1 Ntɛ Dɔsɔk da kəsata ka aSuyif «Pantɛkɔt» dɛnabəp mɔ, alaŋ a Yesu fəp ŋanaloŋkanɛ kəfo kin.*Pantɛkɔt, Məmɔmən Lev 23.15-21; Deut 16.9-11. Itɔ kəren o kəren aSuyif ŋamboc kəsata ka kətɛl tatɔkɔ tataka ta wəco kəcamət (50) kɔ Pak pəŋcepər-ɛ. 2 Gbəŋcana babɔkɔ kɔ pukulɛ pəyɛfɛ dəkɔm mpɛ pɛnawurɛnɛ pukulɛ pa afef ŋɔpɔŋ mɔ, kɔ pɛlas kəlɔ kaŋkɔ ŋanandɛ disrɛ mɔ. 3 Kɔ memer mowurər ŋa mmɛ mɛnawurɛnɛ ma nɛŋc mɔ. Kɔ meyerəsɛnɛ fəp faŋan, kɔ temer tɛntəpnɛ nwɛ o nwɛ dətobu. 4 Kɔ Amera Ŋecempi ŋa Kanu ŋender ŋa fəp, kɔ ŋayɛfɛ kəcɔp nwɛ o nwɛ kusu kəcuru. Amera Ŋecempi ŋɔŋc-sɔŋɛ ŋa kəcɔp tatɔkɔ.† Məmɔmən 1.5, 8 (toloku ta kəsɔŋ temer Amera Ŋecempi ŋa Kanu.)

5 Awa tɛm tatɔkɔ aSuyif asumpər dinɛ gbiŋ aŋɛ ŋanayɛfɛ tɔf ya doru fəp mɔ, ŋanandɛ dare da Yerusalɛm. 6 Ntɛ ŋane pukulɛ mpɛ mɔ, kɔ ŋayɛksɛ kəkɔ di. Kɔ pəŋciyanɛ acikəra fəp ntɛ ŋane afum a Kalile ŋac-cɔp nwɛ o nwɛ kusu k’acəkəra mɔ. 7 Pəciyanɛ, kɔ kusu kəwos kaŋkɔ disrɛ, kɔ ŋayifɛnɛ: «Afum akaŋɛ ŋalok-loku mɔ, bafɔ aka Kalile ŋɔ ba? 8 Ake ’sɔŋɛ ntɛ səna dacɔ, fum o fum ene ŋac-cɔp kusu kɔn mɔ? 9 AParto, aMede, aka Elam, aka Mesopotami, aka Yude, aka Kapados, aka Ponto, kɔ aka Asi, 10 aka Firiki, aka Paŋfili, aka Misira, aka Libi andɛ a atɔf ŋa Sirɛn, aRom, 11 aSuyif kɔ acikəra aŋɛ ŋaŋc-tubucnɛ pətɔt pa dinɛ da aSuyif mɔ: Aka Krit, aka Arabi, səŋne ŋa ŋac-loku cusu cosu mes mɔpɔŋ ma Kanu!» 12 Kɔ cusu cəwos ŋa kɔ pəyi ŋa yama-yama, kɔ ŋayifɛnɛ taŋan: «Cəke cɔ tantɛ toloku-ɛ?» 13 Mba kɔ alɔma ŋaŋfani ŋa, ŋac-loku: «Member mobotu mɔ ŋanɛmbərɛ!»

14 Kɔ Piyɛr ɛyɛfɛ k’ɛŋcəmɛ kɔ asom a Yesu aŋɛ wəco kɔ pin, k’ɛmpɛnɛ dim pəc-loku kənay nkɛ: «Afum a Yude kɔ nəna aŋɛ nəndɛ dare da Yerusalɛm mɔ, nəsu ləŋəs, nəcəŋkəl bel-bel moloku mem! Nəcərɛ ti: 15 Afum akaŋɛ ŋaŋcis fɛ pəmɔ tɔkɔ nəcɛm-cɛmnɛ ti mɔ, bawo bət-bət b’ ayi bambɛ. ‡«bawo dec dɛŋc-tɛp kəc-pɛ.» itɔ kusu ka aka Kresi koloku: «Dec maas da dɔsɔk dɔ dandɛ» = 9:00, bərbət. 16 Mba tɔkɔ aŋnabi Yowɛl ɛnaloku mɔ teyi kəcepər:

22 Afum aka Yisrayel, nəcəŋkəl moloku mamɛ! : Yesu wəka Nasarɛt, fum nwɛ Kanu kəmentərɛ nu debeki dɔn mɔ, dəmes mɛwɛy-wɛy, dəmɔpɔŋ, dəmɛgbɛkərɛ pəmɔ tatɔkɔ nəŋcərɛ ti mɔ, 23 fum wəkawɛ anasɔŋ nu kədif kɔn pəmɔ tɔkɔ Kanu kənawosɛ ti kɔ kəsɔŋ tɔkɔtɛnɛ ta ti mɔ. Nənim kɔ nəŋcaŋ kɔ dəkətɔk kəpandən kəmar ka waca wa acikəra. §«acikəra», = afum atɔtɔmpər sariyɛ, atɔyɔnɛ Suyif. 24 Kanu kəyekti kɔ kəŋgbintər kɔ pəcuy pa defi, bawo defi dɛnatam fɛ kəmɛŋkərnɛ kɔ. 25 Dawuda ɛnanuŋkɛnɛ kəloku dəyecicəs yecempi teta Yesu:

