76
Yennu-e tee nyannu daanɔ
1 Yennu sann nyɔɔnt Juda yent ni,
ki u sann la baakir Israel tingbouŋ ni,
2 ki u ŋaak be Jerusalem,
ki u binbeboor tee Sayɔnn kunkonn paak.
3 Leŋe ki u kɔnn datai na peenii,
ki kɔnn bi naagbankɔŋa nan jukbanjai,
barmɔnii, u bia kɔnn bi jatiat kurawa.
4 Yennu, a gbee nan yentue, ki a yabint ŋan,
ki a nyii kunkona tiŋ nba ki a nyann a datai na ni.
5 Ki bi jii kunkɔnkɔnna maŋ nba mɔk linba kur,
ki bi ji biar gɔɔnt kuun gɔɔn,
ki bi paŋ nan bi bannu kur teen yann.
6 Fin Yennu nba ki Jakɔb din jiantir na,
yoo nba ki a yakii namm na,
ki bi taanii nan taanjakira baa ki kpo kpo.
7 Yennu, fin kuukɔɔe ki ti sii tiina jaŋmaanii;
li-i tee ki a wutoor doo, sɔɔ kan fit set a tɔɔnni.
8-9 Yennu, a mɔɔnt a buut yendɔuŋ niŋa,
yoo nba ki a fiir a fan bu ki somm binba ki bi diimm
tiŋ na paak na,
ki jaŋmaanii kɔɔ tingbouŋ na, ki u ŋmin soon.
10 Barmɔnii, a wutoor-i baa a datai paak,
niib tuu tura dontire,
ki niib nba nyii tɔb na ni saa tiar ki teen jaamm.
11 Turin i Yomdaanɔ Yennu linba ki i senn mɔsonn
a i saa turɔ na. Ii baar nan i piinii ki turɔ.
Digbana nba kur kpiai na n baar nan bi piinii
ki tur Yennu nba ki nisaarik tiinɔ na.
12 U te ki doo diara sikint bi mɔŋ,
ki te tingbouŋ na kpanbara tiinɔ jaŋmaanii.