1 Pues tama inteꞌ día e Jonatán uyare uman y che:

—Lar tacaren, y numicon teinxejr bꞌana e xucur y cachic e tzꞌojyir taca cora ajtzꞌojyirobꞌ xeꞌ tuobꞌ uchꞌajnarir e Filisti xeꞌ morojsebꞌir turobꞌ teinxejr bꞌana, che e Jonatán.

Pero e Jonatán matucꞌa uchecsu tut utataꞌ, 2 cocha e Saúl turu najtir cora tuyejtzꞌer e chinam Guibeá taca 600 ajtzꞌojyirobꞌ, war aturuanobꞌ yebꞌar inteꞌ teꞌ xeꞌ ucꞌabꞌa granado tama e lugar tiaꞌ awajrna e trigo. 3 Pues ayan inteꞌ sacerdote tuaꞌ Cawinquirar Dios xeꞌ ucꞌabꞌa Ahías xeꞌ lapar umener e efod* Iranic e nota tama e efod tama 1 Samuel 2:28. xeꞌ arobꞌna tuaꞌ ulapi umen Cawinquirar Dios. Pues e Ahías era jax uyunen e Ahitub xeꞌ sacumbꞌir tuaꞌ e Icabod xeꞌ jax uyunen e Finees xeꞌ sitzbꞌir tuaꞌ e Elí xeꞌ jax ani e sacerdote tuaꞌ Cawinquirar Dios tama e chinam e Siló.

Pero mamajchi tujam tin e tuobꞌ e Israel unatobꞌ que e Jonatán ixin esto tiaꞌ turobꞌ tin e tuobꞌ uchꞌajnarir e Filisti. 4 Pero tuaꞌ acꞌotoy e Jonatán y uman esto tiaꞌ turobꞌ cora ajtzꞌojyirobꞌ xeꞌ tuobꞌ uchꞌajnarir e Filisti quetpa tuaꞌ anumuy tujam chateꞌ nuquir tun, porque bꞌan e bꞌir, y ayan ucꞌabꞌobꞌ ingojr ingojr tun era xeꞌ jax e Bosés y e Sene. 5 Pues e bꞌajxan tun aquetpa tama e norte tuyejtzꞌer e chinam Micmás, y e chajr tun aquetpa tama e sur tuyejtzꞌer e chinam Guibeá. 6 Entonces e Jonatán uyare uman y che:

—Incoꞌ teinxejr bꞌana esto tiaꞌ morojsebꞌir turobꞌ cora winicobꞌ xeꞌ uyujtzꞌiobꞌ ut e chamen diosobꞌ xeꞌ tuobꞌ uchꞌajnarir e Filisti. Pues bꞌajcꞌat Cawinquirar Dios axin utacrion, cocha tut jaxir matucꞌa intran tuaꞌ uche, y jay ucꞌani, erer utacrion tuaꞌ cachamsiobꞌ, motor jay meyrobꞌ o jay chacojt taca, che e Jonatán. 7 Entonces ojron uman y che:

—Chen tunor lo que war abꞌijnu ache, porque nen turenix tuaꞌ intacret taric lo que taric, che e man.

8 Entonces ojron e Jonatán y che:

—Cꞌani canumuy teinxejr bꞌana esto tiaꞌ turobꞌ e ajtzꞌojyirobꞌ, y cꞌani cawactobꞌ uwironobꞌ. 9 Y jay uyareonobꞌ tuaꞌ caquetpa tiaꞌ turon, entonces caquetpa yajaꞌ taca, y machi tuaꞌ caxin esto tiaꞌ turobꞌ. 10 Pero jay uyareonobꞌ tuaꞌ catꞌabꞌay esto tiaꞌ turobꞌ, entonces catꞌabꞌay, porque bꞌan tuaꞌ aquetpa e chequerir tuaꞌ Cawinquirar Dios que cꞌani utacrion tuaꞌ cachamsiobꞌ, che e Jonatán.

