GBOUŊ ŊANTAA
73
(Yanii 73 -- 89)
Yennu barmɔnii gatu
1 Yennu set ŋan ki tur Israel teeb,
u ŋan ki tur binba para yeen na.
2 Min ŋarin, li bo kaa waan ki n ji bo kii mɔk dindann u ni,
n yada bo baa gbenn na,
3 kimaan n bo fumm nan dont-n-mɔŋ damm,
yoo nba ki n la nan nɔɔnbiit damm mɔkitir na.
4 Bi gbanant ki yekitir, ki bi wakii ki mɔk laafia.
5 Bi ki di fara nan nileeb na,
bi bia ki laat daamii nan nileeb na.
6 Li paak ki bi jii garuk ki tuun ki li tee tuliat,
ki jii kpikpiruk ki pin ki li tee nan chinchenn na;
7 ki bi para nyint bonbiir,
ki bi yan dukii toonbiit tumu ki ki bakitii.
8 Ki bi laa leeb ki piak mabiit ki teemm,
ki mɔk karinbaanii, ki lorin a bin biir leeb,
9 ki piak bonbiir ki jiint Yennu nba be yendɔuŋ ni na po,
ki dia garuk ki want tingbouŋ na niib baa sii tuun biaŋinba,
10 ki li te Yennu niib ŋmant ki teemm yada
nan linba kur ki bi yeen.
11 Bi yeen a, “Yennu kan banni;
wunba tee Yabint Daanɔ na kan banni.”
12 Nɔɔnbiit damm nba tee biaŋinbae na;
bi mɔk mɔkint bonchiann ki bia laat ki li pukiib.
13 Maa soor n mɔŋ ki ki tuun toonbiit na, li tee yanne-e?
14 Yennu, a te ki n bakit daa kur,
ki sanyiɔk ni kur ki a daar n tubir.
15 Li-i bonni tee ki n yet mabooru na,
n bo saa jurin a niibe.
16 Maa yabir ki dukin daamii na po, li paakime tee-e
17 nan maa tan kɔɔ a ŋasaakak na ni,
ki n ji bann linba tan saa baar nɔɔnbiit damm paak.
18 A tan saa sennib siaminba ŋarii, ki bin baa yot.
19 Li kpan biiribe ki bi ji siik ki saa woribuk ni.
20 Bi tee nan damiit nba tuu bot sanyiɔk ni nae;
Yennu, fi-i fiir, bi tuu bote.
21 Yoo nba ki n par bo biir na, n dudukit bo daamiimi,
22 n bo jatike nan peeuk na, ki ki bant a maan paaki,
23 ŋaan n lek be nanae yoo kur, ki a soor n niidiitu ki dian.
24 Ki a dian nan kpaanii, ki li joontik, a tan saa gaarin nan baakir.
25 N ji mɔk bee yendɔuŋ ni, li-i kii tee fini kaa?
Ki tingbouŋ na paak, n kii loon siar ki pukin a po.
26 N gbanant nan n yan saa baŋ,
ŋaan Yennu-e saa turin paŋ, ŋɔɔ kɔɔe ki n sii loon.
27 Niib nba nyik Yennu na saa kpakin yanne,
u saa biir binba ki be fanu nanɔ nawa.
28 Min ŋarin, li ŋan bonchiann nan maa naak Yennu na,
n jii Yabint daanɔ Yennu ki u teen n gungurboor.
N saa pak wann u toona kur.