Bibeli Luayãtaalá Yoɛli 4

Yoɛli
<
4
>

4

Dii yã́kpalɛkɛa ń buiↄ

1 Gwa! Gↄↄ bee, zĩbeezĩ,

tó ma Yelusalɛũdeↄ ń Yudaↄ píi dìlɛ ń pá ziu,

2 má buiↄ kãaa píi

mà pilańnↄ yã́kpalɛkɛguzulɛu.

We má yã́kpalɛkɛuńnↄ

ma gbɛ̃́ Isailiↄ ń ma bùsuo yã́ musu,

asa aa ma gbɛ̃́ↄ fã̀aa dṹniau,

aa ma bùsupi kpaalɛ̀kↄ̃ɛɛ.

3 Aa tɛ́lɛpà aa ma gbɛ̃́ↄ kpaalɛ̀okↄ̃ɛ,

aa ma nɛgↄ̃ɛↄ ń ma nɛnↄɛↄ yìa,

aa káaluakà aa vɛ̃ɛmì ń a ↄ̃ao.

4 Tiideↄ ń Sidↄ̃deↄ*

ń Filitɛ̃ bùsu zↄ̃lɛdeↄ píi,

á ye sɛmanↄ kpelewa ni?

Álɛ yã́ pↄ́ má kɛ̀ɛ́ fĩabomɛɛ yã̀?

Tó álɛ a fĩabomɛɛ,

má tó a wi á musu kã́ndo gↄ̃̀ↄɛ.

5 Asa a ma ã́nusu ń ma vuao sɛ̀lɛ,

a ma pↄmaa bɛɛɛdeↄ sɛ̀lɛ a taò

á kàlɛ á tã́akpɛↄ guuɛ.

6 A Yelusalɛũdeↄ ń Yudaↄ píi yìa Gɛlɛkiↄwa,

kɛ́ à ń kɛ̃́ ń bùsuwa zã̀ yã́i.

7 Gwa! Má ń vu iu,

aai fɛlɛ gu pↄ́ a ń yiau,

mí yã́ pↄ́ á kɛ̀nɛ́pi wíɛ́ á musu.

8 Má á nɛgↄ̃ɛↄ ń á nɛnↄɛↄ yía Yudaↄwa,

aai ń yía Seba pↄ́ kú zã̀ↄwa.

Ma Dii mámɛ má ò.

9 Yã́ɛ bee kpàwakɛ buiↄnɛ:

À zĩ̀ sↄukɛ à nɛgↄ̃naↄ vu iu,

í tó zĩgↄ̃ↄ fɛlɛ sↄ̃ kãi ḿpii.

10 À á soonaↄpi fɛ̃ndaↄ ũ,

à á máaso limibobↄↄ lilɛ sↄ̃naↄ ũ.†

Gbãasaide o gↄ̃san a ũ.

11 Bui píi, à bↄ gupiiu,

à mↄ kãaa we kpakpa.

Dii, pilamá ń n nɛgↄ̃naↄ!

12 Buiↄ vu iu,

aai gɛ́ yã́kpalɛkɛguzulɛu,

asa we má zↄ̃lɛu

mà yã́kpalɛkɛ ń gupii buiↄ.

13 An vãikɛa kɛ̀ zài!

Kↄma ká pↄ́i ǹ kɛ̃́,

asa à mà à kà kɛkɛaɛ.‡

À mↄ ↄ̃zↄ̃ vɛ̃ɛwa a fɛ̃kĩiu,

asa à pàɛ,§ vɛ̃ɛkakĩiↄ pà yɛlɛlɛ.

14 Wa ku we dasidasi yã́kpalɛ midɛguzulɛu,

asa Dii yã́kpalɛkɛgↄↄ kãikũ̀

yã́kpalɛ midɛguzulɛuɛ.

15 Ĩatɛ̃ ń mↄvuao a siakũ,

saanaↄ tɛkɛ lↄo.

16 Dii a bↄ Siↄna ń kãaao,

a bↄ Yelusalɛũ ń lↄↄ gbãao.

Musu ń zĩ́lɛo a lualua,

ãma Dii aↄ dɛ ulɛkĩi ũ a gbɛ̃́ↄnɛɛ,

aↄ dɛ aafia'ekĩi ũ Isailiↄnɛ.

17 Íↄ dↄ̃ sa kɛ́ ma Dii á Lua,

má kú Siↄna musu, ma gbɛ pↄ́ a kua adoapi.

Yelusalɛũá ma pↄ́ɛ,

buipãleↄ si wɛ̃́lɛpiu bau lↄo.

18 Gↄↄ bee gbɛ̀sĩsĩↄ vɛ̃ɛbɛ a kwɛ́,

mɛ́ sĩ̀sĩↄ pↄtuoↄ vĩ aↄ diɛ.

Yuda bùsu swadↄↄe í a zↄ̃ɛo.

Nibↄna a bↄ Dii kpɛ́u à bàalɛ,

i mↄ̀sɛpisi lɛpusia guzulɛu.

19 Egipi a gↄ̃ gbáa gii ũ,

Ɛdↄũ a gↄ̃ guwaiwai ũ

yãpãsĩ pↄ́ aa kɛ̀ Yudaↄnɛ yã́i,

asa aa yãesaidepiↄ dɛ̀dɛ ń bùsuuɛ.

20 Yuda bùsu aↄ kálɛa gↄↄpiiɛ,

wiↄ ku Yelusalɛũ wɛ̃ ń wɛ̃o.

21 Tↄ pↄ́ mi sínɛ́ yãao ↄ̃ má sínɛ́ sa.

Ma Dii, míↄ ku Siↄna.

Yoɛli
<
4
>

*4:4 Isa 23.1-18, Mat 11.21-22

†4:10 Isa 2.4

‡4:13 Zia 14.15

§4:13 Zia 14.20, 19.15