75
Yennu-e tee buut daanɔ
1 Yennu, ti teena niipoouk,
ti teena niipoouk, kimaan a naak nant.
Ti piak a yabint nba tee biaŋinba,
ki bia want a bakitnauŋ toona nba ki a tuun.
2 Yennu yet a, “N senn buut yooe,
ki saa bu nan barmɔnii.
3 Tiŋ na, nan li niib kur-i taŋi jek yoo nba,
ŋaan mine sii diab, ki bi kan damm.
4 N beer nɔɔnbiit damm na, maa bin nyik tonu,
5 ki bia daa dont bi mɔŋ, ki mɔk yuwannu.”
6 Sɔɔ kaa ki saa nyi yondo po koo yonbaa po
koo niidiitu po koo niigaŋ po ki fit donn nisaariki;
7 Yennu kɔɔe tee buut daanɔ,
u bu ki teen yenɔ kaat, ki bia bu ki teen lɔɔ mɔnii.
8 Yennu dia nyubitike,
ki li gbee nan daamii nba tee u wutoor,
ki u kpaan mɔ, ki tingbouŋ na nɔɔnbiit damm nyu;
bi nyuu li kur ki gbenn.
9 Min ŋarin kan nyik nan man pak ki dont Yennu,
wunba ki Jakɔb din jiantir na,
n bia saa yin yanii ki dontɔ.
10 U saa pot nɔɔnbiit damm paŋ,
ŋaan pukin kasii damm yar.