1 Pues entonces e Saúl war ucojco treinta año conda cay cꞌotori tama e chinam Israel, y cꞌotori tujorobꞌ cuarenta y dos* Tara che que e Saúl cꞌotori cuarenta y dos año tujor tin e tuobꞌ e Israel, pero tama e Hechos 13:21 che que cꞌotori cuarenta año. Pero ma chequer jayteꞌ año cꞌotori tamar lo que tzꞌijbꞌabꞌir tama e hebreo tama e versículo era. año. 2 Pues e Saúl cay usicbꞌa cora ajtzꞌojyirobꞌ tuaꞌ uchiobꞌ e tzꞌojyir taca tin e tuobꞌ uchꞌajnarir e Filisti. Y usicbꞌa 3,000 tujam tin e tuobꞌ e Israel, y uyare 2,000 tuaꞌ aquetpobꞌ tacar jaxir tama e lugar Micmás y tama or e witzir xeꞌ aquetpa tuyejtzꞌer e chinam Betel. Y uyare otro 1,000 tuaꞌ axiobꞌ taca uyunen Jonatán esto tama e chinam Guibeá xeꞌ turu tama e departamento Benjamín. Y de allí uyare e inmojr winicobꞌ xeꞌ tuobꞌ e Israel tuaꞌ asutpa axiobꞌ esto tuyototobꞌ otronyajr.

3 Entonces e Jonatán taca tin e war axanobꞌ tacar cꞌapa uchamse tunor e ajtzꞌojyirobꞌ xeꞌ tuobꞌ uchꞌajnarir e Filisti xeꞌ turobꞌ tama e chinam Guibeá. Pero cꞌotoy unatobꞌ wacchetaca tin e tuobꞌ uchꞌajnarir e Filisti que cucurnobꞌ upiarobꞌ tama e chinam Guibeá, y tamar era sutpa umorojse ubꞌobꞌ meyra ajtzꞌojyirobꞌ tuaꞌ uchiobꞌ e tzꞌojyir upater e Israel otronyajr. Y wacchetaca cꞌotoy unata e Saúl tama tunor era, y entonces uyare tuaꞌ ajquesna e trompeta tama tunor or e lugar tama e Israel tuaꞌ acꞌotoy unatobꞌ que cꞌanix achena otronteꞌ tzꞌojyir taca tin e tuobꞌ uchꞌajnarir e Filisti. 4 Y tamar era tunor tin e tuobꞌ e Israel cꞌotoy unatobꞌ que e Saúl taca uyajtzꞌojyirobꞌ cꞌapa uchamse e ajtzꞌojyirobꞌ xeꞌ tuobꞌ uchꞌajnarir e Filisti xeꞌ turobꞌ ani tama e chinam Guibeá, y que tamar era tin e tuobꞌ uchꞌajnarir e Filisti war aqꞌuiniobꞌ meyra upater tin e tuobꞌ e Israel. Entonces cay umorojse ubꞌobꞌ tunor e sian ajtzꞌojyirobꞌ tuaꞌ e Israel taca e Saúl tama e chinam Guilgal. 5 Y tin e tuobꞌ uchꞌajnarir e Filisti cay umorojse ubꞌobꞌ ubꞌan tuaꞌ uchiobꞌ e tzꞌojyir. Y qꞌuecher umenerobꞌ 3,000 carruaje tuaꞌ uchiobꞌ e tzꞌojyir tamar, y 6,000 ajtzꞌojyirobꞌ xeꞌ uqꞌuechiobꞌ axin e carruaje, y qꞌuecher umenerobꞌ ubꞌan meyra sian ajtzꞌojyirobꞌ xeꞌ axanobꞌ tor uyocobꞌ xeꞌ quetpa uwirnarobꞌ bꞌan cocha e jiꞌ lo que ayan tama utiꞌ e nuxi jaꞌ. Y entonces ixiobꞌ esto tuyejtzꞌer e chinam Micmás, y cay ujachiobꞌ meyra sian otot xeꞌ chembꞌir taca e bꞌujc teinxejr lado tiaꞌ atobꞌoy watar e qꞌuin tama e chinam Bet-avén.