11 Entonces bꞌan uchiobꞌ y chatertiobꞌ uyacta ubꞌobꞌ tuaꞌ eꞌrnobꞌ umen tin e ajtzꞌojyirobꞌ xeꞌ tuobꞌ uchꞌajnarir e Filisti xeꞌ cay ojronobꞌ wacchetaca y chenobꞌ: “Iranic e winicobꞌ era xeꞌ tuobꞌ e Israel, war watobꞌ. War alocꞌoyobꞌ macuir e chꞌen tiaꞌ war ani amucuanobꞌ,” chenobꞌ e ajtzꞌojyirobꞌ xeꞌ tuaꞌ uchꞌajnarir e Filisti. 12 Y de allí upejcobꞌ e Jonatán taca uman y chenobꞌ:

—Tꞌabꞌenic esto tiaꞌ turon, porque ayan lo que cꞌani cawareox, chenobꞌ e ajtzꞌojyirobꞌ xeꞌ tuobꞌ uchꞌajnarir e Filisti.

Entonces ojron e Jonatán taca uman y che:

—Lar tanipat, porque Cawinquirar Dios cꞌani utacrion tuaꞌ cachamsiobꞌ, che e Jonatán.

13 Entonces e Jonatán tꞌabꞌay ixin taca uyoc y ucꞌabꞌ, y tari uman tupat. Y conda cꞌotoy tichan e Jonatán cay uchamse tin e ajtzꞌojyirobꞌ xeꞌ tuobꞌ uchꞌajnarir e Filisti, y tinobꞌ xeꞌ tariobꞌ tupat chamesnobꞌ umen uman. 14 Y wacchetaca uchamsiobꞌ veinte ajtzꞌojyirobꞌ xeꞌ tuobꞌ uchꞌajnarir e Filisti. Y quetpa chꞌarobꞌ e chamenobꞌ najt najt tiaꞌ cucremobꞌ chamen. 15 Y wacchetaca cꞌaxi inteꞌ nuxi bꞌajcꞌut tama tunor e ajtzꞌojyirobꞌ xeꞌ tuobꞌ uchꞌajnarir e Filisti, bꞌan cocha tin e morojsebꞌir turobꞌ tiaꞌ chembꞌir e ototobꞌ taca e bꞌujc, y bꞌan tin xeꞌ turobꞌ najtir cora. Y de allí numuy inteꞌ nuxi yujcbꞌar tama tunor or e lugar y bꞌactobꞌ meyra e ajtzꞌojyirobꞌ xeꞌ tuobꞌ uchꞌajnarir e Filisti este que cay chinchobꞌ tunorobꞌ.

16 Pero quetpa e Saúl tuyejtzꞌer e chinam Guibeá taca tunor e ajtzꞌojyirobꞌ, y uyebꞌta ixin cora winicobꞌ tuaꞌ achꞌujcsanobꞌ najtir cora tuaꞌ uwirobꞌ jay war watobꞌ tin e tuobꞌ uchꞌajnarir e Filisti tuaꞌ uchiobꞌ e tzꞌojyir tacarobꞌ. Pero conda chꞌujcsanobꞌ, uwirobꞌ que war aꞌjniobꞌ axin tic taca. 17 Entonces e Saúl uyare e ajtzꞌojyirobꞌ xeꞌ war axanobꞌ tacar y che:

—Tziquic iwira jay ayan chi xeꞌ machi turobꞌ, che e Saúl.

Y conda cꞌapa utziquiobꞌ tunor e ajtzꞌojyirobꞌ uwirobꞌ que machi turu e Jonatán y nien uman. 18 Y entonces e Saúl upejca e sacerdote Ahías y che:

—Tares e chaleco tuaꞌ e Dios, che e Saúl. Pues tama e día era lapar e chaleco tuaꞌ e Dios umen e Ahías xeꞌ quetpa tuaꞌ utacre tin e tuobꞌ e Israel tuaꞌ unatobꞌ lo que ucꞌani e Dios.

19 Pero conda war oꞌjron e Saúl taca e sacerdote, cay bꞌoro más e bꞌajcꞌut tujam tin e tuobꞌ uchꞌajnarir e Filisti y war aꞌjniobꞌ tic taca. Y entonces e Saúl sutpa uyare e Ahías y che:

—Machix atares, che e Saúl.

