Bibeli Luayãtaalá Yuda 1

YUDA

Yã́ pↄ́ kú láɛ bee guuↄ

Yuda lá ń Piɛɛ lá plaadeo (lɛɛ 2) aa waasokɛn ɛgɛnaↄ yã'ò ń yãvãi pↄ́ aaìↄ kũaↄɛ. Lán Zaakiwa Yudaá Yesu dãunaɛ lↄ.

Yuda zↄadↄ̀ waasokɛn ɛgɛnaↄ pↄ́ an yã́ gɛ̃̀ Yesudeↄ guuↄwa pãsĩpãsĩ, à go pↄ́ a ń gbɛ̃ yã'ò (3-16). A ò Yesudeↄnɛ aa zɛ gbãa Yesu náaikɛa guu (17-23). À lápi mìdɛ ń Lua tↄbↄao.

Lápi yã́ pↄ́ ɛɛ ì'inɛ́ yã́ bↄↄlɛkɛ̀, mɛ́ à àizãna pↄ́ wá wɛ́ dↄi naa Lua ń Yesu Kilisiowa guu yã'ò lↄ (20-21).

Waasokɛn ɛgɛnaↄ

1 Mámɛmaa Yuda, Yesu Kilisi zↄ̀blena, Zaaki dãuna.* Mámɛ ma láɛ bee kɛ̃̀ Mae Lua yenzide pↄ́ à ń sisi a ń kũa naa Yesu Kilisiwa guuↄnɛ. 2 Lua sùuu ń aafiao ń a yeaázio nↄnↄaaɛ́.

3 Ma gbɛ̃́ yenzideↄ, má ye mà lákɛ̃ɛ́ yãa wápii suabaa yã́ musu, ↄ̃ má è à kũ̀ teasiɛ mà kɛ̃́ɛ́ mà lɛdaowá à gí ń ázĩao Yesu yã́ pↄ́ Lua nàɛ́ á ↄzĩ gɛ̃n do e gↄↄpii musu. 4 Asa luayãdansaiↄ gɛ̃̀ wá guu kpã́i,† aaì wá Lua gbɛ̃kɛ e ń wisaiyãkɛa zɛ́ ũɛ, aaì lelekpa wá Dii mɛ̀ndona Yesu Kilisizi. Ĩa pↄ́ Lua a damá kú aà yã́ taala guu à gɛ̃̀gɛ̃.

5 Kɛ́ Dii Isailiↄ bↄ̀lɛ Egipi,‡ a gbɛa à gbɛ̃́ pↄ́ aai a náaikɛoↄ dɛ̀dɛ.§ Má ye mà yã́pi dↄágu, baa kɛ́ á dↄ̃ kↄ̀. 6 Malaika pↄ́ aai zɛ ń ń luakpamaoo aa pãkpà ń kúkĩiziↄ sↄ̃, Lua ń ká gusiau yeyea ń mↄdaonao àↄ dↄmá gↄↄpiiɛ e yã́kpalɛkɛgↄↄ zↄ̃ↄ zĩ́. 7 Sↄdↄũ ń Gↄmↄↄo ń wɛ̃́lɛ pↄ́ liaańziↄ gbɛ̃́ↄ yã́ bee taa kɛ̀ sↄ̃, aa ńzĩa kpà gbãsĩ dↄ̀ↄsai kɛawa.* An kaalɛa dɛ ĩadama ń tɛ́ gasaio seela ũɛ. 8 Luayãdansai nana'onapiↄ lɛ́ kɛ màa sↄ̃ɛ. Aaì ńzĩa da gbãsĩkɛau, aaì gi ikoyãi, aaì malaika gawideↄ sↄ̃́sↄ̃. 9 Baa malaikaↄ kía Misɛli, gↄↄ pↄ́ àlɛ lɛkpaakɛ ń Ibiisio Mↄizi gɛ yã́ musu, i we à aà sↄ̃̀sↄ̃ à yãdàaàlao, ãma a òɛ̀ a kↄ̃ le ń Diio.† 10 Gbɛ̃́piↄ sↄ̃ aaì yã́ pↄ́ wa a gbadↄ̃o bɛ̃̀ɛboɛ. Ɔ̃nↄ pↄ́ wà ń íò ↄ̃ aa vĩ lán nↄ̀bↄↄwa làasoosai, ↄ̃ ì gɛ̃ńnↄ kaalɛu. 11 Waiyoo ampiↄ, aa Kainu‡ zɛ́ sɛ̀. Aa sì Balaaũ§ sã́sãau ↄ̃a yã́i. Aa bↄ̀ Lua kpɛ lán Kolewa,* aa ↄ̃̀ↄkpà laaàwa. 12 Aa dɛ sãa ũ á gbɛ̃kɛ vĩa ń kↄ̃o blɛbleaↄ guu. Aaì pↄbleánↄ, wí lí ń kũo. An nↄ̀sɛ yã́ aaì gↄ̃́gↄ̃. Aa dɛ lán lousisia pↄ́ ì gɛ̃ ń ĩ́anao masaiwaɛ. Aa gà gɛ̃n pla lán lí nɛ'isai pↄ́ bilɛawaɛ. 13 Aa dɛ lán isukaa pãsĩwa, aaì fùla vãi bↄ an wisaiyãkɛaↄ ũ. Aa dɛ lán saambɛbɛnaↄwa, gusia níinii ↄ̃ Lua dìlɛnɛ́ àↄ ń yàaekɛò gↄↄpii.