6 Pues entonces conda cꞌotoy uwirobꞌ tin e ajtzꞌojyirobꞌ tuaꞌ e Israel que ayan meyra sian ajtzꞌojyirobꞌ xeꞌ tuobꞌ uchꞌajnarir e Filisti xeꞌ cꞌotoy tuaꞌ uchiobꞌ e tzꞌojyir tacarobꞌ, cay bꞌactobꞌ meyra y cay usicbꞌobꞌ tic taca tiaꞌ tuaꞌ amucuanobꞌ tutobꞌ. Y ayan tin e ixin mucuanobꞌ tama inteꞌ chꞌen tama unac inteꞌ witzir, y ayan tin e mucuanobꞌ macuir inteꞌ chꞌen tama e rum, y ayan tin e mucuanobꞌ tujam e sian tun, y ayan tin e mucuanobꞌ tiaꞌ aꞌjni e tꞌiu, y ayan tin e mucuanobꞌ macuir inteꞌ chꞌen xeꞌ abꞌutcꞌa taca e jaꞌ conda acꞌaxi e jajar. 7 Y ayan tin e ajni ixiobꞌ esto teinxejr lado tama e xucur Jordán tuaꞌ acꞌotoyobꞌ tama e lugar Gad y tama e lugar Galaad. Pero quetpato e Saúl tama e chinam Guilgal, y tunor e ajtzꞌojyirobꞌ xeꞌ war axiobꞌ tupat war achinchobꞌ umen e bꞌajcꞌut. 8 Y yajaꞌ taca quetpa e Saúl tama inteꞌ tiempo de siete día, bꞌan cocha arobꞌna tuaꞌ uche umen e Samuel. Pero e Samuel machi cꞌotoy. Y cay uwira e Saúl que e ajtzꞌojyirobꞌ war alocꞌoyobꞌ cora cora. 9 Entonces ojron cocha era y che:

—Taresic e arac xeꞌ aquetpa tuaꞌ cachamse y tuaꞌ caputa inyajrer tut Cawinquirar Dios y e arac xeꞌ aquetpa tuaꞌ cachamse y caputa tuaꞌ e cꞌumpar tujor e altar, che e Saúl.

Y entonces e Saúl cay uche lo que machi ani tuaꞌ uche y uputa e aracꞌobꞌ.

10 Pero conda intocto cꞌapa uputa e arac, cꞌotoy e Samuel. Y entonces locꞌoy e Saúl tuaꞌ utajwi tuyocher e chinam. 11 Pero conda e Samuel cꞌotoy unata lo que uche e Saúl, ojron wacchetaca y che:

—¿Tucꞌa tuaꞌ que ache cocha era? che e Samuel.

Entonces ojron e Saúl y che:

—Pues cay inwira que warix acay axiobꞌ e ajtzꞌojyirobꞌ xeꞌ turobꞌ tacaren, y inwira que net merato iyopa tama e día xeꞌ actabꞌir amener, y de allí cꞌotoy innata que tin e ajtzꞌojyirobꞌ tuaꞌ uchꞌajnarir e Filisti warix umorojse ubꞌobꞌ tama e chinam Micmás tuaꞌ uchiobꞌ e tzꞌojyir tacaron. 12 Y tamar era cay imbꞌijnu que watobꞌix tuaꞌ uchiobꞌ e tzꞌojyir tacaron tara tama e chinam Guilgal, y que nen merato incꞌotoy tut Cawinquirar Dios tuaꞌ incꞌajti utacarsiaj. Y tama tunor era cay imbꞌijnu tuaꞌ inturbꞌa nibꞌa tuaꞌ imputa e arac tut Cawinquirar Dios, che e Saúl.

13 Entonces ojron e Samuel y che:

—Pues tunor lo que ache sajmi matucꞌa ucꞌampibꞌir. Quisinic ani acꞌubꞌse lo que arobꞌnet umen Cawinquirar Dios, uyajqꞌuet ani tuaꞌ icꞌotori inyajrer tujor tin e tuobꞌ e Israel taca tunor achꞌajnarir. 14 Pero era machi tuaꞌ eꞌixna icꞌotori. Pues Cawinquirar Dios usicbꞌix otronteꞌ winic xeꞌ aquetpa imbꞌutz uyalma bꞌan cocha uyalma e Dios xeꞌ tuaꞌ aquetpa rey tujor e chinam Israel. Y bꞌan uche umen que net machi cꞌani acꞌubꞌse lo que arobꞌnet umener, che e Samuel. 15 Y de allí locꞌoy ixin e Samuel tama e chinam Guilgal. Pero ayan cora ajtzꞌojyirobꞌ xeꞌ tuobꞌ e Israel xeꞌ quetpobꞌto taca e Saúl xeꞌ ixiobꞌ tacar esto tama e chinam Guibeá. Y conda cꞌotoyobꞌ, e Saúl cay umorojse más ajtzꞌojyirobꞌ tuaꞌ uchiobꞌ e tzꞌojyir tacar, y conda cꞌapa utziqui, uwira que ayan taquix 600 ajtzꞌojyirobꞌ.

