M̃esi Napano Pol Bivitauiaio Ban
Namonoeano Lu Nalo Na
EVESO
Verialiano Moti
Tukunu bulati na niosi nei
Burupati jidomiano napano Pol berio ea m̃esi nei napano naio jirio ba ban namoneano nalo na Evesas, nina iliano na mirano takurano togio duelimo (1:10) napano berii Atua kiano tiiano. Naio berinavo Atua jidom ka vite nalo napano naio jiilo, mia amei vio takurano. Naio jidom ka vite nalo na tiniabene a na yetemeriba mia amei aiasol lo ea Kristo, napano naio jibe ka be parinio ka vite nalo nonovio. Mia Pol berii burum̃ara Atua kiano tiiano, napano tiiano nene be tomu nalo na vio nonovio ka nalo aiasol vatitigio ea voroniano ve takurano ga, a amijikia ala tibena ver amonea Yesu Kristo. Mia naio ber vatitigio bo ban Atua kiano tomu nalo ka averial tiiano nene ea kialo meuliano.
Ea m̃esi nei togio na beamu, Pol berii m̃arabo napano Atua Karmado mila ka tomu nalo amei ve takurano. Naio berii bajago nei napano Atua bijauia bulag kiano tomu nalo, a berii napano ea Yesu Kristo Atua Kererinio, Atua nai biekokoa kanano tomu nalo, ana barbulag kialo kareano nalo, milalo amilala. Mia naio berii bunu napano Atua jian Niununo Lu ban kiano tomu nalo, ka averial napano naio mia sian vite nalo vanlo, tibe napano naio berkario ka rilaio. Ea m̃esi nei togio juo [2] nene, Pol ber ka tomu nalo ka mia avuluku m̃esi nene, ka nalo monoka averial ka abe takurano bija Kristo, ea bajago na mia amijikia aiasol vatitig vija namoneano dolu nalo.
Pol berii jamerijiano nalo, ka verial bajago na Atua kiano tomu nalo aju amiasol vatitig ea Kristo. Naio berinavo yimo lu naio jibe mokotenado napano Kristo be parinio kanio, a jibe yimo napano Kristo be martea novo na sudu nene, a jibe tira napano Kristo be koano. Atua tinien miia laka tomu nalo na yetemeriba, a tomu nalo amial tinietiiano nei ea Kristo. Atua kiano burum̃ara tinietiiano nei julu Pol kiano jidomiano, naruei naio berial kiano moneano ea m̃esi nei. M̃esi nei berial Kristo kiano bajago napano naio tinien miia kito, m̃aro ka rivulu bulag kito, a jo miija kito ea kiano tinieseseiano ka kito romemedu vatitig ea Atua mirano.
Torogio nalo na niosi nei
Iliano moti 1:1—2
Kristo bija kiano yimo lu 1:3—3:21
Meuliano vou ea Kristo 4:1—6:20
Iliano maariano 6:21-24
1
Pol jikar kiano iliano banlo
1 Im̃auo 18:19-21, 19:1Kiniou Pol, napano Atua naio bitirilar kiniou ka neve kiano toro tai napano nojom̃a ber bulag Ioluano Vou nei, napano nebe Kristo Yesu kiano atevi, kiniou nejirii m̃esi nei viedu ban kamiu namoneano nalo na komeli labo na vio Eveso, napano kamiu na kubiekouo ea Kristo Yesu.
2 Kiniou nobolkouo ka kamiu ka mia tiniememiano a tum̃aro na Atua karam̃ado kiano a na kiado Tubo Yesu Kristo, to vija kamiu bunu.
Atua milivu ka kito ea Kristo
3 Bo kanio kito reiaia Atua, napano naio be Atua ka kiado Tubo Yesu Kristo, a napano naio be karam̃ano bunu, bior kito napano robe takurano bija Kristo, Atua naio mila vatitig kito bo laka ka ilivuiano novo nalo ea vio mave. 4 Nina jibe bogo na vio yetano nei naio makanio vo, ana Atua naio berko kito ruei kan romei rove takurano kiteaku Kristo, ka rove kanano, a kan kiado meuliano naio rimeravo rivu ea mirano, napano mia maka niamiamo tai toaio. 5 Beamu laka, bior kiano burum̃ara tinietiiano, ana Atua naio midu kito roju kanio mia naio riviobulag kito rove kenerinio nalo ea Yesu Kristo. Vite na, Atua naio mila memedu ka nana naio mialio ber bo ka mia naio rilaio, a naio jaaro toru bunu ka rilaio. 6 !Reiaia Atua rivior kiano burum̃ara tiniememiano nei, a ka kiano ijaiano novo nei na naio jian kurano ga kanio ban kito, miyotuba ea kenerinio na naio jidom m̃elea naio!