20 Entonces e Saúl cay umorojse ubꞌa taca tunor e ajtzꞌojyirobꞌ y ixiobꞌ tuaꞌ uchiobꞌ e tzꞌojyir. Pero tujam tin e tuobꞌ uchꞌajnarir e Filisti ayan meyra bꞌajcꞌut y war anutpa utobꞌ meyra este war uchamse ubꞌobꞌ taca e machit. 21 Pero ayan cora ajtzꞌojyirobꞌ xeꞌ tuobꞌ e Israel xeꞌ cay quetpobꞌ taca tin e tuobꞌ uchꞌajnarir e Filisti tuaꞌ uchiobꞌ e tzꞌojyir tacarobꞌ, pero era sutpa numuyobꞌ tuyejtzꞌer tin e tuobꞌ e Israel tuaꞌ uchiobꞌ e tzꞌojyir taca e Saúl y e Jonatán y tunor tin e war axanobꞌ tacarobꞌ. 22 Y conda tin e tuobꞌ e Israel xeꞌ war amucuanobꞌ tor e witzir tama e departamento Efraín cꞌotoy unatobꞌ que tin e tuobꞌ uchꞌajnarir e Filisti war alocꞌoy ajniobꞌ, ajni ixiobꞌ jaxirobꞌ tupatobꞌ ubꞌan y cay uchamsiobꞌ ixin. 23 Entonces tama e día era Cawinquirar Dios ucorpes tin e ajtzꞌojyirobꞌ xeꞌ tuobꞌ e Israel tucꞌabꞌ tin e ajtzꞌojyirobꞌ xeꞌ tuobꞌ uchꞌajnarir e Filisti. Y tin e tuobꞌ e Israel ajni ixiobꞌ esto tama e chinam Bet-avén, war achamsanobꞌ.

24 Pues tama e día era quetpa injayjayobꞌ tunor e ajtzꞌojyirobꞌ tuobꞌ e Israel cocha mamajchi cay weꞌ umen que bꞌan arobꞌnobꞌ tuaꞌ uchiobꞌ umen e Saúl y che: “Bꞌaxbꞌir tunor tin e axin aweꞌ conda merato anamtzꞌa e qꞌuin, y conda merato acꞌapa cachamse tunor tin e war aqꞌuijna uwironobꞌ,” che e Saúl. 25 Y bꞌan uchiobꞌ motor que cay uwirobꞌ que ayan uchabꞌir e aveja tut e rum tiaꞌ war axanobꞌ tama inteꞌ lugar tiaꞌ ayan e sian nucteꞌ. 26 Y tamar era conda e ajtzꞌojyirobꞌ tuaꞌ e Saúl ochoyobꞌ macuir e sian nucteꞌ, cay uwirobꞌ que ayan e chabꞌ xeꞌ war aꞌjni tut e rum bꞌan ani cocha e jaꞌ, pero mamajchi cay umaqꞌui umen que war ubꞌacriobꞌ e bꞌax lo que arobꞌnobꞌ umen e Saúl. 27 Pero e Jonatán, cocha machi turu tuaꞌ uyubꞌi lo que arobꞌnobꞌ e ajtzꞌojyirobꞌ umen utata, cay uchꞌami imbꞌijc e chabꞌ tama upunto e teꞌ lo que qꞌuecher umener y umaqꞌui. Y bꞌan cocha era yopa uqꞌuecꞌojsiaj otronyajr. 28 Pero ayan incojt ajtzꞌojyir tuaꞌ e Israel xeꞌ uwira lo que uche e Jonatán y tamar era ojron y che:

—Pues atata uyareon tunoron xeꞌ war cache e tzꞌojyir tacar que mamajchi tuaꞌ aweꞌ coner este que axin acbꞌare. Pero jay ayan tin e axin aweꞌ, ucꞌani tuaꞌ aquetpa bꞌaxbꞌir. Y tamar era tunoron injayjay turon, che e winic.

