148
Durinya kur n dont Yennu
1 Pakin Yennu man.
Pakimɔ man sanpagbant ni,
yimm nba be sanpaapo na.
2 Pakimɔ man, yimm nba tee u malakanba na,
yimm nba tee sanpaapo kunkɔnkɔnna na.
3 Yonnu nan ŋmaarik n pak ki dontɔ,
pakimɔ man, yimm nba tee ŋmaabirnyinyira na.
4 Sanpaak nan nyun nba be sanpagbant liik po na n pak dontɔ.
5 Ŋaant ki bi kur n pak dont Yennu sann,
kimaan u din pak mɔmaame ki namm.
6 U sennue din te ki bi be bi binbeboa yaayoo siiyoo,
ki kan fit yêt u mɔb.
7 Yimm nba be tingbouŋ na paak, ii pak dont Yennu man,
nyun ni bonkob-gbeŋa nan nyunsunsunt kur,
8 li sanyikintii nan sakaana, nan wunn nan sanpagbant,
nan wonpaaruk nba saak u mɔb na.
9 Jɔjaana nan kunkona nan tilontii nan fɔɔr,
ii dont Yennu man,
10 bonkobit kur, li ŋaak ni yab nan muuk ni yab,
bonbubɔkit nan bon-yuyukit.
11 Ii pak dontɔ man, kpanbara nan niib kur,
kpanbar ŋaajab nan doo diara kur,
12 sapaamm nan naasimm, nikpera nan waas,
13 ŋaant ki bi kur n pak dont Yennu sann.
U sann yab ki gar sanlia kur,
ki u baakir yab ki gar sanpaak nan tingbouŋ na kur.
14 U te ki u digbann na mɔk paŋ
ki li te u niib kur dontirɔe,
Israel niib nba ki u loomm bonchiann na.
Pakin Yennu man.