147
Dontir nba saa Yabint Yennu boor
1 Pakin Yennu man.
Li ŋan ki tin yin dontir yanii ki tur Yennu;
li ŋan ki bia took nan tin kpakitɔ.
2 Yennu ŋammit Jerusalem-e,
u jent nan binba ki datai din soorib ki yaat namm nae.
3 U teen binba para ni la daŋ nae laafia, ki lorin bi fiat.
4 Ŋɔɔe nan ŋmaabira, ki bi kann yab dian waa loon biaŋinba,
ki u tuu yiin ŋmaabir kur nan u sann.
5 Ti Yomdaanɔe tee Yenjaann ki mɔk paŋ,
ki u yanfoon kaa bikinu.
6 Yennu-e dont binba mɔk sikin-n-mɔŋ na,
ŋaan sikint biit damm na tiŋ ni.
7 Yinin dontir yaŋ kii teen Yennu man;
faan kɔnn ki yin yaŋ ki tur ti Yomdaanɔ man.
8 Ŋɔɔe te sanpagbant baak sanpaapo;
ŋɔɔe te saak baa tingbouŋ na paak,
ki te mɔɔt pia kunkona paak.
9 Ŋɔɔe teen bonkobit jeet ki bi di,
ŋɔɔe dint kinkabira yoo nba ki bi mɔ kon.
10 U parpeenn ki be tanpaarii ni kaa,
koo u par ki mei kunkɔnkɔnna nba mɔk para paak kaa,
11 ŋaan u par mei damm nba baakitɔ na paake,
nan damm nba teen yada nan u lomm nba kaa gbennu na paak.
12 Jerusalem, pakin Yennu.
Sayɔnn doo, pakin a Yennu.
13 Ŋɔɔe te ki a tammɔkɔɔka wakii.
Ŋɔɔe tee piisin a niib paak.
14 Ŋɔɔe te ki a tiŋ be li yamani,
ki jikit jeŋant ki gboonta.
15 U tuu tur tingbouŋ na mɔbe,
ki linba ki u yet na n tun yiama.
16 U tuu te ki wunn n yat nan gbent nae,
ki bia yat marin nan tangbiruŋ na,
17 ki te ki sakaana n baa nan tansakina na,
ki sɔɔ kaa ki saa fit took waat nba ki u tuu tun na.
18 Ŋaan wuu yet mɔmaan, nyuntana na tuu nanne,
u tuu tun wouŋo ki te ki nyun puub.
19 U tuu jii mɔmaame ki tur u niib,
ki jii u wannu nan u sennii ki tur u niib Israel teeb,
20 ŋaan u ki tun linba na booru ki tur nileeb na,
bi ki mi u sennii maŋi.
Pakin Yennu man.