1 Imbah samuaan kajadian nang itu, Allah mauji kaimanan Ibrahim.

“Ui, Ibrahim” ujar Allah baucap.

“Pun” sahut Ibrahim.

2 “Bawa Ishak, anak ikam nang saikungannya, nang ikam sayangi tu, lalu tulak ja ka banua Moria. Di situ di salah satu gunung nang pacang Kutuduhakan lawan ikam, parsambahakan inya manjadi kurban banaman gasan Aku” ujar Allah manjalasakan.

3 Isuknya, imbah bangun guring, baisukan banar, Ibrahim mambalah kayu gasan mambanam kurban. Imbah dijaratnya kayu tadi, diandaknya di lapak kaladainya, wan dikiaunya dua ikung pambantunya wan Ishak, anaknya. Lalu tulakan ai bubuhannya ka wadah nang dipadahakan Allah lawan sidin. 4 Imbah talu hari bajalan, gunung nang itu sudah talihat ulih Ibrahim matan jauh.

5 “Hadangi di sini haja bubuhan ikam lawan kaladai ini. Aku wan anakku handak tulak ka sana, kami handak sambahyang, imbah itu kami babulik pulang ka sini kaina” ujar Ibrahim baucap lawan dua ikung pambantunya.

6 Diambil sidin kayu gasan mambanam kurban tu, lalu disuruh sidin Ishak manyahan kayu tu. Sadangkan sidin saurang mambawa bara api wan lading. Lalu tulakan ai kaduduannya bajalan baimbai.

7 “Bah” ujar Ishak baucap lawan abahnya.

“Kanapa nak?” sahut sidin.

“Bara api wan kayu sudah ada di sini, tagal anak domba nang cagar dibanam gasan kurban, mana inya bah?” ujar Ishak batakun.

8 “Allah, nak ai, nang pacangan manyadiakan anak domba tu, nang jadi kurban banaman gasan Inya” sahut sidin.

Lalu bajalan pulang kaduduannya baimbai.

9 Imbah sampai ka wadah nang dipadahakan Allah tu, Ibrahim manyusun batu maulah mija gasan mambanam kurban. Disusunnya kayu gasan mambanam, dijaratnya Ishak anaknya tu, lalu diandaknya di atas kayu tu nang ada di atas mija batu tu. 10 Imbah itu, sidin maambil lading. Pas handak manyumbalih anaknya, 11 bakakajutan tadangar suara malaikat Allah di langit.

“Him, Him, Ibrahim!” ujar malaikat Allah mangiau.

“Pun” sahut sidin.

12 “Jangan dimatiꞌi anak ikam tu, wan jangan diapa-apai inya, sualnya wayah ini Allah sudah tahu amun ikam tu hurmat wan maasi lawan parintah-Nya. Lawan pulang, ikam langsung hakun mamparsambahakan anak ikam, nang saikungannya tu gasan Allah” ujar malaikat Allah baucap.

13 Ibrahim manulih lalu talihat saikung domba laki di balakang sidin nang tanduknya takait di padang sabat. Diambil sidin domba tu lalu dikurbanakannya gasan mahurupi anaknya. Lalu domba tu dibanamnya.

14 Lantaran itu, wadah nang itu dingarani sidin “Allah manyadiakan”. Lantaran itu pulang, sampai wayah ini urang-urang biasa baucap, “Di atas gunung pacang disadiakan Allah.”

15 Lalu malaikat Allah baucap pulang matan langit lawan Ibrahim.

16 “Aku, Brim ai, basumpah demi ngaranKu saurang. Lantaran ikam sudah balaku nang kaya itu, wan langsung hakun mamparsambahakan anak ikam nang saikungannya gasan Aku, 17 maka Aku pacangan bujur-bujur mambarkahi ikam. Juriat ikam pacangan Kuulah banyak banar nang kaya bintang di langit wan karangan di pantai. Juriat ikam tu pacangan manguasai kota kota musuhnya. 18 Malalui juriat ikam, samunyaan bangsa di bumi pacangan Ku-barkahi lantaran ikam maasi lawan pirman-Ku” ujar malaikat tadi manyampaiakan Pirman Allah lawan Ibrahim.

19 Babulik ai Ibrahim wan anaknya mandapati kadua pambantunya lalu bubuhannya tulakan baimbai ka Kota Bersyeba. Lalu, Ibrahim salajur bagana di situ. 20  21  22  23  24