Bibeli Luayãtaalá Filipideↄ 1

FILIPIDEƆ

Yã́ pↄ́ kú láɛ bee guuↄ

Báapua bùsu wɛ̃́lɛ sɛ̃́ia pↄ́ Pↄlu baonakpàu ↄ̃ wì mɛ Filipi, Lomadeↄ bùsu zi pↄ́ wì mɛ Masedoni guu. Bùsupi ku Gɛlɛsi bùsu gugbãntoo oiɛ. Pↄlu wɛ̃́lɛgɛa gɛ̃n plaade guu ↄ̃ à Yesu gãlipi dàalɛu (Zĩn 16.12-40). Wɛ̃̀ dasiↄ gbɛa, gↄↄ pↄ́ a dɛ dakpɛuna ũ, ↄ̃ à lápi kɛ̃̀ Filipideↄnɛ ń nↄ̀sɛmɛndoo. Àlɛ ń sáaukpa an gba pↄ́ aa kpã̀sãɛ gↄↄ pↄ́ Ɛpafↄdi lɛ́ mↄ́ a gwai. À mↄ lè gↄↄ bee sↄ̃ a ku yã'ĩa guuɛ. Àlɛ onɛ́ lá aa dɛ náaideↄ ũ Kilisiɛ, aasu to ãnabi ɛgɛna pↄ́ aa kú ń guuↄ yã́ↄ ń sã́são.

Pↄlu yã́ dàalɛ à mɛ̀ (1.1-11) tó a làasookɛ̀ Filipi Yesudeↄ yã́wa, a pↄ ì kɛ naɛ, i Lua sáaukpa ń yã́ musu. Bee gbɛa à yã́ pↄ́ a leↄ bↄↄlɛkɛ̀nɛ́. A yã́ pↄ́ a su a le dↄ̃o, ãma àlɛ Lua náaikɛ naa Yesu Kilisiwa (1.12-26). À lɛdà Yesudeↄwa aa zɛ gbãa, aaiↄ Lua náaikɛ, an lɛ́ iↄ doũ, aa ńzĩa busakↄ̃ɛ, aai zↄble Luaɛ lá Yesu Kilisi a zɛ́ ↄ̀lↄnɛ́wa (1.27-2.18). Wà Yesu Kilisi kua ń aà zĩo yã'ò lɛ pↄ́ Yesudeↄ ì si guu (2.6-11). Ɛpafↄdi pↄ́ Filipideↄ aà zĩ̀ ń gbao Pↄluɛ ń Timↄteeo tò lɛdoũ pↄ́ Pↄlu vĩ ń Filipideↄ lɛ́ dɛdɛɛ (2.19-30).

Bee gbɛa Pↄlu ònɛ́ aa laaika gbɛ̃́ pↄ́ aalɛ baonakpa a zɛ́waoↄzi. A ònɛ́ aali a kɛa kɛ, aali dɛ̃ɛka aa yã́ pↄ́ aalɛ yá le. Aa gↄ̃ lán Yesu Kilisiwa (lɛɛ 3). Lápi mìdɛ ń lɛdaamáo ń sáaukpaao ń fↄkpaamáↄɛ.

Wì mɛ lápiɛ pↄna lá, asa wà pↄna yã'ò lápiu sɛa a daalɛkĩi e a láakĩiwaɛ. Pↄna ì bↄ Kilisi náaikɛa kĩ́iɛ. Ń ye ǹyↄ̃ pↄnapi vĩ sↄ̃a?

Pↄlu wabikɛa Filipideↄnɛ

1 Ma Pↄlu ń Timↄteeo, wá Kilisi Yesu zↄ̀blenaↄ wámɛ wa láɛ bee kɛ̃̀ Lua gbɛ̃́ pↄ́ kú Filipi* naa Kilisi Yesuwaↄnɛ ń ń gbɛ̃zↄ̃ↄↄ ń ń dↄnlɛdeↄ. 2 Lua wá Mae ń Dii Yesu Kilisio gbɛ̃kɛkɛɛ́, aai á gba aafia.

3 Gↄↄ pↄ́ á yã́ dↄ̀magu píi, miↄ ma Lua sáaukpaɛ. 4 Ma wabikɛa guu píi miↄ wabikɛɛ́ ápii ń pↄnao, 5 kɛ́ á ↄ kumanↄ baonakpaa guu za gↄↄ pↄ́ á mà e ń a gbão yã́i. 6 Má dↄ̃ sã́asã, lá Lua zĩ maa dàalɛ á guu, aↄ kɛ, i a midɛ Kilisi Yesu mↄ́zĩ. 7 A maa kɛ́ máↄ á yã́ kũa ápii màa, asa á yã́ dↄ ma sↄ̃wa. Ma daakpɛun nò, ma zɛa ń baonapio a sĩana bↄa yã́in nò, ápii á ↄ ku zĩ pↄ́ Lua dàmɛɛ a gbɛ̃kɛu guu. 8 Málɛ á bɛɛkɛ ápii, lá má kú Kilisi Yesu sↄ̃ guuwa. Lua mɛ́ ma seelade ũ. 9 Mi wabikɛɛ́ á yeakↄ̃i àↄ kã́fĩ àↄ gɛ́ dↄ̃a ń wɛ́kɛ̃a wásawasao guu, 10 kɛ́ à e yã́ pↄ́ maa àↄ kɛ dↄ̃, íↄ ku nↄ̀sɛdoũdeↄ ũ tàaesai Kilisi mↄ́zĩ.† 11 Beewa maakɛa pↄ́ Yesu Kilisi ì mↄònɛ́ a liála, wi Lua tↄbↄ, wi aà sáaukpa.

