127
Dontir nba jiin Yennu ŋamm po
1 Yennu-i kii maa ŋaak, tanmaara na bakint tee yanne;
Yennu-i kii guur doo, niib nba guu na, bi guuru kaa nyɔɔt.
2 Nirɔ-i nyi sanyafaar ki tuun toonn nan u paŋ kur,
ki jent kɔɔ daajobɔnbiir, a u poor n gboo paak, li kaa nyɔɔti,
kimaan Yennu-e piin binba ki u loomm na bonloŋa,
yoo nba ki bi dɔɔ gɔɔn ni.
3 Waas tee piiniie ki Yennu teen, bi tee piisime nan barmɔnii.
4 Jɔɔ-i mɔk bonjai u naasint ni,
li tee nan kunkɔnkɔnnɔ nba dia peenii u nuu ni nae.
5 Jɔɔ nba mɔk peenii maŋ booru bonchiann,
parpeenn tee u yare, kimaan wuu took u datai, buut boor,
ŋaan bi kan ban nyannɔ.