1 Pues entonces conda e Samuel cꞌotoy quetpa onian winic uyare uyunenobꞌ tuaꞌ aquetpobꞌ ajbꞌijresiajobꞌ tama e Israel ubꞌan. 2 Y e Samuel uyebꞌta ixin e yaxar uyunen xeꞌ ucꞌabꞌa Joel y inteꞌ uyunen xeꞌ ucꞌabꞌa Abías tuaꞌ ubꞌijnu uwirobꞌ lo que war unumse ubꞌobꞌ e gente tama e chinam Beerseba. 3 Pero uyunenobꞌ era machi uchiobꞌ bꞌan cocha cay uche utata, sino que cay uyusreobꞌ tuaꞌ aquetpobꞌ ajtuminobꞌ. Y tamar era cay uchꞌamiobꞌ e tumin tuaꞌ uchiobꞌ lo que ma ani jax tuaꞌ uchiobꞌ, y machi patnobꞌ taca inteꞌ erachir. 4 Entonces e nuquir winicobꞌ tama e Israel umorojse ubꞌobꞌ y ixiobꞌ tuaꞌ oꞌjronobꞌ taca e Samuel tiaꞌ turu tama e chinam Ramá, 5 y chenobꞌ: “Pues net onian winiquetix y cꞌani cawaret que oynenobꞌ machi war uchiobꞌ lo que imbꞌutz bꞌan cocha cay ache net. Y tamar era cꞌani cacꞌajti tacaret tuaꞌ aturbꞌa inteꞌ rey tuaꞌ acꞌotori ticajor bꞌan cocha war uchiobꞌ e inmojr chinamobꞌ ticawejtzꞌer,” chenobꞌ e nuquir winicobꞌ tama e Israel.

6 Pero quetpa ma taca e Samuel umen que ucꞌajtiobꞌ inteꞌ rey tuaꞌ acꞌotori tujorobꞌ. Y tamar era cay ucꞌajti taca Cawinquirar Dios. 7 Y de allí Cawinquirar Dios ojron taca e Samuel y che: “Chen tunor lo que war ucꞌajtiobꞌ tacaret. Pues majax net xeꞌ war uxejbꞌiobꞌ oit, sino que jax nen. Pues machi ixto war ucꞌaniobꞌ tuaꞌ incꞌotori tujorobꞌ. 8 Pues war uchiobꞌ tacaret bꞌan taca cocha cay uchiobꞌ tacaren. Pues cay najtiriobꞌ taniut desde que inlocsiobꞌ tama e lugar Egipto ixnix e tiempo, y bꞌan war uchiobꞌ esto coner, y war uyusreobꞌ tuaꞌ uyujtzꞌiobꞌ ut cora chamen diosobꞌ. 9 Entonces chen bꞌan taca cocha war ucꞌajtiobꞌ tacaret. Pero bꞌajxan ucꞌani tuaꞌ iyojron tacarobꞌ tuaꞌ awareobꞌ cobꞌa tuaꞌ unumse ubꞌobꞌ conda acay acꞌotori inteꞌ rey tujorobꞌ,” che Cawinquirar Dios.

10 Entonces e Samuel sutpa ojron taca e nuquir winicobꞌ tuaꞌ e Israel xeꞌ war ucꞌajtiobꞌ inteꞌ rey y uchecsu tutobꞌ tunor lo que arobꞌna umen Cawinquirar Dios 11 y che:

—Pues jax era lo que tuaꞌ uche e rey conda acay acꞌotori tijor: axin uyare tuaꞌ achujcobꞌ e chꞌom maxtacobꞌ tibꞌa tuaꞌ aquetpobꞌ ajtzꞌojyirobꞌ, y ayan tin e axin uyare tuaꞌ aꞌjniobꞌ tut ucarruaje lo que cꞌani ucꞌampes tama inteꞌ tzꞌojyir tuaꞌ ujabꞌiobꞌ e bꞌir tut, y ayan tin e tuaꞌ uyare tuaꞌ axanobꞌ tujor e sian chij, y ayan tin e tuaꞌ aquetpobꞌ ajcojcobꞌ tuaꞌ e rey tic taca tiaꞌ axin. 12 Y ayan tin e tuaꞌ uturbꞌa tuaꞌ acꞌotori tujor 1,000 ajtzꞌojyirobꞌ, y ayan tin e tuaꞌ uturbꞌa tuaꞌ acꞌotori tujor cincuenta ajtzꞌojyirobꞌ. Y ayan tijam tin e tuaꞌ uturbꞌa tuaꞌ axin uche arar e rum tuaꞌ, y ayan tin e tuaꞌ uyare tuaꞌ axin umorojse ucosecha, y ayan tin e tuaꞌ uyare tuaꞌ uchiobꞌ e taqꞌuin lo que ucꞌani tuaꞌ ucꞌampes inteꞌ ajtzꞌojyir, y ayan tin e tuaꞌ uyare tuaꞌ uche e taqꞌuin lo que tuaꞌ acꞌampesna tama e carruaje xeꞌ tuaꞌ e tzꞌojyir. 13 Y e rey axin uyare tuaꞌ achujca iwijchꞌoctac ubꞌan. Y ayan tin e tuaꞌ uyare apatnobꞌ tama e cocina, y ayan tin e tuaꞌ uyare uchiobꞌ e pan, y ayan tin e tuaꞌ uyare tuaꞌ uchiobꞌ e perfume tuaꞌ jaxir. 14 Y e rey tuaꞌ axin ulocse tiut tunor e rum tiaꞌ más alocꞌoy e cosecha, y axin ulocse tiut e rum tiaꞌ pacbꞌir tunor e sian uva xeꞌ más galan, y axin ulocse tiut tunor e cosecha lo que alocꞌoy tama e sian teꞌ xeꞌ más imbꞌutz xeꞌ ucꞌabꞌa oliva, y axin uyajcꞌu uyajcꞌamparobꞌ tuaꞌ ucojcobꞌ. 15 Y e rey tuaꞌ axin ucꞌajti e diezmo tibꞌa tama e cosecha y tama e uva, y axin uyajcꞌu uyajcꞌamparobꞌ y umanobꞌ. 16 Y axin ulocse tibꞌa ubꞌan cora winicobꞌ xeꞌ mambꞌir inyajrer y cora ixictac tibꞌa xeꞌ mambꞌir inyajrer ubꞌan, y axin ulocse e wacax tibꞌa xeꞌ más galanic y e chij xeꞌ más galanic, y axin uchiobꞌ apatnobꞌ tama e rum tuaꞌ. 17 Y axin ucꞌajti incojt arac tama cada diez aracꞌobꞌ tibꞌa, y esto nox ubꞌan ixixin ixquetpa man tuaꞌ. 18 Y conda watar e día conda ixixin inumse ibꞌa meyra umen que e rey uchiox ixpatna meyra, ixixin ixqꞌuecran upater e rey xeꞌ icꞌajti, pero Cawinquirar Dios machi tuaꞌ utacriox, che e Samuel.

19 Pero tin e tuobꞌ e Israel machi uturbꞌa ubꞌobꞌ tamar lo que arobꞌnobꞌ umen e Samuel, y chenobꞌ:

—Matucꞌa uche. Non cacꞌani inteꞌ rey. 20 Pues non cꞌani caquetpa bꞌan cocha e inmojr chinamobꞌ ticawejtzꞌer, y cacꞌani inteꞌ carey xeꞌ tuaꞌ acꞌotori ticajor y xeꞌ tuaꞌ alocꞌoy uche e tzꞌojyir tacaron, chenobꞌ e winicobꞌ era.

21 Entonces conda e Samuel cꞌapa uyubꞌi tunor uyojroner tin e tuobꞌ e Israel, cay uchecsu tunor era tut Cawinquirar Dios. 22 Y che Cawinquirar Dios:

—Chen lo que war uyaretobꞌ y turbꞌan inteꞌ rey, che Cawinquirar Dios.

Entonces e Samuel uyare tunor tin e tuobꞌ e Israel tuaꞌ asutpa axiobꞌ esto tama uchinamobꞌ tiaꞌ tariobꞌ.