1 Entonces cay ojron e Samuel taca tunor tin e tuobꞌ e Israel y che:

—Pues nen cꞌapa inche tunor lo que cay icꞌajti tacaren, y inturbꞌix inteꞌ rey xeꞌ tuaꞌ acꞌotori tijor. 2 Entonces tara turu e rey tibꞌa xeꞌ tuaꞌ ubꞌijresox. Pues nen onian winiquen xeꞌ ayan meyra sac tanior y machix uyubꞌien tuaꞌ imbꞌijresox, y motor que turobꞌ niunenobꞌ tacarox, pero machi sicbꞌanobꞌ tuaꞌ ubꞌijresox, sino que jax e Saúl. Pues nen cay imbꞌijresox conda chꞌom sitzꞌen y bꞌan war inche esto tama e día coner. 3 Pues tara turen tiut. Jay ayan lo que cay inche xeꞌ majax imbꞌutz tiut, checsunic era tut Cawinquirar Dios y tut e rey xeꞌ sicbꞌabꞌir umener y nen tuaꞌ intoyi. ¿Ayan ca incojt wacax o incojt chij xeꞌ inxujchꞌi tibꞌa? ¿Ayan ca chi tijam xeꞌ inche unumse ubꞌa? O ¿ayan ca inyajr conda inchꞌami e tumin tuaꞌ imbꞌijnu inwira intiach que lo que ucꞌani ani tuaꞌ inche? Areniquen era tut Cawinquirar Dios y tut e rey y nen tuaꞌ intoyi jay ayan lo que imbꞌeto, che e Samuel.

4 Entonces ojronobꞌ tin e tuobꞌ e Israel y chenobꞌ:

—Machi. Ma tiaꞌ cay amajreson y ma tiaꞌ cay achion canumse cabꞌa, y nien ma tiaꞌ cay achꞌami e tumin tuaꞌ ache lo que majax imbꞌutz, chenobꞌ e winicobꞌ era.

5 Entonces ojron e Samuel y che:

—Pues jax Cawinquirar Dios y e rey xeꞌ sicbꞌabꞌir umener xeꞌ tuaꞌ aquetpobꞌ ajchecsuyajobꞌ tibꞌa que machi itajwi e mabꞌambꞌanir tamaren, che e Samuel. Y tin e tuobꞌ e Israel chenobꞌ:

—Bꞌan yaꞌ, que jax jaxir xeꞌ tuaꞌ aquetpa ajchecsuyaj ticabꞌa, chenobꞌ e winicobꞌ era.

6 Entonces ojronto e Samuel tut tin e tuobꞌ e Israel y che:

—Pues jax Cawinquirar Dios xeꞌ usicbꞌa e Moisés y e Aarón tuaꞌ ulocse itata viejobꞌirobꞌ tama e lugar Egipto. 7 Entonces turbꞌanic ibꞌa tuaꞌ iyubꞌi lo que tuaꞌ incꞌajpes tiut tut Cawinquirar Dios tamar e sian milagro lo que cay uche Cadiosir tacarox y taca itata viejobꞌirobꞌ. 8 Pues conda ixin e Jacob taca tunor uchꞌajnarir esto tama e lugar Egipto, cay chenobꞌ unumse ubꞌobꞌ meyra año este que cay aruobꞌ tut Cawinquirar Dios tuaꞌ atacarnobꞌ. Y tamar era Cawinquirar Dios usicbꞌa e Moisés y e Aarón tuaꞌ ulocse itata viejobꞌirobꞌ tama e lugar Egipto y tuaꞌ uqꞌuechiobꞌ axin esto tama e lugar era. 9 Pero wacchetaca najtranobꞌ itata viejobꞌirobꞌ tut Cawinquirar Dios. Y entonces jaxir uche tuaꞌ aquetpobꞌ yebꞌar ucꞌotorer e Sísara xeꞌ jax e capitán tuaꞌ e ajtzꞌojyirobꞌ tuaꞌ e rey tama e chinam Hasor, y de allí uche tuaꞌ aquetpobꞌ yebꞌar ucꞌotorer tin e tuobꞌ uchꞌajnarir e Filisti, y de allí uche tuaꞌ aquetpobꞌ yebꞌar ucꞌotorer e rey tama e lugar Moab. Y inteꞌ intiobꞌ era cay uchiobꞌ e tzꞌojyir taca itata viejobꞌirobꞌ. 10 Y entonces cay ubꞌijnuobꞌ tuaꞌ asutpobꞌ tut Cawinquirar Dios y tamar era cay uchecsu ubꞌobꞌ tut jaxir y che: “Non cꞌapa cache meyra mabꞌambꞌanir toit net xeꞌ Cawinquiraret Dios umen que cawactet tuaꞌ cojytzꞌi ut e chamen dios Baal, y tuaꞌ cojytzꞌi ut chamen dios Astarté xeꞌ jax uwixcar e Baal. Pero coner cꞌani casutpa tuaꞌ cojytzꞌi oit y jax taca net xeꞌ tuaꞌ cojytzꞌi oit jay erer acorpeson tama tin e war uchiobꞌ e tzꞌojyir capater,” chenobꞌ catata viejobꞌirobꞌ.