29 Entonces ojron e Jonatán y che:

—Pues lo que uche nitata era jax taca tuaꞌ uche aquetpa más intran e tzꞌojyir tut tunoron xeꞌ tuon e Israel. Iran que nen ayan meyra niqꞌuecꞌosiaj umen taca que inmaqꞌui imbꞌijc e chabꞌ. 30 Y más ani ayan uqꞌuecꞌojsiajobꞌ tunor e ajtzꞌojyirobꞌ jay ucꞌuxiobꞌ ani lo que war ulocsiobꞌ tut tin e war uchamsiobꞌ axin, porque jay bꞌan ani uchiobꞌ, uchamsiobꞌ más meyra ajtzꞌojyirobꞌ xeꞌ tuobꞌ uchꞌajnarir Filisti, che e Jonatán.

31 Pues tama e día era tin e ajtzꞌojyirobꞌ xeꞌ tuobꞌ e Israel cꞌapa ucucruobꞌ tunor tin e ajtzꞌojyirobꞌ xeꞌ tuobꞌ uchꞌajnarir e Filisti. Pues cay uchiobꞌ e tzꞌojyir tama e chinam Micmás y chamsanobꞌ ixin este que cꞌotoyobꞌ tama e chinam Aialón. Pero war aquetpobꞌ injayjayobꞌ. 32 Y tamar era conda acbꞌare ixiobꞌ wacchetaca tut lo que ulocsiobꞌ tut tin e tuobꞌ uchꞌajnarir e Filisti, y uchꞌamiobꞌ e oveja y e nuquir wacax y e chꞌom wacax y ucꞌuxiobꞌ uwerir xeꞌ ayanto uchꞌichꞌer. 33 Pero ayan cora ajtzꞌojyirobꞌ xeꞌ ixin tut e Saúl y chenobꞌ:

—Pues ayan meyra ajtzꞌojyirobꞌ xeꞌ war uchiobꞌ e mabꞌambꞌanir tut Cawinquirar Dios umen que war ucꞌuxiobꞌ e wer taca tunor uchꞌichꞌer, chenobꞌ e ajtzꞌojyirobꞌ era.

Entonces ojron e Saúl y che:

—Jax era inteꞌ nuxi mabꞌambꞌanir lo que war uchiobꞌ. Warcunic taric inteꞌ nuxi tun esto tara. 34 Y quisinic iware inteꞌ inteꞌ winic tuaꞌ utaresobꞌ e wacax o e oveja esto tara tuaꞌ uchamsiobꞌ y tuaꞌ ucꞌuxiobꞌ. Pues tamar era nox machi tuaꞌ iche e mabꞌambꞌanir tut Cawinquirar Dios umen que war ani icꞌuxi e wer taca tunor uchꞌichꞌer, che e Saúl.

Entonces tamar taca e acbꞌar era inteꞌ intiobꞌ uqꞌuechiobꞌ iꞌxin e wacax y uchamsiobꞌ y ulocsiobꞌ uchꞌichꞌer tor e tun era. 35 Entonces e Saúl cay upetzꞌe cora tun tuaꞌ aquetpa inteꞌ altar tut Cawinquirar Dios. Pues jax era e bꞌajxan altar lo que uche e Saúl. 36 Y de allí uyare tunor e ajtzꞌojyirobꞌ y che:

—Pues tamar taca e acbꞌar era ucꞌani tuaꞌ caxin cache e tzꞌojyir taca tin e tuobꞌ uchꞌajnarir e Filisti este que axin asacojpa, y ucꞌani tuaꞌ acꞌapa cachamsiobꞌ tunorobꞌ este que mamajchi aquetpa bꞌixir tujamobꞌ, che e Saúl.

Entonces ojronobꞌ e ajtzꞌojyirobꞌ y chenobꞌ:

—Chen bꞌan taca cocha aquetpa imbꞌutz toit, chenobꞌ e ajtzꞌojyirobꞌ.