Kilisi mɛ́ Pↄlu wɛ̃ni ũ

12 Gbɛ̃́ↄ, má ye àↄ dↄ̃ kɛ́ yã́ pↄ́ ma le tɛkpà baona gɛa aɛuɛ, 13 ↄ̃ sosa kibɛdↄ̃anaↄ píi ń gbɛ̃́ kĩniↄ dↄ̃̀ kɛ́ Kilisi yã́i wà ma dai kpɛ́u.‡ 14 Ma daakpɛu yã́i wá gbɛ̃́ dasideↄ Dii náaikɛ̀ dɛ yãala, ↄ̃ an sↄ̃dilɛa kã̀fĩ, aalɛ Lua yã'o gbɛ̃́ↄnɛ vĩasai.

15 Sĩanaɛ, an gbɛ̃eↄ ì Kilisi yã́ waasokɛ dɛnla ń wɛdↄakↄ̃ɛo yã́iɛ, gbɛ̃eↄ sↄ̃ ń nↄ̀sɛmaao. 16 Gbɛ̃́ beeↄ ì kɛ ń yeamazioɛ, asa aa dↄ̃ kɛ́ zɛa ń Yesu baokpaao yã́i ma yeò kpɛ́u la. 17 Wɛdↄnɛdepiↄ sↄ̃ aaì Kilisi yã́ waasokɛ dɛnlawɛɛlɛa yã́iɛ, i kɛ ń nↄ̀sɛpuao no. Aalɛ e wàlɛ ma kua kpɛ́u taasi kã́fĩmɛɛɛ. 18 Yãe yã̀? Mↄafili guun nò, sĩana guun nò, apii lé, wàlɛ Kilisi yã́ waasokɛɛ. Ma pↄ na ń beeo, mɛ́ ma pↄ a ɛa kɛ na lↄ, 19 asa má dↄ̃ kɛ́ wabi pↄ́ álɛ kɛmɛɛ ń Yesu Kilisi Nisĩna dↄnlɛo a to mà bↄ. 20 Ma wɛ́ dↄi mɛ́ má a náai vĩ maamaa, kɛ́ wí a ma kũ yãe guuo. Asa máↄ Kilisi tↄbↄ ma kuau ń sↄ̃o dilɛa gↄↄpiiɛ, atɛ̃sa tia, má kún nò, ma gan nò. 21 Asa Kilisi yã́i má kúi, mɛ́ ga dɛmɛɛ ài ũ. 22 Ãma tó má kú wɛ̃ni guu, bee dɛmɛɛ zĩ àide ũ. Má dↄ̃ lá má sɛo, 23 má kú plaplaɛ. Má ye ta màↄ kú ń Kilisio, we maamɛɛ dɛ lakĩia zã̀zã. 24 Ãma à kũ̀ màↄ ku wɛ̃ni guu á yã́iɛ. 25 Bee fɛ̃a vĩo. Má dↄ̃ kɛ́ má gↄ̃ màↄ kúánↄ ápii, kɛ́ à e gɛ́ aɛ ń pↄnao luanaaikɛa guu. 26 Beewa gↄↄ pↄ́ má ɛa mↄ á gwai, á á naa Kilisi Yesuwa ĩ́andãa zɛ́ e maamaa ma yã́i.

27 Apii lé, tó ma mↄ á gwai ge mi mↄon nò, à tó á kua kpaaĩ ń Kilisi baona yã́o, kɛ́ tó málɛ á bao ma, mà ma á zɛa gíũgiũ ń lɛdoũo, álɛ dɛ̃ɛka ń nↄ̀sɛmɛndoo baonapi zɛ́ yã́i. 28 Ásu tó á ibɛɛↄ yãe iwãa ká á pↄao. Bee aↄ dɛnɛ́ seela ũ kɛ́ aa mipɛ̀ kaalɛwa, ápiↄ sↄ̃ bↄa maa. Bee bↄ̀ Lua kĩ́iɛ. 29 Asa Lua á gbá zɛ́ à taasikɛ Kilisiɛ, i kɛ aà náaikɛa ado no. 30 Dɛ̃ɛ pↄ́ á è málɛ ká yãa§ mɛ́ á mà málɛ ká e tia, á kú dɛ̃ɛ doũpi guu.

*1:1 Zĩn 16.12

†1:10 1Kln 1.8

‡1:13 Zĩn 28.30

§1:30 Zĩn 16.19-24