14 Za Adamu lɛ́u e à gɛ̀ pɛ̀ Ɛnↄkiwa mae ń nɛ́o ku lɛɛ soplaɛ, ↄ̃ Ɛnↄkipi† dↄ̀aa ń yã'ò à mɛ̀, á è Dii lɛ́ mↄ́ ń a gbɛ̃́ↄ, an dasi lɛ́ vĩo, 15 kɛ́ aà yã́kpalɛkɛ ń gbɛ̃́piio, i yãda a yãdansai duunkɛnaↄla píi, yã́ pↄ́ aa kɛ̀ a yãdasaikɛ guu yã́i ń a tↄ́ bɛ̃̀ɛ pↄ́ aa sìↄ píi. 16 Gbɛ̃́piↄá yãkeledeↄnɛ, yãe lí káńguo. An pↄ́ niakaa mɛ́ ì dↄaanɛ́, aaì ĩ́anadã ń yãzↄ̃ↄo, aaì lɛnakasa gbɛ̃́ↄnɛ ài'ea yã́i.

Kↄ̃ zɛdↄa

17 Ápiↄ sↄ̃ ma gbɛ̃́ yenzideↄ, à to yã́ pↄ́ wá Dii Yesu Kilisi zĩnaↄ dↄ̀aa òɛ́ dↄágu. 18 Aa òɛ́ gↄↄgbɛzãzĩ gbɛ̃́ pↄ́ an luayãdasai pↄ́ niakaa lɛ́ dↄaanɛ́ↄ aa á kɛ pↄ́ↄpↄↄɛ.‡ 19 Gbɛ̃́piↄ ì to gbɛ̃́ↄ kɛ̃aaɛ, anzĩa pↄeã mɛ́ ì dↄaanɛ́, aa Lua Nisĩna vĩo. 20 Ápiↄ ma gbɛ̃́ yenzideↄ, à kↄ̃ zɛdↄ á lousisizɛ guu, íↄ wabikɛ ń aà Nisĩna gbãao. 21 Àↄ zɛa Lua yeawázi guu, íↄ wɛdↄ wá Dii Yesu Kilisizi e aà gɛ wá ká àizãnawa a gbɛ̃kɛ guu. 22 À wɛ̃nadↄ̃ gbɛ̃́ pↄ́ kú seaseaↄnɛ. 23 À gbɛ̃eↄ sí tɛ́wa à ń suaba. À wɛ̃nadↄ̃ gbɛ̃pãleↄnɛ ń laaio, í za baa an pↄkasa pↄ́ gbãsĩkpà an dàakɛa guuↄu.

24-25 Lua mɛ̀ndona wá Suabana a fↄ̃ à á dↄ̃́a kɛ́ ásu fuo, i á kpán'aɛkɛ a gawi guu sãasai ń pↄnao ń wá Dii Yesu Kilisi gbãao. Ɔ̃mɛ gawi ń zↄ̃ↄkɛo ń gbãao ń ikoo vĩ zadↄ̃ gↄↄ i daalɛo ń a tiao e gↄↄpii. Ãmi.

Yuda
<
1
>

*1:1 Mat 13.55

†1:4 Gal 2.4

‡1:5 Bↄa 12.51

§1:5 Nao 14.29-30

*1:7 Daa 19.1-25

†1:9 Zkl 3.2

‡1:11 Daa 4.3-8

§1:11 Nao 22.1-35

*1:11 Nao 16.1-35

†1:14 Daa 5.21-24

‡1:18 2Piɛ 3.3