83
Yenmiaru ki jiin Israel teeb datai nyannu po
1 Yennu, a daa ŋmini, a daa ŋmin ki taantir.
2 Gotir, a datai nba yêen ki ki saak a mɔb.
3 Bi bɔrii ki lorin lora a bin biir a niib;
bi lorin a bin biir binba ki a guub na,
4 ki yeen leeb a, “Ii saana man ki tin boont digbann na,
ti daa te ki Israel sann ji puuri.”
5 Ki bi kur taan dudukyent ki lor a bin biira.
6 Ki Edom teeb, nan Ismael teeb, nan Moab teeb,
nan Hagar booru ni niib,
7 nan Gebal teeb, nan Amonn teeb, nan Amalek teeb,
nan Filistia teeb, nan Taya doo ni niib taan a bin kɔn nana.
8 Ki Asiria teeb mun taan Amonn teeb
nan Moab teeb nba tee Lot yaaboona na po.
9 Teentib nan faa din tun biaŋinba ki tur Midiann teeb,
nan faa bia din tun biaŋinba ki tur Sisera nan Jabinn,
Kisonn mɔkir ni na,
10 binba ki ti din biirib Endor doo ni,
ki bi gbanant dɔɔ ki tan bat na.
11 Teent bi nijaana nan faa din tun biaŋinba
ki tur bat Oreb nan bat Seeb na,
ki nyann bi tɔɔndamm kur nan faa din tun biaŋinba
ki tur bat Seba nan bat Salmuna na.
12 Ŋamme din yet a, “Ŋaant ki tin fat Yennu tiŋ na ki yent.”
13 Yennu, ŋaant ki bii tee nan tangbiruŋ na,
kii biaki tee nan fouŋ nba ki wouŋ tuu pebir na.
14-15 Wein ki berib nan wonpaaruk,
ki da wonpaaruk ki fibitib,
ki kɔɔmm jaŋmaanii nan muu nba tuu di muuk na,
koo nan muu nba tuu di ki lenn kunkona na.
16 Yennu, dintib fei, ki lin te niib kur n lon a boor.
17 A te ki bii di fei yoo kur, kii tiin jaŋmaanii.
Ŋaant bin kpo nan fei.
18 Ŋaant ki bin bann nan fine tee Yennu,
ki tee yabint daanɔ, tingbouŋ na kur po.