16 Entonces quetpobꞌ e Saúl y e Jonatán xeꞌ jax uyunen y e ajtzꞌojyirobꞌ xeꞌ turobꞌ tacar tuyejtzꞌer e chinam Guibeá. Y yajaꞌ taca ujachiobꞌ cora otot xeꞌ chembꞌir taca e bꞌujc tiaꞌ tuaꞌ awayanobꞌ. Y tin e ajtzꞌojyirobꞌ xeꞌ tuobꞌ uchꞌajnarir e Filisti cay ujachiobꞌ cora otot xeꞌ chembꞌir taca e bꞌujc tuyejtzꞌer e chinam Micmás. 17 Y de allí uyebꞌtobꞌ ixin uxteꞌ grupo ajtzꞌojyirobꞌ tuaꞌ acꞌotoyobꞌ teinxejr teinxejr tiaꞌ turobꞌ tin e tuobꞌ e Israel. Pues inteꞌ grupo ixiobꞌ más bꞌana al norte esto tama e chinam Ofrá xeꞌ aquetpa tama e lugar Sual, 18 y ayan otronteꞌ grupo xeꞌ ixiobꞌ más bꞌana tama e lado tiaꞌ anamtzꞌa axin e qꞌuin tama e chinam Bet-horón, y e uxteꞌ grupo ixiobꞌ tor e witzir xeꞌ aquetpa tuyejtzꞌer e valle xeꞌ turu tama e lugar Seboím tiaꞌ aquetpa chequer e choquem lugar.

19 Pues tama e tiempo era matucꞌa nien incojt winic xeꞌ oꞌbꞌna apatna taca e taqꞌuin tama tunor or e lugar Israel, cocha machi actanobꞌ umen tin e tuobꞌ uchꞌajnarir e Filisti. Y tamar era tin e tuobꞌ e Israel ma cocha erer uchiobꞌ inteꞌ machit y nien inteꞌ lanza. 20 Y entonces tin e tuobꞌ e Israel quetpobꞌ tuaꞌ axiobꞌ tut tin e tuobꞌ uchꞌajnarir e Filisti tuaꞌ utajwiobꞌ chi chi tuaꞌ ujuqꞌui tuqꞌuic tuqꞌuic taqꞌuin xeꞌ ucꞌampesobꞌ bꞌan cocha inteꞌ arado o inteꞌ hoz o inteꞌ hacha o inteꞌ piocha. 21 Y tamar era quetpa tuaꞌ atojyobꞌ tin e tuobꞌ uchꞌajnarir e Filisti tuaꞌ ujuqꞌui inteꞌ inteꞌ taqꞌuin. Atojyobꞌ ocho gramo ut tumin xeꞌ chembꞌir taca e plata tuaꞌ ujuqꞌuiobꞌ inteꞌ arado, y quetpa tuaꞌ atojyobꞌ cuatro ut tumin xeꞌ chembꞌir taca e plata tuaꞌ ujuqꞌuiobꞌ inteꞌ hacha o inteꞌ hoz o tuaꞌ uyustesobꞌ inteꞌ susteꞌ. 22 Y tamar era mamajchi chi tujamobꞌ tin e war axanobꞌ taca e Saúl y e Jonatán ayan umachit o ulanza tuaꞌ uchiobꞌ e tzꞌojyir tacar tama e día era. Jax taca e Saúl y e Jonatán xeꞌ ayan umachitobꞌ. 23 Pero ayan inteꞌ grupo ajtzꞌojyirobꞌ xeꞌ tuobꞌ uchꞌajnarir e Filisti xeꞌ locꞌoyobꞌ tama e chinam Micmás tuaꞌ umaquiobꞌ ut e bꞌir xeꞌ axin tujam e witzir xeꞌ acꞌotoy esto tama e chinam Guibeá tiaꞌ turu tin e ajtzꞌojyirobꞌ xeꞌ tuobꞌ e Israel.