1 Pues conda e David cꞌapa ojron taca e Saúl, cꞌotoy utajwi ubꞌa taca uyunen e Saúl xeꞌ jax e Jonatán y cay tzay uwira ubꞌobꞌ meyra, y e Jonatán cꞌotoy uyajta ut e David bꞌan cocha uyajta ut ubꞌa jaxir. 2 Y tamar taca e día era jabꞌna e David umen e Saúl tuaꞌ aquetpa tacar, y machi uyacta tuaꞌ asutpa axin tuyotot utata. 3 Y e Jonatán cay uche inteꞌ pacto taca e David que ma tiaꞌ tuaꞌ uyacta tuaꞌ uyajta ut ubꞌobꞌ, cocha e Jonatán war uyajta ut e David bꞌan cocha war uyajta ut ubꞌa jaxir. 4 Entonces e Jonatán ulocse uchumpa y ubata xeꞌ lapar umener y uyajcꞌu e David taca tunor umachit y uchꞌantꞌin y e sarac y ucinturon.

5 Pues galan obꞌian e David tut tunor lo que arobꞌna tuaꞌ uche umen e Saúl, y tamar era e Saúl uturbꞌa e David tuaꞌ aquetpa ajbꞌijresiaj tujor cora ajtzꞌojyirobꞌ. Y tzayobꞌ meyra tunor e ajtzꞌojyirobꞌ y war atzay ubꞌan e inmojr ajbꞌijresiajobꞌ tuaꞌ e Saúl umen que turbꞌana e David tuaꞌ aquetpa ajbꞌijresiaj tacarobꞌ.

6 Pues entonces sutpa ixiobꞌ tunor e ajtzꞌojyirobꞌ tuaꞌ acꞌotoyobꞌ esto tuchinamobꞌ otronyajr, cocha e David cꞌapa uchamse e nuxi Goliat xeꞌ ajchꞌajnarir tuaꞌ e Filisti. Y cay locꞌoyobꞌ meyra sian ixictac tama inteꞌ inteꞌ chinam tama e Israel tuaꞌ uchꞌamiobꞌ e Saúl taca tunor e ajtzꞌojyirobꞌ, war ucꞌaywijresobꞌ y war actobꞌ y war alajbꞌobꞌ tama e pandero y tama e platillo tuaꞌ uchecsu ubꞌobꞌ que war atzayobꞌ que cucurnobꞌ tin e tuobꞌ uchꞌajnarir e Filisti. 7 Y conda war ucꞌaywijresobꞌ y war actobꞌ e ixictac, ucꞌaywijresobꞌ cocha era y chenobꞌ:

8 Pero e Saúl qꞌuijna meyra conda uyubꞌi tunor era, y tamar era ojron y che:

—Pues arobꞌna que e David uchamse 10,000 winicobꞌ, y que nen 1,000 taca inchamse. Pues ajtaquix aquetpa tuaꞌ aturbꞌana rey e David, che e Saúl.

9 Y tamar taca e día era e Saúl cay ubꞌijnu que más acꞌajna e David que jaxir.

10 Entonces tama otronteꞌ día e mabꞌambꞌan mein xeꞌ ebꞌtana tari umen Cawinquirar Dios cꞌaxi tama e Saúl y cay aru taca inteꞌ nuxi nuc macuir uyotot bꞌan cocha tin e satrem usasaꞌ. Entonces e David cay lajbꞌa tama e arpa bꞌan cocha acay uche tuaꞌ usisijres lo que war unumse ubꞌa e Saúl, pero jaxir qꞌuecher umener ulanza. 11 Y entonces wacchetaca ujachi ulanza tichan y uri tuaꞌ ani utzꞌajbꞌu tama e David tuaꞌ aquetpa tacꞌar tama unac e otot, pero e David nijqui tiaꞌ turu tuaꞌ ucorpes ubꞌa tut e lanza lo que jujra umen e Saúl, y bꞌan uche chajr.

12 Y tamar era e Saúl cay bꞌacta uwira e David, cocha chequer que war atacarna umen Cawinquirar Dios, y que jaxir actanix umen e Unawalir e Dios. 13 Entonces uyajnes locꞌoy e David tuyejtzꞌer, y uturbꞌa tuaꞌ aquetpa inteꞌ ajbꞌijresiaj tujor 1,000 ajtzꞌojyirobꞌ cocha war ucꞌani tuaꞌ achamesna tama e tzꞌojyir, pero e David uturbꞌa ubꞌa tuaꞌ ubꞌijresobꞌ tuaꞌ uchiobꞌ e tzꞌojyir. 14 Y cocha Cawinquirar Dios war utacre e David, locꞌoy imbꞌutz tunor lo que uche. 15 Y conda e Saúl cꞌotoy uwira tama tunor era ubꞌacre más meyra e David. 16 Pero tunor tin e tuobꞌ e Israel y xeꞌ tuobꞌ e Judá war atzay uwirobꞌ e David, cocha locꞌoy imbꞌutz tunor e tzꞌojyir conda war abꞌijresnobꞌ umener.

17 Entonces tama inteꞌ día e Saúl uyare e David cocha era y che:

—Cꞌani inwajqꞌuet niwijchꞌoc xeꞌ yaxar xeꞌ ucꞌabꞌa Merab tuaꞌ aquetpa awixcar. Pero bꞌajxan ucꞌani tuaꞌ achectes abꞌa que machi ibꞌacta ache e tzꞌojyir tuaꞌ Cawinquirar Dios, che e Saúl.

