74
Yenmiaru nba jiin Israel teeb po
1 Yennu, bee ki a nyikit nna?
A wutoor saa do a niib paak mɔkmɔk nan mɔkmɔk-aa?
2 Ii tian niib nba ki a bo gannib sianyoowa na po,
ki bi tee binba ki a bo nyinnib daabisin ni,
ki teemm a tiɔŋ niib na.
Ii tian Sayɔnn kunkonn nba ki a bo kɔɔ li ni na po.
3 A somm tangbiina nba dɔɔ na paak;
ti datai biir linba kur be a ŋasaakak niwa.
4 A datai yikin ki kpamm a ŋasaakak ni,
ki chaan bi farimii leŋ, ki li want nyannu nyinn.
5 Ki bi tee nan niib nba tuu dia pai ki chɔɔn tiinii na,
6 ki dia pajara ki chɔɔn taabii dikpina,
7 ki joo a ŋasaakak na muu,
ki biir a niib nba jiantira siaminba na,
8 ki yet bi para ni a bi saa biirite fas fas,
ki joo kasii boor kur muu, tingbouŋ na ni.
9 Ki ti ki la ti kasii bona, ki a sɔkiniinba sɔɔ ki biar,
ki ti sɔɔ mun ki mi laa sii tee nna ki wei biaŋinba.
10 Yennu, ti datai saa sarika ki lin wei nlee?
Datai na saa biir a sann mɔkmɔk nan mɔkmɔk-ee?
11 Bee ki a yêt fan sommiti?
Bee ki a lor a nii poor po? Lotir a nii ki biirib turit.
12 Yennu, fine tee ti kpanbar pinpiik niwa,
ki tinnit nan taar munŋaa nawa tiŋ na ni,
13 ki jii a panchiɔŋ ki te mɔkgbeŋir bɔkit,
ki faa yeer bonsusoot nba be nyun ni na yura.
14 Fine din faa but bonsusoouk nba ki bi yiu
Lefiatann na yura,
ki jii u gbanant ki dinn bonkobit nba be muuk ni na.
15 Fine din loot nyuntona nan mɔktona,
fine bia din te ki kpengbeŋa fɔɔr.
16 Fine din nan yonnu nan nyiɔk,
ki senn yonnu nan ŋmaarik, ki bi be bi binbeboa.
17 Fine din bɔkit tiŋ na terii, ki te ki piar nan siɔk be.
18 Yennu, tiat nan a datai sarikitae,
bi teen jatite ki biir a sann.
19 A daa ŋaan a niib ki teen bi databiit na,
a bia daa tammit a niib nba la daamii na po.
20 Tiat mɔlor nba ki a lor nant na po,
kimaan toonbiit yat gbee tingbouŋ na lɔtii kur powa.
21 A daa te ki niib nba ki bi diimm na di fei,
a te nandamm nan talas damm n dont a sann.
22 Yennu, fiit a tiɔŋ ki somm a niib,
tiat nibiit nba sarikita biaŋinba daar kur na.
23 A daa tammit a datai nba donn wutoa ki tian tintianii na,
nan fuut nba ki a datai fu yoo kur na po.