1 Entonces conda tin e tuobꞌ e chinam Quiriat-jearim uchꞌamiobꞌ e ojroner era, ixiobꞌ esto tama e chinam Bet-semes tuaꞌ uqꞌuechiobꞌ watar e cofre tiaꞌ aquetpa e pacto tuaꞌ Cawinquirar Dios, y uqꞌuechiobꞌ ixin esto tuyotot e Abinadab xeꞌ turu tama inteꞌ or witzir. Y de allí ucꞌajtiobꞌ taca e Dios tujor e Eleazar xeꞌ jax inteꞌ uyunen e Abinadab tuaꞌ aquetpa erach tuaꞌ uyubꞌi ucojco e cofre tuaꞌ e pacto. 2 Y yaꞌ taca quetpa e cofre tama e chinam Quiriat-jearim veinte año, y tunor tin e tuobꞌ e Israel cay usicbꞌobꞌ ut Cawinquirar Dios taca tunor uyalmobꞌ y cay tzꞌintzꞌobꞌ conda ucꞌajtiobꞌ tacar umen que cay ubꞌijnuobꞌ que actanobꞌ umener.

3 Pues entonces cay ojron e Samuel taca tunor e gente tama e Israel y che: “Pues jay nox war ibꞌijnu tuaꞌ ixsutpa tut Cawinquirar Dios taca tunor iwalma, ucꞌani tuaꞌ ilocse najtir tunor e sian chamen diosobꞌ xeꞌ tuobꞌ e ajnajtir gente bꞌan cocha e chamen dios Baal, y ucꞌani tuaꞌ ilocse najtir tunor e sian chamen dios xeꞌ bꞌan uwirnar cocha incojt chamen dios xeꞌ jax uwixcar e Baal xeꞌ ucꞌabꞌa Astarté, y de allí ucꞌani tuaꞌ iwajcꞌu ibꞌa Cawinquirar Dios inyajrer y tuaꞌ iyujtzꞌi ut jax taca jaxir. Y tamar era jaxir tuaꞌ axin ucorpesox tama ucꞌabꞌ tin e tuobꞌ uchꞌajnarir e Filisti,” che e Samuel. 4 Y entonces tin e tuobꞌ e Israel cay ulocsiobꞌ najtir tunor e sian chamen diosobꞌ xeꞌ bꞌan uwirnar cocha e chamen dios Baal y ulocsiobꞌ najtir tunor e chamen diosobꞌ xeꞌ bꞌan uwirnar cocha e Astarté, y cay uyujtzꞌiobꞌ ut jax taca Cawinquirar Dios.

5 Y de allí ojron e Samuel y che: “Morojsenic tunor tin e tuobꞌ e Israel tama e chinam Mispá, y nen tuaꞌ incꞌajti taca Cawinquirar Dios tamarox,” che e Samuel. 6 Y entonces e gente tuaꞌ Israel cay umorojse ubꞌobꞌ tama e chinam Mispá, y cay ulocsiobꞌ e jaꞌ tama inteꞌ ut jaꞌ y uwechꞌiobꞌ tor e rum tut Cawinquirar Dios. Y tama e día era machi wiobꞌ y cay uchecsu ubꞌobꞌ tut Cawinquirar Dios que ayan meyra mabꞌambꞌanir lo que cꞌapa uchiobꞌ umen que cay uyujtzꞌiobꞌ ut e sian chamen diosobꞌ. Pues jax taca tama e chinam Mispá era tiaꞌ e Samuel cꞌotoy quetpa ajbꞌijresiaj tuaꞌ e Israel. 7 Pero conda tin e tuobꞌ uchꞌajnarir e Filisti cꞌotoy unatobꞌ que e gente tuaꞌ Israel war umorojse ubꞌobꞌ tama e chinam Mispá, cay ubꞌijnuobꞌ tuaꞌ axin uchiobꞌ e tzꞌojyir upaterobꞌ. Pero conda tin e tuobꞌ e Israel cꞌotoy unatobꞌ tama tunor era, bꞌactobꞌ meyra. 8 Entonces uyareobꞌ e Samuel cocha era y chenobꞌ: “Ira awacta tuaꞌ acꞌajti taca Cawinquirar Dios tamaron tuaꞌ machi cacꞌaxi tama ucꞌabꞌ tin e tuobꞌ uchꞌajnarir e Filisti,” chenobꞌ tin e tuobꞌ e Israel. 9 Entonces e Samuel uchꞌami incojt chꞌom oveja y uchamse y uputa incojtertiꞌ tut Cawinquirar Dios tujor cora petzbꞌir tun. Y de allí cay ucꞌajti taca e Dios tuaꞌ atacarnobꞌ tin e tuobꞌ e Israel, y ubꞌna tunor era umen Cadiosir.