Pues e Saúl war ubꞌijnu que más ani imbꞌutz tuaꞌ actana achamesna e David umen tin e tuobꞌ uchꞌajnarir e Filisti, y que majax jaxir xeꞌ tuaꞌ uchamse. 18 Entonces ojron e David y che:

—¿Chien cora nen? Y ¿chiobꞌ cora nifamilia tujam tunor tin e tuobꞌ uchꞌajnarir e Israel tuaꞌ ani inquetpa niar tabꞌa xeꞌ reyet? che e David.

19 Pero conda cꞌotoy e día tuaꞌ ajcꞌuna e David e Merab tuaꞌ aquetpa uwixcar umen e Saúl, machi uyajcꞌu e David, sino que uyajcꞌu e Adriel xeꞌ ajlugar Meholá. 20 Pero e Mical xeꞌ jax incojt uwijchꞌoc e Saúl chꞌur ut tama e David. Entonces conda cꞌotoy unata e Saúl que bꞌan, tzay tamar. 21 Y tamar era cay ubꞌijnu tuaꞌ uyajcꞌu e David tuaꞌ aquetpa uwixcar, y que tamar erer axin uche acꞌaxi tama ucꞌabꞌ tin e tuobꞌ uchꞌajnarir e Filisti. Y entonces e Saúl uyare e David y che:

—Pues ayanto cocha tuaꞌ iquetpa niaret tanibꞌa, che e Saúl.

22 Pero ojronto e Saúl taca umanobꞌ jaxobꞌ taca y che:

—Ojronenic tzꞌustaca taca e David y arenic que nen xeꞌ reyen war intzay inwira, y que bꞌan ubꞌan tunor nimanobꞌ, y que tamar era erer aquetpa niniar, che e Saúl.

23 Entonces ixiobꞌ umanobꞌ e Saúl tuaꞌ oꞌjronobꞌ taca e David bꞌan cocha arobꞌnobꞌ, pero sutpa ojron e David y che:

—Pues galan ani tuaꞌ inquetpa uniar e rey. Pero war ibꞌijnu que majax bueno tuaꞌ inche. Pues nen matucꞌa ayan tacaren y matucꞌa nicꞌampibꞌir tuaꞌ ani innujbꞌi taca inteꞌ uwijchoc e rey, che e David.

24 Entonces sutpa ixiobꞌ umanobꞌ e Saúl y uchecsuobꞌ tut lo que arobꞌna umen e David. 25 Entonces ojron e Saúl y che:

—Quiqui arenic e David cocha era y che: “Pues tuaꞌ uyubꞌiet inujbꞌi taca uwijchoc e rey, ucꞌani tuaꞌ iꞌxin achamse 100 winicobꞌ xeꞌ tuobꞌ uchꞌajnarir e Filisti xeꞌ jax tin e war aqꞌuijnobꞌ tacar, y ucꞌani tuaꞌ axuri uqꞌuewerir utejromar inteꞌ intiobꞌ y tuaꞌ atares tunor era tut jaxir,” bꞌan tuaꞌ iware e David, che e Saúl. Pero lo que más war ucꞌani e Saúl jax tuaꞌ achamesna e David umen tin e tuobꞌ uchꞌajnarir e Filisti.

26 Entonces sutpa ixiobꞌ umanobꞌ e Saúl esto tiaꞌ turu e David y uchecsuobꞌ tunor era tut, y quetpa imbꞌutz tut e David tuaꞌ uche tunor era tuaꞌ erer aquetpa niartzꞌir tuaꞌ e rey. Pero quetpa tuaꞌ uche tunor era bꞌajxan que acꞌotoy e día conda aquetpa tuaꞌ asutpa acꞌotoy tut e rey otronyajr. 27 Entonces ixin e David y umorojse tunor uyajtzꞌojyirobꞌ y ixiobꞌ tuaꞌ uchamsiobꞌ 200 winicobꞌ xeꞌ tuobꞌ uchꞌajnarir e Filisti. Y entonces uqꞌueche ixin tunor uqꞌuewerir utejromarobꞌ e winicobꞌ era tut e rey, y uyajcꞌu tuaꞌ uyubꞌi aquetpa niartzꞌir tuaꞌ e rey. Y tamar era e Saúl quetpa tuaꞌ uyajcꞌu uwijchꞌoc Mical tuaꞌ aquetpa uwixcar e David.

28 Pero conda e Saúl cꞌotoy unata que Cawinquirar Dios war utacre e David, y que war ayajtna ut meyra umen uwijchꞌoc, 29 cay ubꞌacre más meyra. Y tamar era e Saúl quetpa que war aqꞌuijna uwira e David tama tunor ucuxtar. 30 Y iraj iraj conda e ajtzꞌojyirobꞌ xeꞌ tuobꞌ uchꞌajnarir e Filisti alocꞌoyobꞌ tuaꞌ uchiobꞌ e tzꞌojyir taca tin e tuobꞌ e Israel, e David taca uyajtzꞌojyirobꞌ locꞌoy uchamsiobꞌ meyra tin e tuobꞌ uchꞌajnarir e Filisti, más meyra que tunor e inmojr ajbꞌijresiajobꞌ tuaꞌ e Saúl, y tamar era e David cꞌotoy quetpa tattzbꞌir meyra.