11 “Y de allí Cawinquirar Dios utzacre ixin e Gedeón* Tara che que jax e Gedeón xeꞌ ebꞌtana tari tuaꞌ ucorpes e Israel. Pero ayan otronteꞌ ucꞌabꞌa e Gedeón xeꞌ jax e Jerubaal, y bꞌan che tama e hebreo tama e pasaje era. y e Barac y e Jefté y nen xeꞌ Samuelen tuaꞌ cacorpesox tama ucꞌotorer tin e war aqꞌuijna uwirox, y bꞌan cocha era cꞌotoy turuanox taca e jiriar. 12 Pero conda cꞌotoy inata que e Nahas xeꞌ jax e rey tuaꞌ e lugar Amón cꞌani uche e tzꞌojyir tacarox, bꞌactox y cay icꞌajti tuaꞌ aturbꞌana inteꞌ rey tuaꞌ acꞌotori tijor, motor que ayanix inteꞌ Rey tibꞌa xeꞌ jax Cawinquirar Dios. 13 Pero tara turu e rey xeꞌ cay icꞌajti. Pues bꞌan uyajcꞌox Cawinquirar Dios cocha bꞌan cay icꞌajti tacar. 14 Pues jay nox imanxujres ibꞌa tut Cawinquirar Dios, y jay iyujtzꞌi ut jax taca jaxir, y jay machi ibꞌijnu tuaꞌ iwacta iche lo que uyareox, y jay nox taca irey ichecsu que jax taca Cawinquirar Dios xeꞌ tuaꞌ iyujtzꞌi ut, entonces cꞌani alocꞌoy imbꞌutz tunor lo que axin iche. 15 Pero jay ibꞌijnu tuaꞌ machi imanxujres ibꞌa tut Cawinquirar Dios y tut tunor lo que axin uyareox tuaꞌ iche, entonces jaxir tuaꞌ acay uche inumse ibꞌa bꞌan cocha cay uche taca itata viejobꞌirobꞌ.

16 “Entonces quetpenic tiaꞌ turox y ixixin iwira e nuxi milagro lo que axin uche wacchetaca Cawinquirar Dios. 17 Pues nox inata que machi acꞌaxi e jajar tama e mes era cocha jax e tiempo conda achena e cosecha tama trigo. Pero nen cꞌani incꞌajti taca Cawinquirar Dios tuaꞌ uche aquiricna ut e qꞌuin y tuaꞌ uche acꞌaxi e jajar, y bꞌan cocha era nox tuaꞌ acꞌotoy inata que mabꞌambꞌan lo que iche tut Cawinquirar Dios conda icꞌajti tuaꞌ aturbꞌana inteꞌ rey,” che e Samuel.

18 Y entonces e Samuel cay ucꞌajti taca Cawinquirar Dios, y jaxir uche aquiricna ut e qꞌuin y uche tuaꞌ acꞌaxi e jajar. Y tamar era tunor tin e tuobꞌ e Israel cay bꞌactobꞌ tut Cawinquirar Dios y tut e Samuel. 19 Entonces tunor tin e tuobꞌ e Israel cay aruobꞌ taca inteꞌ nuxi nuc tut e Samuel y chenobꞌ:

—Cꞌajtin taca Awinquirar Dios tuaꞌ machi cachamay, cocha non cꞌapa cache meyra mabꞌambꞌanir y era cꞌotoy quetpa más meyra camabꞌambꞌanir umen que ixion cacꞌajti tuaꞌ aturbꞌana inteꞌ rey, chenobꞌ e winicobꞌ era.

20 Entonces ojron e Samuel y che:

—Ira ixbꞌacta, pues erach ixto que nox cꞌapa iche meyra mabꞌambꞌanir cocha nox machi ixto war icꞌani tuaꞌ acꞌotori Cawinquirar Dios tijor, pero era machi tuaꞌ ixsutpa iwacta jaxir, sino que ucꞌani tuaꞌ imanxujres ibꞌa tut e Dios taca tunor iwalma. 21 Pero machi tuaꞌ ixsutpa iyujtzꞌi ut inteꞌ chamen dios, cocha machi uyubꞌi utacriox y nien machi uyubꞌi tuaꞌ ucorpesox, cocha jax taca inteꞌ chamen dios xeꞌ matucꞌa ucꞌampibꞌir. 22 Pues Cawinquirar Dios tzay ubꞌijnu ixnix que cꞌani uchiox ixquetpa uchinam, y tamar era ma tiaꞌ tuaꞌ ubꞌijnu uyacta ucojcox cocha jaxir machi ucꞌani tuaꞌ asubꞌarna ucꞌabꞌa. 23 Pues nen ma tiaꞌ tuaꞌ inwacta incꞌajti taca Cawinquirar Dios tuaꞌ ixcorpesna, cocha jay bꞌan ani inche war ani inche inteꞌ nuxi mabꞌambꞌanir tut e Dios. Y ayanto lo que cꞌani inche. Y cꞌanto incanseox tuaꞌ iche lo que imbꞌutz y tuaꞌ ixxana erach tut Cawinquirar Dios. 24 Pero lo que aquetpa tuaꞌ iche nox, jax era: ucꞌani tuaꞌ imanxujres ibꞌa tut Cawinquirar Dios y tuaꞌ iyujtzꞌi ut taca tunor iwalma, y ma tiaꞌ tuaꞌ inajpes tunor e nuxi tacarsiaj lo que cay uche tacarox. 25 Pero jay nox asutpa ibꞌijnu tuaꞌ acay iche e mabꞌambꞌanir otronyajr, entonces nox y e rey tibꞌa cꞌani ixsatpa, che e Samuel.