7 Kolo 1:14Ja na kenerinio naio miou, mia kario vite na kito napano robe takurano kitoliko Kristo nene, ana Atua naio buru bulag kito, napano naio biekokoa kiado kariano nalo. !Riano ga, Atua kanano tiniememiano ka kito naio toru laka, ba lie vo! 8 Atua naio be masou laka, mia naio bitilubar vite nonovio, 9 ana naio jaaro ka rijamo ka kito rejikia kiano jidomiano tai napano beamu naio be navigivaniano tai ka kito. Naio mila jidomiano nene binimei meravo batitig bo ka kito, a kiano jidomiano ka rim̃auka vite novo nalo ve telabo ea Kristo ga. 10 Ea jidomiano nei naruei, mia Atua naio riasol vatitig vite nalo napano naio jiilo atu vio ve takurano, nina ea vio mave a ea vio yetano, nalo amei yetano ka Kristo, a mia Atua naio rim̃auka batitig vite nonovio rimemedu ka kiano jidomiano, rivano-o rila nono batitig rivu ea bogo nene rimemedu.
11 Vite nalo nonovio monoka amalmaluvo rimemedu ga ka na Atua naio jidomkakar ka rilaio. Mia jakii kiano jidomiano nei nanua beamu, naio berkar berinavo kumemi kulo Israel ka kumemi nuve kiano, ka kumemi nuve takurano kumemi liko Kristo. 12 Kumemi nei naruei, Atua bitiri bulag kumemi ka mia nuvitu tukamu ka mia nuvidu kenememi jidomiano to sikili ea Kristo, tenene na, bo ka kumemi monoka nuviaia Atua bogo nonovio, bior naio bo laka.
13 Mia kamiu kulo dolu nalo bunu, napano kamiu maka kuve kulo Ju nalo, kamiu kumijog iliano riano nei ruei, napano be Ioluano Vou napano kubokar kenemiu ioruriano eaio. Kamiu kumonea Kristo ruei, ana kubinimei kube Atua kiano tomu nalo ruei. Ana bior kamiu kube kiano, Atua naio midu tovo na vite na monea kamiu, napano naio jian Niununo Lu ban kamiu, jibe ka napano naio berkario. 14 Ana Niununo Lu nene, naio jibe ka Atua kiano verikariano togio na jukamu nene ban kito, ka mia kito rejikia vatitigio ka mave ka Niununo napano, kito rovokar nono jajum̃ano na be kiado, nina ea bogo na mia Atua naio rivuru bulag tomu nalo avan eaio, nina nalo ga napano naio bul bulaglo ruei abe kiano. !Kito reiaia Atua, bior naio bo laka!
Pol kiano volkouano
15-16 Bior ka vite nalo na, bogo nonovio, ea kanaku volkouano, kiniou nojo nojidomial kamiu, a nojo nober siva toru ban Atua bior kamiu. Bajago na, nejikar ea bogo napano nomijog ka kamiu kumonea jikili Yesu, kiado Tubo, a kumisidomii toru namoneano lu dolu nalo, naruei binimei bokar banei, kiniou nojo nobolkouo jibe na. 17 Bogo nonovio na nojom̃a nobolkouo ban Atua, napano naio be Atua ka Yesu Kristo kiado Tubo, a napano naio be karam̃ado na mermerano na toru, nojo nobika denio ka naio rudu Niununo na masouano a Niununo na verialiano van kamiu, ka kuvijikia Atua ve toru lie vo.
18 Ana na nojom̃a nobika denio ka naio rivetavo ea kenemiu jidomiano, ka mia kuvitilubar kiano yulu, a ka kuvijikia vite nalo napano Atua naio bio kamiu kanio, a ka kenemiu jidomiano naio monoka sikili lie vo ka mia kuvokar vite nalo na. Vite nalo napano, naio be kenemiu jajum̃ano, jibe ka vite na bo telabo napano Atua mila batitigio ju, ka ve namoneano lu nalo kanalo. 19 A vija naio bunu, kamiu monoka kuvitilubar a monoka kuvijikia batitig kanano burum̃ara moroano na toru, napano naio jo mim̃au ea kiado meuliano napano romonea naio. 20 Nina burum̃ara moroano nene kia ga navo napano Atua naio mim̃au eaio, bogo napano naio bitirilar Kristo naio meul bereio den nam̃ariano, karina, naio buru naio ba midu naio jotano ea vameruo na naio ea vio mave. 21 Moroano nene, naio mave loa ka moroano dolu nalo, a vite dolu nalo na jikirkili, a tomu na tortoru dolu nalo, a navurim̃araboiano dolu nalo na mave. Mia Kristo siano naio jo mave laka laka loa sio dolu nalo, maka ea vio yetano nei ga, mia ea yetemeriba dolu bunu na mia rimei. 22 Kolo 1:18Atua naio midu vite nalo nonovio aju yetano ka Kristo jaano, a naio bitirilar Kristo ea tum̃aro lu na kiano, ka mia naio ve parinio ka saba nonovio. 23 Mia kiano tum̃aro lu nei, naio jibe ka tati na Kristo, napano bujo batitig ka Kristo, napano naio bujo batitig ea saba nalo ea vio nonovio.