamɔmm.
20 Linba nae joont ki tee Jese bija Defid Yenmiaru.