Pero ojron e sacerdote y che:

—Pues bꞌajxan ucꞌani tuaꞌ coybꞌi taca Cawinquirar Dios tuaꞌ cawira jay bꞌan ucꞌani tuaꞌ cache, che e sacerdote.

37 Entonces e Saúl uyubꞌi tuaꞌ Cawinquirar Dios y che:

—¿Ucꞌani ca tuaꞌ cache e tzꞌojyir taca tin e tuobꞌ uchꞌajnarir e Filisti? Y ¿atacrion ca tuaꞌ cacucruobꞌ? che e Saúl.

Pero Cawinquirar Dios matucꞌa uyare tama e día era. 38 Entonces e Saúl upejca tin e ajbꞌijresiajobꞌ tuaꞌ e ajtzꞌojyirobꞌ y che:

—Nox xeꞌ ajbꞌijresiajox tuaꞌ e ajtzꞌojyirobꞌ, laric tara. Pues e Dios matucꞌa uyaren sajmi, bꞌajcꞌat ayan chi xeꞌ uche e mabꞌambꞌanir, y ucꞌani tuaꞌ cacꞌotoy canata chi era. 39 Pues Cawinquirar Dios cꞌapa ucorpeson tunoron tut tin e tuobꞌ uchꞌajnarir e Filisti sajmi. Y cꞌani inwareox que bꞌan cocha turu Cawinquirar Dios, que tin tin xeꞌ uche e mabꞌambꞌanir ucꞌani tuaꞌ achamesna, motor que jax niunen Jonatán, che e Saúl.

Pero motor que tunor e winicobꞌ era warix unatobꞌ chi xeꞌ uche e mabꞌambꞌanir, pero mamajchi ojron. 40 Entonces e Saúl uyare tunor e ajtzꞌojyirobꞌ xeꞌ tuobꞌ e Israel y che:

—Turenic tama inxejr lado bꞌana, y nen taca niunen Jonatán tuaꞌ caturuan teinxejr era, che e Saúl. Entonces ojronobꞌ e ajtzꞌojyirobꞌ y chenobꞌ:

—Chen bꞌan taca cocha aquetpa imbꞌutz toit, chenobꞌ e ajtzꞌojyirobꞌ.

41 Y de allí e Saúl cay ucꞌajti taca e Dios y che:

—Cawinquiraret Dios, xeꞌ Udiosir tin e tuobꞌ e Israel, ¿tucꞌa tuaꞌ que machi apejquen sajmi? Checsun ticoit chi tujor tuaꞌ acꞌaxi e jatzꞌuar tama e mabꞌambꞌanir era, y chi xeꞌ turu imbꞌutz toit, che e Saúl.

Entonces e sacerdote uꞌri e Urim† Iranic e nota tama e Urim tama e 1 Samuel 23:11. y quetpa tuchbꞌir e Jonatán y e Saúl, y e ajtzꞌojyirobꞌ xeꞌ tuobꞌ e Israel quetpobꞌ bꞌambꞌir tama tunor era. 42 Y de allí ojron e Saúl tut e sacerdote otronyajr y che:

—Juru e Urim otronyajr tuaꞌ aquetpa chequer chi xeꞌ tuaꞌ aquetpa tuchbꞌir, niunen Jonatán o nen, che e Saúl.

Y conda uri e Urim quetpa tuchbꞌir e Jonatán. 43 Entonces e Saúl uyare e Jonatán y che:

—Checsun taniut tucꞌa mabꞌambꞌanir xeꞌ ache, che e Saúl.

Entonces ojron Jonatán y che:

—Pues nen intaca inchꞌami imbꞌijc e chabꞌ tama upunto e teꞌ xeꞌ qꞌuecher nimener y inmaqꞌui. Y ¿tamar ca era ucꞌani tuaꞌ inchamesna? che e Jonatán.

44 Entonces ojron e Saúl y che:

—Pues net Jonatán, ucꞌani ixto tuaꞌ ichamesna. Que e Dios uwatzꞌiquen jay machi acꞌapa inche tunor lo que war inware era, che e Saúl.