29 Awɛŋc im aŋa! Nəwosɛ iloku nu ntɛ kəlaŋ disrɛ teta wətem Dawuda: Ɛnafi, k’awup kɔ, kɔ kufu kɔn kəyi su sɔ mɔkɔ dacɔ. 30 Mba ntɛ Dawuda ɛnayɔnɛ sayibɛ mɔ, ɛŋcərɛ sɔ a Kanu kənadɛrəmɛ kɔ a kəndedəs wan-sɔ kɔn wəlɔma dɔcɔm da dɛbɛ dɔn kəroŋ. 31 Dawuda ɛnanuŋkɛnɛ pənəŋk kəyɛfɛ ka Krist dəkufu †Krist = Wəbɛ nwɛ Kanu kəyɛk-yɛk mɔ, Wəyɛk-yɛk ka Kanu , ɛnanəŋk ntɛ tendeder mɔ k’oloku ti: a anasak fɛ Krist dabiya, dis dɔn dɛnate fɛ dəkufu. 32 Yesu wəkakɔ, Kanu kəyekti kɔ, səna fəp səyɔnɛ atəŋnɛ aka ti. 33 Kɔ Kanu kəmpɛnɛ Yesu kəfo kəleli, k’ɛndəs kɔ kəca kɔn kətɔt. Kɔ Yesu ɔsɔtər nkɔn apa Kanu Amera Ŋecempi nŋɛ analoku kədesɔŋ mɔ, k’eyerəs tatɔkɔ nənəŋk kɔ nəne mɔ.

34 Bafɔ Dawuda ɛnapɛ dareŋc, nkɔn yati oloku:

36 Pəmar aka Yisrayel fəp ŋacərɛ ti bel-bel: Kanu kənasɔŋɛ Yesu kəyɔnɛ wəbɛ wəyɛk-yɛk kɔn, Yesu wəkakɔ nəŋcaŋ dəkətɔk kəpandən mɔ.»

37 Ntɛ afum ŋane moloku mamɔkɔ mɔ, kɔ mosumpər ŋa, kɔ ŋayif Piyɛr kɔ asom a Yesu akɔ: «Awɛŋc su aŋa, cəke cɔ pəmar səyɔ oŋ-ɛ?»

38 Kɔ Piyɛr oloku ŋa: «Nəsəkpər mera yonu, nəlomp! Nwɛ o nwɛ pəsɔtɔ kəgbət dəromun tewe ta Yesu Krist disrɛ, ntɛ tɔŋsɔŋɛ paŋaŋənɛnɛ kiciya ka wəkayi mɔ, nəndesɔtɔ sɔ Amera Ŋecempi ŋa Kanu. 39 Bawo, kəpocɛ nkɛ Kanu kənasɔŋɛ temer mɔ, konu kɔ, kɔ awut anu kəbəp ka akɔ ŋayi pəbɔlɛ mɔ, haŋ kənay ka afum nkɛ Wəbɛ Kanu kosu endewe mɔ.»

40 Kɔ Piyɛr oloku ŋa sɔ moloku mɛlarəm ntɛ tɔŋsɔŋɛ ŋanenɛ kɔ mes mmɛ mɛnacepər fɔr yɔn kiriŋ mɔ. K’eŋgbiŋər ŋa, pəc-loku: «Nəyacnɛ dɛtɛmp dandɛ dɛŋkafəlɛ-kafəlɛ mɔ!» 41 Afum alarəm ŋawosɛ kəgbət dəromun teta Kanu. Dɔsɔk dadɔkɔ afum wul maas (3.000) ŋambɛrɛnɛ akɔ ŋananuŋkɛnɛ kəlaŋ mɔ.

42 Kɔ ŋaŋcəŋkəl tɛm fəp kɔ bel-bel mɛtəksɛ ma asom a Yesu, kiyi kəŋan tes tin, kəpaŋnɛ kəŋan dap da yeri,‡cəKresi = «kətepɛnɛ kəcom kəyerɛnɛ ki mɔ» kɔ kətola Kanu. 43 Kɔ kənesɛ kəsumpər nwɛ o nwɛ bawo Kanu kəŋc-mentərɛ mes mɔpɔŋ kɔ mes mɛwɛy-wɛy mɛlarəm waca wa asom a Yesu. 44 Akɔ ŋanalaŋ mɔ fəp ŋanayi tes tin ŋac-yerɛnɛ mpɛ o mpɛ ŋaŋsɔtɔ mɔ. 45 Kɔ ŋaŋcaməs daka dɔkɔ ŋanayɔ mɔ, kɔ ŋayer pəsam papɔkɔ ŋac-mɔmən tɔkɔ pəcucanɛ peŋcepərɛnɛ mɔ. 46 Dɔsɔk o dɔsɔk ŋaŋc-loŋkanɛ nde kəlɔ kəpɔŋ ka Kanu, ŋac-dinɛnɛ yeri kəfo kin nde wɔlɔ waŋan, ŋac-dinɛ yi mera yobotu kɔ bəkəc yoforu. 47 Ŋac-kor-koru Kanu, kɔ mes maŋan mɔmbɔt afum fəp. Kɔ Wəbɛ Yesu nkɔn ɛmbɛrɛnɛ dɔsɔk o dɔsɔk kəgba ka aŋɛ ɛŋc-yac mɔ.