10 Y conda e Samuel cay uputa e arac, cꞌotoyobꞌ tin e ajtzꞌojyirobꞌ xeꞌ tuobꞌ uchꞌajnarir e Filisti tuaꞌ uchiobꞌ e tzꞌojyir taca tin e ajtzꞌojyirobꞌ xeꞌ tuobꞌ e Israel. Pero Cawinquirar Dios ojron taca inteꞌ nuxi nuc xeꞌ bꞌan uyubꞌnar cocha e quiricnar tujor tin e tuobꞌ uchꞌajnarir e Filisti, y bꞌactobꞌ meyra y quetpobꞌ nutꞌur utobꞌ tunorobꞌ, y bꞌan cocha era cucurnobꞌ umen tin e tuobꞌ e Israel. 11 Y tamar era locꞌoy ajniobꞌ wacchetaca tin e tuobꞌ e Israel tupatobꞌ tin e tuobꞌ uchꞌajnarir e Filisti tuaꞌ uchamsiobꞌ, y uyajnesobꞌ xircojt tama tunor e bꞌir xeꞌ acꞌotoy esto tama e chinam Bet-car, y war uchamsiobꞌ axin.

12 Y de allí e Samuel uchꞌami ingojr nuxi tun y uwabꞌu tuyuxin e chinam Mispá y e chinam Sen, y uturbꞌa ucꞌabꞌa e tun Eben-ézer, xeꞌ war che tacarsiaj. Y che: “Pues esto tara utacrion Cawinquirar Dios,” che e Samuel.

13 Pues entonces tin e tuobꞌ uchꞌajnarir e Filisti cꞌapa cucurnobꞌ y machi ixto sutpa ochoyobꞌ tama e lugar xeꞌ tuobꞌ e Israel tama meyra tiempo, y tama tunor e tiempo este que chamay e Samuel machi actanobꞌ tuaꞌ oꞌchoyobꞌ tama e lugar Israel umen Cawinquirar Dios. 14 Y tunor e chinamobꞌ xeꞌ loqꞌuesnobꞌ tuaꞌ e Israel ixnix e tiempo umen e ajtzꞌojyirobꞌ xeꞌ tuobꞌ uchꞌajnarir e Filisti xeꞌ acay tuyejtzꞌer e chinam Ecrón y acꞌotoy esto tuyejtzꞌer e chinam Gat sutpa quetpobꞌ tuaꞌ e Israel otronyajr. Y bꞌan cocha era e Israel sutpa uchꞌamiobꞌ tunor e lugar era tuaꞌ tin e tuobꞌ uchꞌajnarir e Filisti. Y tama e día era checta e jiriar tujam tin e tuobꞌ e Israel y tujam tin e tuobꞌ uchꞌajnarir e Emor.

15 Pues entonces e Samuel quetpa ajbꞌijresiaj tujor tin e tuobꞌ e Israel tama tunor ucuxtar. 16 Y tama inteꞌ inteꞌ año ixin esto tama e chinam Betel, y esto tama e chinam Guilgal y esto tama e chinam Mispá tuaꞌ ubꞌijnu uwira conda ayan lo que war unumse ubꞌobꞌ tin e tuobꞌ e Israel. 17 Y de allí asutpa axin esto tama uyotot xeꞌ aquetpa tama e chinam Ramá, y jax tama e chinam era tiaꞌ ubꞌijnu uwira* Che que “Ubꞌijnu uwira tunor lo que war unumse ubꞌobꞌ tin e tuobꞌ e Israel.” Pues e Samuel quetpa bꞌan cocha inteꞌ juez, y conda turu tama uchinam cꞌotoyobꞌ tut tin e war ucꞌaye ubꞌobꞌ tuaꞌ ubꞌijnu uwira chi xeꞌ war ucojco e culpa. tunor lo que war unumse ubꞌobꞌ tin e tuobꞌ e Israel. Y upettzꞌe cora tun tuaꞌ aquetpa inteꞌ altar tut Cawinquirar Dios tama e lugar era.