45 Pero e ajtzꞌojyirobꞌ xeꞌ tuobꞌ e Israel uyareobꞌ e Saúl y chenobꞌ:

—¿Cocha canic que ucꞌani tuaꞌ achamesna e Jonatán? Pues jax jaxir xeꞌ ucorpes meyra ajtzꞌojyirobꞌ xeꞌ tuobꞌ e Israel sajmi. Pues bꞌan cocha turu Cawinquirar Dios cꞌani cawaret que matucꞌa tuaꞌ unumse ubꞌa oynen era y nien machi tuaꞌ acꞌaxi tut e rum nien inteꞌ utzutzer ujor. Porque tunor lo que ixin uche sajmi, uche tacar utacarsiaj Cawinquirar Dios, chenobꞌ e ajtzꞌojyirobꞌ xeꞌ tuobꞌ e Israel.

Y bꞌan cocha era e ajtzꞌojyirobꞌ xeꞌ tuobꞌ e Israel ucorpesobꞌ e Jonatán tuaꞌ machi achamay. 46 Entonces e Saúl uyare uyajtzꞌojyirobꞌ tuaꞌ uyactobꞌ uche e tzꞌojyir taca tin e tuobꞌ uchꞌajnarir e Filisti, y sutpa ixiobꞌ esto tuyototobꞌ.

47 Pues entonces conda e Saúl qꞌuecꞌo cꞌotori tujor tin e tuobꞌ e Israel, cay uyare uyajtzꞌojyirobꞌ tuaꞌ uchiobꞌ e tzꞌojyir taca tunor tin e aqꞌuijna uwirobꞌ ubꞌobꞌ tacar. Y bꞌan uche taca tin e turobꞌ tama e lugar Moab, y taca uchꞌajnarir e Amón, y taca tin e turobꞌ tama e lugar Edom, y taca e rey tama e lugar Sobá, y taca tin e tuobꞌ uchꞌajnarir e Filisti. Y tic taca tiaꞌ uchiobꞌ e tzꞌojyir uyajtzꞌojyirobꞌ, cꞌapa ucucruobꞌ tunor tin e aqꞌuijna uwira ubꞌobꞌ tacar. 48 Y tic taca tiaꞌ uchiobꞌ e tzꞌojyir uyajtzꞌojyirobꞌ e Saúl machi bꞌactobꞌ, y ixin ucucruobꞌ tin e tuobꞌ uchꞌajnarir e Amalec, y bꞌan cocha era ucorpesobꞌ tin e tuobꞌ e Israel tut tin e cay xujchꞌianobꞌ.

49 Pues uyunenobꞌ e Saúl jaxobꞌ era: ayan e Jonatán y ayan e Isví y ayan e Malquisúa. Y ayan chateꞌ uwijchꞌoctac xeꞌ jax era: ayan e Merab xeꞌ cuxpa bꞌajxan, y e Mical xeꞌ jax e ijtzꞌimbꞌir. 50 Y uwixcar e Saúl jax e Ahinóam xeꞌ jax uwijchꞌoc e Ahimaas. Y tin e aquetpa tujor tunor e ajtzꞌojyirobꞌ tuaꞌ e Saúl jax e Abner xeꞌ unembꞌir tuaꞌ e Ner xeꞌ jax umamaꞌ e Saúl. 51 Pues utataꞌ e Saúl xeꞌ jax e Quis, y e Ner xeꞌ jax utataꞌ e Abner, unembꞌirobꞌ tuaꞌ e Abiel.

52 Pues tin e ajtzꞌojyirobꞌ xeꞌ tuobꞌ e Israel uchiobꞌ e tzꞌojyir iraj iraj taca tin e ajtzꞌojyirobꞌ xeꞌ tuobꞌ uchꞌajnarir e Filisti tama tunor ucuxtar e Saúl, y inyajr inyajr conda e Saúl uwira incojt chꞌom sitz xeꞌ aqꞌuecꞌo y xeꞌ machi abꞌacta, uyare tuaꞌ achujca tuaꞌ aquetpa tujam e ajtzꞌojyirobꞌ xeꞌ tuaꞌ.